कुटेरै हत्या

अवधेशकुमार झा

राजविराज — युवाहरूको एक समूहले सप्तरी सदरमुकाम राजविराजमा एक युवकलाई कुटेरै हत्या गरेका छन् । तिरहुत गाउँपालिका ३ पिपराहीका २५ वर्षीय जयकृष्ण विराजी यादवको हत्या भएको हो । जिल्ला प्रहरी कार्यालय सप्तरीका प्रवक्ता डिएसपी भावेश रिमालका अनुसार राजविराज ७ मा केही व्यक्तिले मंगलबार राति उनलाई राजविराज ७ मा निर्घात कुटपिट गरेका थिए । 

‘बासको भाटा, रड लगायत वस्तुले प्रहार गरिएको प्रारम्भिक अनुसन्धानबाट देखिएको डीएसपी रिमालले बताए । कुटपिटबाट गम्भीर घाइते भएका विराजीलाई प्रहरीले उपचारका लागि गजेन्द्रनारायण सिंह अस्पताल पुर्‍याएको थियो । त्यहाँ उपचार हुन सम्भव नभएपछि थप उपचारका लागि नावेल अस्पताल विराटनगर लगिएकोमा बुधबार दिउँसो उनको मृत्यु भएको थियो ।

‘८–१० जनाको समूहमा रहेकाहरूले उनलाई कटेरै मारेका हुन्’ डीएसपी रिमालले भने, ‘कुटपिटका कारण भने अझैसम्म स्पष्ट हुन सकेको छैन ।’ जयकृष्णको मृत्युपछि आक्रोसित उनका आफन्तहरूले बुधबारै साँझ आरोपीलाई पक्राउ गरी कारबाही गर्न जिल्ला प्रहरी कार्यालय सप्तरीमा मुद्दा गर्न गए पनि दर्ता नगरेको भन्दै आफन्त तथा स्थानीयले बिहीबार शवसहित प्रदर्शन गर्दे जिल्ला प्रशासन कार्यालय अगाडि शवसहित प्रदर्शन गरेका थिए । प्रदर्शनकारीहरूका कारण बिहीबार दिउँसो जिल्ला प्रशासन कार्यालयमा नेपाल र सशस्त्र प्रहरी परिचालन गरिएको थियो । प्रदर्शनकारीले आरोपी पक्राउ गरी कारबाही गरिनुपर्ने र मृतक परिवारलाई क्षतिपूर्ति दिनुपर्ने माग राखेका थिए ।

जिल्ला प्रहरी कार्यालय सप्तरीले भने बिहीबार प्रदर्शन चलिरहेका बखत कर्तव्य ज्यान मुद्दाको जाहेरी दर्ता गरेको छ । ‘जाहेरी दर्ता नगर्ने कुनै मनसाय होइन, प्रक्रिया नमिलेर एक दिन ढिलो मात्र भएको हो,’ डिएसपी रिमालले भने, ‘बुधबार दिउँसो विराटनगरमा उपचारको क्रममा मृत्यु भईसकेपछि पोष्टमार्टम नभएको तथा मोरङ प्रहरीसित समन्वय गरी मुद्दाको प्रक्रिया अगाडि बढाउनुपर्ने भएकाले जाहेरी दर्ता हुन नसकेको हो ।’ ‘कर्तव्य ज्यानको मुद्दा नचलाई हुन्छ र ?’ डीएसपी रिमालले भने । जाहेरी दर्तापछि उनको शव अन्तिम संस्कार गर्न लगेका थिए ।

हत्यामा संलग्नहरूको पहिचान भइसकेकाले उनीहरूको खोजी तिब्र बनाइएको डिएसपी रिमालले बताए । स्थानीय बासिदाले भने, जयकृष्णको हत्यामा भने प्रेम सम्बन्धको विषय कारण रहेको बताएका छन् । यद्यपि प्रहरीले भने अझै कारण स्पष्ट भई नसकेको बताएको छ ।

हत्या गरिएका विराजी राजविराजस्थित पिसजोन स्कुलका छात्रावास प्रमुख थिए भने सोही विद्यालयमा अध्यापनको काम समेत गर्दै आएका थिए ।

६ महिनामा तीन घटना
कुटपिटबाटै हत्या गरिएको यो घटना पछिल्लो ६ महिनामा तेस्रो हो । यसअघि राजविराज नगरपालिका १ का युवा प्रेम यादवको केही युवाको समूहले धारिलो हतियार प्रहार गरेर राजविराजमा हत्या गरेका थिए ।

यसै गरी तिलाठी कोइलाडी गाउँपालिकाको कार्यालयमा रात्रिकालीन सुरक्षा गार्डका रूपमा कार्यरत परसुराम मिश्रलाई समेत कुटेर तथा फलामले हानेर हत्या गरिएको थियो । ती हत्या काण्डमा प्रहरीले भने केही आरोपीहरूलाई पक्राउ गरिसकेको छ ।

महिलाको हत्या
सर्लाही– सदरमुकाम मलंगवामा बिहीबार एक महिलाको हत्या भएको छ । मलंगवा नगरपालिका ९, स्थित सर्लाही आँखा केन्द्रका चिकित्सक दिपेन्द्र रजकको श्रीमती २७ वर्षीय सुप्रिया भारतीको हत्या गरिएको हो ।

अस्पतालको दोस्रो तल्लामा रहेको निवासमा बस्दै आएका रौतहट जिल्ला यमुनामाई गाउँपालिका ३ राजपुर तुलसीका रजककी पत्नी भारतीको हत्या भएको प्रहरीले जनाएको छ । अस्पतालमै अप्टिकल अस्टिेन्टका रूपमा काम गर्दै आएका ३० वर्षीय अमित बैठा निवासमा गई भारतीको टाउकोमा हतौडा प्रहार गरेका थिए ।

टाउकोमा गहिरो चोट लागेको भारतीको घटनास्थलमै मृत्यु भएको जिल्ला प्रहरी कार्यालयले जनाएको छ । बैठाले भारतीसँगै ४ वर्षीय छोरा दिवसकुमार रजकको टाउकोमा समेत प्रहार गरेको छ । बालक दिवसको टाउँकोमा गम्भीर चोट लागेको छ । उनको जिल्ला अस्पतालमा उपचार सम्भव नभएपछि वीरगन्ज रिफर गरिएको छ ।

नातामा आफन्त पर्ने रौतहटका बौधिमाई नगरपालिका सरमुजबाका बैठा घटना पछि फरार छन् । उनको खोजी भइरहेको उपरीक्षक प्रतीत सिंह राठौरले बताए ।

प्रकाशित : असार १३, २०७६ १०:१८
प्रतिक्रिया
पठाउनुहोस्

नगरसभा : पूर्वाधार विकासमै जोड

सडक, नाला र विद्यालय निर्माणलाई विगतजस्तै प्राथमिकतामा राखेर स्थानीय तहले बजेट ल्याएका छन्
पवन यादव

सिमरा — जिल्लाका स्थानीय तहले प्रस्तुत गरेको बजेट सिलिङमा पूर्वाधार विकासमा जोड दिएका छन् । ०७६/०७७ का लागि पनि नगरसभामा पुरानै ढर्रा र शैलीमा बजेट प्रस्तुत गरिएको देखिएको छ ।

पूर्वाधार विकासमा पछाडि परेको नगर क्षेत्रको सडक, नाला, विद्यालयको भौतिक संरचना निर्माण लगायतका लागि ठूलो परिमाणमा बजेट छुट्याइएको छ । जितपुरसिमरा उपमहानगरपालिकाले यस वर्ष झन्डै १ अर्ब २९ करोड रुपैयाँको अनुमानित आयब्यय प्रस्तुत गरेको छ ।

उपमहानगरपालिकाको तेस्रो नगरसभामा उपप्रमुख सरस्वती चौधरीले चालु र पुँजीगत तर्फ गरी १ अर्ब २८ करोड ८५ लाख ६६ हजारको बजेट प्रस्तुत गरिन् । बजेटअनुसार चालु खर्चतर्फ १६ करोड ९५ लाख र पुँजीगत खर्च तर्फ एक अर्ब ८९ करोड ६६ हजार रुपैयाँको बजेट तयार पारिएको छ ।

यसमा पूर्वाधार विकासतर्फ १३ करोड २९ लाख, सामाजिक विकासतर्फ ७ करोड ९८ लाख, आर्थिक विकासतर्फ ४ करोड ५१ लाख ५० हजार, सुशासन तथा सेवा प्रवाहतर्फ १ करोड ४३ लाख ५० हजार, वातावरण तथा विपद व्यवस्थापनतर्फ १ करोड ४० लाख, भूमि व्यवस्थापनतर्फ १ करोड, बाटो मर्मततर्फ १ करोड रकम विनियोजन गरिएको छ ।

उपप्रमुख चौधरीले प्रस्तावित योजना तथा प्रभावकारी कार्यान्वयनका लागि आवश्यक कार्ययोजना बनाएर अघि बढ्ने बताइन् । यस वर्ष पनि सडक सञ्जाल र शिक्षालाई प्राथमिकतामा जोड दिइएको जितपुरसिमरा उपमहानगरपालिका नगर प्रमुख कृष्ण पौडेल बताए । बहुआयामिक विकासको पहिलो प्राथमिकतामा रहेको सडकलाई फराकिलो बनाउने र स्तरोन्नति गर्ने कार्यलाई प्राथमिकतामा राखिएको उनले जिकिर गरे ।

त्यस्तै निजगढ नगरपालिकाले नगरसभाबाट ०७६/०७७ का लागि ७६ करोड ९७ लाख ४० हजार रुपैयाँको बजेट प्रस्तुत गरेको छ । चौथो नगर सभामा निजगढ नगरपालिकाकी उपप्रमुख लीलादेवी लामिछाने खनालले गरपालिकाको बजेट सहितको नीति तथा कार्यक्रम प्रस्तुत गर्दै संघीय सरकारबाट ५६ करोड १४ ला, प्रदेश सरकारबाट ४ करोड ३३ लाख ४० हजार, मालपोत रजिस्ट्रेसनबाट १ करोड ५० लाख र आन्तरिक आयबाट ११ करोड रुपैयाँको बजेट प्रस्तुत गरिन् ।

प्रस्तुत बजेटमा पूर्वाधार विकास तर्फ १५ करोड ८८ लाख, आर्थिक विकासतर्फ ३ करोड १६ लाख, सामाजिक विकास तर्फ ४ करोड १७ लाख, विपद व्यवस्थापन तर्फ १ करोड र संस्थागत विकास तर्फ २ करोड १५ लाख र चालु खर्च तर्फ ११ करोड ५० लाख ४० हजारको बजेट विनियोजन गरिएको जनाइएको छ ।

कृषि र पर्यटनका लागि सडक सञ्जाल अतिमहत्त्वपूर्ण रहेकाले यसपालि पनि पूर्वाधार विकासलाई प्राथमिकतामा राखिएको निजगढ नगरपालिकाका नगर प्रमुख सुरेशकुमार खनालले बताए । ‘पर्यटनको प्रचुर सम्भावना हामी कहाँ छ,’ उनले भने, ‘पर्यटकीय क्षेत्रको संरक्षण र संवर्द्धन गर्न नगरपालिका लागेको छ ।’ त्यसैले नगरसभाबाट पर्यटनमा सघाउ पुर्‍याउने पूर्वाधार विकासलाई जोड दिइएको उनले जानकारी दिए । त्यस्तै कलैया उपमहानगरपालिकाले ०७६/०७७ का लागि १ अर्ब २० करोड ६४ लाख रुपैयाँको बजेट प्रस्तुत गरेको छ ।

नगरसभामा बजेट प्रस्तुतीकरण गर्नु अगाडि उपप्रमुख रहिमा खातुन सहित केही वडाध्यक्ष, कार्यपालिका सदस्यले असन्तुष्टि जनाउँदै नगरसभाबाट बाहिरिएका थिए ।

उदघाटन सत्र सकेर उनीहरू नगरसभाबाट बाहिरिएपछि नगर सभा हाललाई स्थगित गर्नु परेको कलैया उपमहानगरपालिकाका प्रमुख प्रशासकीय अधिकृत हरिनारायण बेलवासेले बताए । ‘नगरसभा उदघाटन भइसकेको छ,’ उनले भने, ‘प्रस्तुत बजेटलाई क्रमशः छलफलमा लगेर २५ गते सम्म नगरसभा टुंग्याइन्छ ।’ स्थानीय तह सञ्चालन ऐनमा भएको व्यवस्थाअनुसार कोरम पुर्‍याएर प्रस्तुत बजेट पारित गरिने उनले जानकारी दिए ।

प्रकाशित : असार १३, २०७६ १०:१७
पूरा पढ्नुहोस्
प्रतिक्रिया
पठाउनुहोस्