जग्गा विवादले विद्यालय तनावग्रस्त

शाहीमान राई

(जनकपुर) — वर्षौंदेखि विद्यालयले खेलमैदानका रूपमा भोगचलन गर्दै आएको जमिन जग्गाधनीले आफै उपभोग गर्ने भन्दै सीमास्तम्भ गाडेपछि विवाद चुलिएको छ । विद्यालय सञ्चालक समिति र जग्गाधनीबीच विवादले चुलिएको हो ।

धनुषाधाम नगरपालिका–९ धारापानीको मूलाबारी भिमानस्थित श्री माविले खेलमैदानको रूपमा उपभोग गर्दै आएको जमिन जग्गाधनी आफैले उपभोग गर्ने भन्दै नापी कार्यालयका सर्वेक्षकद्वारा नापजाँच गरी सीमास्तम्भ गाडेपछि विवादले भएको हो। धनुषाको बटेश्वर–३ की पशुपतिकुमारी लामाले नापी कार्यालयबाट खटिएका सर्वेक्षकद्वारा नापजाँच गरी सीमांकन गरेर सीमास्तम्भ गाडेपछि विद्यालय मैदान तनावग्रस्त बनेको छ । विद्यालयले दानमा पाएको भन्दै लामाको नाममा रहेको जग्गामा स्वामित्व दाबी गरेको छ ।


लामाले आफ्नो नाममा रहेको कित्ता नं ५८८ को ३ धुर, ५८९ को २ धुर, ५९० को २ धुर र ५९२ को ७ कठ्ठा २ धुर गरी सात कठ्ठा २ धुर जमिन उपभोग गर्ने अधिकार आफूहरूको भएकाले विद्यालयले सहज रूपमा छाड्नुपर्ने भन्दै जिल्ला प्रशासन, मालपोत र नापी कार्यालयमा निवेदन दिएकी छन् । प्रशासनले सुरक्षाको व्यवस्था गरी नापीलाई सर्वेक्षक खटाई नापजाँच गराउन निर्देशन दिएअनुसार शनिबार सर्वेक्षक राजेन्द्रप्रसाद साह र धिरेन्द्र ठाकुरसहितको टोलीले नापजाँच गरी सिमाना छुट्याइदिएका थिए । सर्वेक्षकले देखाइदिएको सिमानामा गाडिएको सीमास्तम्भ स्थानीयवासीले केहीबेरमा उखेलिदिएका थिए ।


विद्यालय मैदान जग्गाधनीले उपभोग गर्ने भएपछि आइतबार विद्यार्थीले विरोधमा प्रदर्शन गरे । विद्यालय व्यावस्थापन समितिका अध्यक्ष लक्ष्मीनारायण मण्डलले आफूलाई जानकारी नै नगराई प्रहरी प्रशासनको आडमा विद्यालयको खेलमैदान नापजाँच गरेको बताए । तर, नापी कार्यालय विद्यालय, वडा कार्यालय र धनुषाधाम नगरपालिका लगायत साँधसधियारलाई पत्र पठाएको नापी कार्यालय प्रमुख शत्रुघ्न यादवले जनाए । जिल्ला प्रशासनले समेत संविधानमा व्यक्तिको सम्पत्ति सुरक्षाको प्रत्याभूति दिएकाले नगरपालिकालाई आवश्यक समन्वय गरी जग्गाको खिचलो समाधान गर्न पटक पटक पत्राचार गरेको थियो । ०२० मा स्थापित विद्यालयले ०३३ मा दान स्वरूप पाएको जमिन नछाड्ने विद्यालय व्यावस्थापन समितिका अध्यक्ष मण्डलले बताए । उनले सोमबार प्रशासन , नापी कार्यालयको ध्यानाकर्षण गराएको जनाए । तर प्रशासनले जग्गा खिचलो मिलाउने काम स्थानीय तहका जनप्रतिनिधिको भएकाले स्थानीय तहमै जान सुझाव दिएको मण्डलले बताए । उनले उक्त जग्गा लामाकै मावली हजुरबुबा करनबहादुर स्याग्बोले दान स्वरुप प्रदान गरेको भर्पाइ सुरक्षित रहेको बताए । मण्डलका अनुसार करनबहादुरले ०३३ कात्तिक १३ मा भर्पाइ गरी कित्ता नं ६० को जमिन दानस्वरूप प्रदान गरेको कागज विद्यालयसित सुरक्षित छ ।


उक्त भर्पाइ कागजमा तत्कालीन सञ्चालक समितिको तर्फबाट साक्षीका रूपमा छे दोर्जे लामा र विषबहादुर कार्कीको औंठाछाप छ । तर, करनबहादुर आफ्नो हजुरबुबा नभएको र जग्गा दान गरेको समेत थाहा नभएको जग्गाधनि लामाले बताइन् । उक्त जग्गा दान प्राप्त गरेको दाबी गरे पनि विद्यालयसित लालपुर्जा छैन । विद्यालय व्यावस्थापन समितिका अध्यक्ष मण्डलले विद्यालयसित लालपुर्जा नहुनु कमजोरी रहेको बताए । पूर्वपश्चिम राजमार्गमा पर्ने तत्कालीन यज्ञभूमी–९ का कर्णवीर स्याङ्बोले भोगचलन गर्दै आएको कित्ता नं ५८ मा १३ कठ्ठा ८ धुर, कित्ता नं ५९ मा एक विघा २ कठठा १२ धुर जमिन ०२३ को नापीमा आफ्नो नाममा नापजाँच गराएका थिए । त्यसमध्येबाट छोरी स्यामकुमारीलाई कित्ता नं ५८८, ५८९, ५९० र ५९२ पास गरिदिएका थिए । उक्त जग्गा स्यामकुमारीले समेत छोरी पशुपतिकुमारीको नाममा रजिस्ट्रेसन पास गरिदिएकी छन् । जग्गाको लालपुर्जा लामासित रहेको र मालपोत रकम समेत बर्षेनी तिर्दै आएकाले आफ्नो जग्गा विद्यालयले अतिक्रमण गरी संरचना निर्माण गरेको बताइन् । जग्गामा विद्यालयको खेलमैदान, दुई वटा शौचलाय, भान्छा घर र भण्डार कोठा छ । विद्यालयले ४५ बर्षदेखि उपभोग गर्दै आएकाले कुनै हालतमा पनि नछाड्ने विद्यालयका प्रधानाध्यापक प्रदीप सिंहले बताए ।


प्रकाशित : असार १८, २०७६ ११:००

प्रतिक्रिया
पठाउनुहोस्
ADVERTISEMENT
ADVERTISEMENT

श्रीमतीले छल गरेपछि....

शाहीमान राई

जनकपुर — तराई मधेसमा दाइजो, बालविवाह, अनमेल विवाह, कुटपिट जस्ता महिलामाथि घरेलुहिंसाका समाचार सुन्ने गरिएको छ । तर महिलाले पुरुषलाई हिंसा गरेको समाचार प्रायः आउँदैन । महिला हिंसाविरुद्ध सामाजिक अभियान व्यापक भएपछि पुरुषमाथिको हिंसा ओझेलमा परे पनि महिलाले पुरुषलाई हिंसा गरेको प्रतिनिधि घटना सार्वजानिक हुन थालेका छन् ।

प्रदेश २ को केन्द्र जनकपुरका एक जना युवालाई सासु ससुरा र श्रीमती मिलेर उठिबास लगाएको घटना सार्वजनिक भएको छ । जनकपुरधाम उपमहानगरपालिका–५ मालीटोलका ४६ वर्षीय विजय साहले आफ्नो पुर्ख्यौली घर जग्गा र नगद समेत ससुरालीले एकलौटी बनाएर घरबाट बाहिर निकालेपछि मात्र उठिबास लगाएको थाहा पाएको बताए ।

डिभी चिठ्ठा परेर २४ वर्षदेखि अमेरिका बस्दै आएका साहको पुर्ख्यौली १३ धुर जग्गामा बनेको घर र अंशमा परेको एक कठ्ठा जमिन ससुरालीले जालझेल गरेर आफ्नो नाममा मालपोत रजिष्ट्रेसन पास गरेको खुलासा गरेका छन् । सन १९९५ मा अमेरिका गएका साहले १५ वर्षअघि छिमेकी वृजनन्दन प्रसाद साह र मन्जुदेवी साहकी छोरी सरिता साहसित मागी विवाह गरेका थिए ।

उनका अनुसार विवाह गरेपछि केही वर्ष आमा गुलावदेवी र श्रीमतीलाई सँगै छाडेर अमेरिका गएका बेला पत्नी सरिताले घरजग्गा आफ्नो नाममा पास गरिदिन दबाब दिन थालिन् । बाबुको मृत्युपछि आमा गुलावदेवीको नाममा नामसारी भइआएको कित्ता नं १८६ को पुर्ख्यौली घरजग्गा र अंशबापत पाएको जनकपुरधाम उपमहानगरपालिका ४ स्थित परिक्रमा सडक छेउको एक कठ्ठा जमिन
आफ्नो नाममा पास गरिदिन दवाव दिदै आएकी थिइन् ।

बुहारीको दवाव थेग्न नसकेर अमेरिकामै बस्दै आएका आमा गुलावदेवीले २०६८ असार २१ गते धनुषा जिल्ला अदालतको पत्रअनुसार अमेरिकाको वासिङटनडिसिस्थित नेपाली राजदुतावासका राजदुत डा.शंकरप्रसाद शर्मामार्फत प्रमाणित गराई विजयको पत्नि सरिता साहको नाममा कित्ता नं १९६ कोघरजग्गाको अधिकृत वारेसनामा दिएकी थिइन् ।

तर सरिताले सोही वारेसनामाको आधारमा २०६८ चैत २२ गते आफ्नो श्रीमान् विजय, दुई जना जेठाजु रामलाल साह र श्रीराम साहसमेतको अंशमा हक लाग्ने कित्ता नं १८६ को १३ धुरजग्गा र श्रीमान विजयको नामको एक तले घरसहितको एक कठ्ठा जमिन बाबु वृजनन्दन प्रसाद साह र आमा मन्जुदेवी साहको नाममा मालपोत रजिष्ट्रेसन पास गरिदिएको पीडित साहले मंगलबार पत्रकार सम्मेलन गरीआफ्नो वेदना सुनाए ।

मालपोत कार्यालयको जग्गा राजिनामाको तमसुक अनुसार सरिताले सासुको घरजग्गा दश लाख ६० हजार रुपैयाँमा आफ्नै बाबुलाई बिक्री गरेको देखिन्छ । तर उक्त जग्गाको बजारमूल्य प्रतिधुर २५ लाख रुपैयाँका दरले तीन करोड २५ लाख रुपैयाँ पर्छ । अर्को जनकपुरको परिक्रमा सडकले छोएको घरसहित एक कठ्ठा जमिनको मुल्य ५ करोडरुपैयाँ पर्ने उनका दाजु रामलाल साहले बताए ।

पछिल्लो समय श्रीमती सरिता, दश वर्षीय छोरा आदित्य साह र अर्को छोरा ८ वर्षीय अंकित साहसहित अमेरिकामै बस्दै आएको विजय साहले बताए । पााच दिनअघि पूर्ख्यौली घरजग्गा आफ्नो नाममा नामसारी गर्न अमेरिकाबाट पारिवारिक सल्लाहअनुसार ससुराली घर आइपुग्दा ससुरालीले बासै नदिएपछि छाँगाबाट खसेजस्तो भएको बताए ।

उनलाई ससुरा वृजनन्दन, सासु मन्जुदेवी, श्रीमतिका भाइहरू राजेश र दीपक साहले कुटपीट, दुरव्यवहार समेत गरेको सुनाए । ससुराली पुग्दा सासु ससुराले विजयको सम्पूर्ण घरजग्गा छोरीबाट आफूले किनेको जवाफ दिएपछि आफूलाई उठिवास लगाएको महसुस गरेको पीडित विजय साहले बताए । ‘उनी अमेरिका जानुअघि पतिको सबै चलअचल सम्पति आमाबाबुलाई रजिष्ट्रेसन पास गरिदिएकी रहिछन्,’ पीडित साहले भने, ‘जग्गाजमिन आफ्नो नाममा पास गरेर फर्किनका लागि मलाई श्रीमतीले नै पठाएको हो, तर यो के भइरहेको हो बुझ्नै सकेको छैन ।’

अमेरिकामा ट्रक चालकको काम गर्दै आएका साहले २४ वर्षको बसाइमा ससुरालीलाई १५ लाख रुपैयाँभन्दा बढी नगद पनि दिएको बताए । यसवाहेक अमेरिकामा तीन लाख डलर (करिब साढे तीन करोड रुपैंयाँ) मा एक तले घर किनेको बताए । त्यही घरमा श्रीमती र छोराहरू बस्दैछन् । तर ससुरालीको कुटाइ र दुर्व्यवहारपछि श्रीमतीले सम्बन्धविच्छेद माग्न थालेको विजय साहले बताए ।

‘अमेरिकी कानुनअनुसार सम्बन्धविच्छेद मागेपछि भइहाल्छ, तर ५० प्रतिशत सम्पत्ति पनि दिनुपर्ने हुन्छ,’ पीडित साहले भने, ‘विदेशमा धेरै दुःख गरें, अहिले घर न घाटको भएँ, सबै सम्पत्ति ससुरालीले लिए, अर्कोतिर श्रीमती पनि पारपाचुके माग्दैछिन् ।’ यतिबेला श्रीमतीसित सम्पर्क समेत हुन नसकेको बताए । ‘मेरो आइफोन खोसिएपछि अर्को सेटवाट सम्पर्क गर्दा सम्पर्क हुन सकेको छैन,’ उनले भने, ‘अब मसित सम्पत्तिकोनाममा पासपोर्ट बाहेक केही छैन ।’

सगोलमा रहेको पुर्ख्यौली जमिन पत्नी सरिताले बाबुआमालाई राजीनामा पास गरिदिएपछि दाजुहरू रामलाल र श्रीरामसित सम्बन्ध बिग्रिएको छ । उनीहरूले आमाको नामको जग्गा तीन भागमा एक एक भाग पाउनुपर्ने माग गर्दै आएका छन् ।

प्रकाशित : वैशाख १६, २०७६ ०९:३४
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×