प्रदेश २ को सडक सञ्जाल अस्तव्यस्त

पवन यादव

सिमरा — अविरल वर्षासँगै आएको बाढीका कारण प्रदेश २ को सडक सञ्जाल अस्तव्यस्त भएको छ । पूर्व पश्चिम राजमार्गसँगै प्रदेश २ भरीकै भित्री सडकहरु निर्वाध रुपमा सञ्चालन हुन सकेको छैन । बाढीले केही स्थानको सडक डुबानमा पारेको छ भने राजमार्ग सहित केही स्थानमा पुल बगाएको प्रदेश २ को प्रदेश ट्राफिक प्रहरी कार्यालय पथलैयाले जनाएको छ ।

पूर्व–पश्चिम राजमार्गको पथलैया निजगढ सडक खण्ड अर्न्तगत बाराको निजगढ बजार क्षेत्रको लचकामा पानीको बहाव बढेर शुक्रबारदेखि डाइभर्ट गरिएको सवारी साधन पानीको बहाव कम भएसँगै शनिबार बिहानदेखि निर्वाध रुपमा सञ्चालनमा आएको कार्यालयले जनाएको छ ।

पानीको बहाव बढेसँगै शुक्रबारदेखि अवरुद्ध चन्द्रनिगाहपुर–बागमती खण्डको लचकमा पनि शनिबार अपरान्हदेखि ठूला सवारी साधन सञ्चालनमा आएको प्रदेश २ ट्राफिक प्रहरी कार्यालय पथलैयाले जनाएको छ ।

बर्दिवासस्थित भप्सी पुललाई बाढीले बगाउँदा शुक्रबार रातिदेखि अवरुद्ध भएपछि पूर्वतर्फ जाने ठुला सवारी साधनहरुलाई पथलैयामै व्यवस्थापन गर्न थालिएको प्रदेश २का प्रदेश ट्राफिक प्रहरी कार्यालय का प्रमुख प्रहरी उपरिक्षक योगबहादुर पालले जानकारी दिए ।

‘अवरुद्ध राजमार्गलाई सुचारु गराउन प्रयास भईरहेको छ,’ उनले भने, ‘प्रभावित क्षेत्रमा ट्राफिक प्रहरी, नेपाल प्रहरी र सशस्त्र प्रहरी संयुक्त रुपमा परिचालन गरिएको ।’ राजमार्गमा गुडेका सवारी साधनलाई गन्तव्यमा पुग्न आवागमन सहज बनाउन अन्य निकायसँग समन्वय गरी वैकल्पिक व्यवस्था मिलाउन ट्राफिक प्रहरी क्रियाशिल रहेको उनले जानकारी दिए ।

सडक सञ्जाल बिग्रेको कारण बीच बाटोमा पुगेर सवारी चालक, यात्रीले दुःख नपाउन भन्ने उद्देश्यले चालकलाई समयमै पथलैयामै सचेत गराउन थालिएको उनले जानकारी दिए ।

बारा सदरमुकाम कलैया लगायत जिल्लाको ग्रामिण भेगको बाटो हिलामय भएको र सवारी साधन हिलोमा फस्ने र चिप्लेर दुर्घटनामा पर्ने सम्भावना बढेकोले ट्राफिक प्रहरीसंग समन्वय गरी मात्र अगाडीको यात्रा तय गर्न चालक तथा यात्रीलाई ट्राफिक प्रहरीले अनुरोध गरेको छ ।

प्रदेश २ को रौतहट, पर्सा, सर्लाही, महोत्तरी, धनुषा, सिरहा, सप्तरी जिल्लाको ग्रामिण सडक अस्तव्यस्त बनेको ट्राफिक प्रहरीले जनाएको छ । पथलैयामा मात्रै पूर्वतर्फ जाने ५ सय भन्दा बढी सवारी साधनलाई व्यवस्थित गरि राखिएको ट्राफिक प्रहरी कार्यालयले जनाएको छ ।
त्यस्तै प्रदेश २ ट्राफिक प्रहरी कार्यालय पथलैयाले शनिबार सार्वजनिक सूचना जारी गरी सडकमा जथाभावी सवारी पार्किङ नगर्न, ओभरटेक नगरी सवारी चलाउन, यात्रा पूर्व नजिकको ट्राफिक प्रहरी कार्यालय वा यस कार्यालयमा सम्पर्क गरी सडकको अवस्था बारे जानकारी लिएर मात्र अगाडी बढ्न अनुरोध गरेको छ ।

पूर्व पश्चिम राजमार्गमा दैनिक साना ठूला गरी ५ हजार भन्दा बढी सवारी साधन आवतजावत गर्ने गरेको ट्राफिक प्रहरीले जनाएको छ ।

प्रकाशित : असार २८, २०७६ १७:४६
प्रतिक्रिया
पठाउनुहोस्

नगरसभा : पूर्वाधार विकासमै जोड

सडक, नाला र विद्यालय निर्माणलाई विगतजस्तै प्राथमिकतामा राखेर स्थानीय तहले बजेट ल्याएका छन्
पवन यादव

सिमरा — जिल्लाका स्थानीय तहले प्रस्तुत गरेको बजेट सिलिङमा पूर्वाधार विकासमा जोड दिएका छन् । ०७६/०७७ का लागि पनि नगरसभामा पुरानै ढर्रा र शैलीमा बजेट प्रस्तुत गरिएको देखिएको छ ।

पूर्वाधार विकासमा पछाडि परेको नगर क्षेत्रको सडक, नाला, विद्यालयको भौतिक संरचना निर्माण लगायतका लागि ठूलो परिमाणमा बजेट छुट्याइएको छ । जितपुरसिमरा उपमहानगरपालिकाले यस वर्ष झन्डै १ अर्ब २९ करोड रुपैयाँको अनुमानित आयब्यय प्रस्तुत गरेको छ ।

उपमहानगरपालिकाको तेस्रो नगरसभामा उपप्रमुख सरस्वती चौधरीले चालु र पुँजीगत तर्फ गरी १ अर्ब २८ करोड ८५ लाख ६६ हजारको बजेट प्रस्तुत गरिन् । बजेटअनुसार चालु खर्चतर्फ १६ करोड ९५ लाख र पुँजीगत खर्च तर्फ एक अर्ब ८९ करोड ६६ हजार रुपैयाँको बजेट तयार पारिएको छ ।

यसमा पूर्वाधार विकासतर्फ १३ करोड २९ लाख, सामाजिक विकासतर्फ ७ करोड ९८ लाख, आर्थिक विकासतर्फ ४ करोड ५१ लाख ५० हजार, सुशासन तथा सेवा प्रवाहतर्फ १ करोड ४३ लाख ५० हजार, वातावरण तथा विपद व्यवस्थापनतर्फ १ करोड ४० लाख, भूमि व्यवस्थापनतर्फ १ करोड, बाटो मर्मततर्फ १ करोड रकम विनियोजन गरिएको छ ।

उपप्रमुख चौधरीले प्रस्तावित योजना तथा प्रभावकारी कार्यान्वयनका लागि आवश्यक कार्ययोजना बनाएर अघि बढ्ने बताइन् । यस वर्ष पनि सडक सञ्जाल र शिक्षालाई प्राथमिकतामा जोड दिइएको जितपुरसिमरा उपमहानगरपालिका नगर प्रमुख कृष्ण पौडेल बताए । बहुआयामिक विकासको पहिलो प्राथमिकतामा रहेको सडकलाई फराकिलो बनाउने र स्तरोन्नति गर्ने कार्यलाई प्राथमिकतामा राखिएको उनले जिकिर गरे ।

त्यस्तै निजगढ नगरपालिकाले नगरसभाबाट ०७६/०७७ का लागि ७६ करोड ९७ लाख ४० हजार रुपैयाँको बजेट प्रस्तुत गरेको छ । चौथो नगर सभामा निजगढ नगरपालिकाकी उपप्रमुख लीलादेवी लामिछाने खनालले गरपालिकाको बजेट सहितको नीति तथा कार्यक्रम प्रस्तुत गर्दै संघीय सरकारबाट ५६ करोड १४ ला, प्रदेश सरकारबाट ४ करोड ३३ लाख ४० हजार, मालपोत रजिस्ट्रेसनबाट १ करोड ५० लाख र आन्तरिक आयबाट ११ करोड रुपैयाँको बजेट प्रस्तुत गरिन् ।

प्रस्तुत बजेटमा पूर्वाधार विकास तर्फ १५ करोड ८८ लाख, आर्थिक विकासतर्फ ३ करोड १६ लाख, सामाजिक विकास तर्फ ४ करोड १७ लाख, विपद व्यवस्थापन तर्फ १ करोड र संस्थागत विकास तर्फ २ करोड १५ लाख र चालु खर्च तर्फ ११ करोड ५० लाख ४० हजारको बजेट विनियोजन गरिएको जनाइएको छ ।

कृषि र पर्यटनका लागि सडक सञ्जाल अतिमहत्त्वपूर्ण रहेकाले यसपालि पनि पूर्वाधार विकासलाई प्राथमिकतामा राखिएको निजगढ नगरपालिकाका नगर प्रमुख सुरेशकुमार खनालले बताए । ‘पर्यटनको प्रचुर सम्भावना हामी कहाँ छ,’ उनले भने, ‘पर्यटकीय क्षेत्रको संरक्षण र संवर्द्धन गर्न नगरपालिका लागेको छ ।’ त्यसैले नगरसभाबाट पर्यटनमा सघाउ पुर्‍याउने पूर्वाधार विकासलाई जोड दिइएको उनले जानकारी दिए । त्यस्तै कलैया उपमहानगरपालिकाले ०७६/०७७ का लागि १ अर्ब २० करोड ६४ लाख रुपैयाँको बजेट प्रस्तुत गरेको छ ।

नगरसभामा बजेट प्रस्तुतीकरण गर्नु अगाडि उपप्रमुख रहिमा खातुन सहित केही वडाध्यक्ष, कार्यपालिका सदस्यले असन्तुष्टि जनाउँदै नगरसभाबाट बाहिरिएका थिए ।

उदघाटन सत्र सकेर उनीहरू नगरसभाबाट बाहिरिएपछि नगर सभा हाललाई स्थगित गर्नु परेको कलैया उपमहानगरपालिकाका प्रमुख प्रशासकीय अधिकृत हरिनारायण बेलवासेले बताए । ‘नगरसभा उदघाटन भइसकेको छ,’ उनले भने, ‘प्रस्तुत बजेटलाई क्रमशः छलफलमा लगेर २५ गते सम्म नगरसभा टुंग्याइन्छ ।’ स्थानीय तह सञ्चालन ऐनमा भएको व्यवस्थाअनुसार कोरम पुर्‍याएर प्रस्तुत बजेट पारित गरिने उनले जानकारी दिए ।

प्रकाशित : असार १३, २०७६ १०:१७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×