सहिद परिवारलाई दुधालु भैंसी

मधेस आन्दोलन, जनआन्दोलन र माओवादी विद्रोहका क्रममा सहिद भएका र सख्त घाइते भएका परिवारलाई दुधालु भैंसी र गोठ सुधारका लागि ३० हजार मन्त्रालयले प्रदान गर्दै
अवधेशकुमार झा

राजविराज — प्रदेश २ को भूमि व्यवस्था तथा कृषि सहकारी मन्त्रालयले मधेस आन्दोलन, जनआन्दोलन र माओवादी विद्रोहका क्रममा सहिद भएका र सख्त घाइते भएका परिवारलाई दुधालु भैंसी वितरण गर्न सुरु गरेको छ ।

कृषिमन्त्री शैलेन्द्रप्रसाद साहले आइतबार राजविराज ९ मलेठस्थित सहिद स्मारक नजिक आयोजित कार्यक्रममा मधेस आन्दोलनका क्रममा भारदहमा भएका सहिद राजीव राउतकी श्रीमती नीलमलाई भैंसी हस्तान्तरण गर्दे उक्त कार्यको शुभारम्भ गरे ।

सहिद र घाइते परिवारलाई जीविकोपार्जनका लागि आर्थिक आर्जन गर्न भैंसी वितरण गरिएको मन्त्री साहले बताए । वितरण गरिएका भैंसी कम्तीमा पाँच लिटर र बढीमा ९ लिटरसम्म दूध दिने किसिमको रहेको छ । भैंसीसँगै मन्त्रालयले भैंसी पाउने परिवारलाई प्रतिपरिवार ३० हजार रुपैयाँसमेत वितरण गरिरहेको छ ।

भैंसीलाई राख्नका लागि गोठ सुधार तथा प्रारम्भिक चरणमा आहाराका लागि रकम दिने गरिएको मन्त्रालयका सचिव विजयचन्द्र झाले जानकारी दिए ।

आइतबार मलेठमा २० जनालाई उक्त भैंसी वितरण गरिएको छ भने सोमबार भारदहमा थप १४ भैंसी वितरण गर्ने कार्यक्रम रहेको छ । सप्तरी जिल्लामा १८ सहिद र १६ जना सख्त घाइतेका परिवारलाई भैंसी वितरण गर्ने योजना छ । मन्त्री साहका अनुसार सिरहामा ४, सप्तरीमा १८, धनुषामा ३, महोत्तरीमा ९, सर्लाहीमा ७, रौतहटमा ५, बारामा ५ र पर्सामा ७ गरी कुल ५८ सहिद परिवारलाई भैंसी वितरणको कार्यक्रम चालु आर्थिक वर्षमा रहेको छ ।

यसैगरी सिरहामा १४, सप्तरीमा १६, धनुषामा ५, महोत्तरीमा २, सर्लाहीमा ९, रौतहटमा ४, बारामा ४ र पर्सामा १० गरी कुल ६४ सख्त घाइते परिवारलाई पनि भैंसी वितरण गरिने मन्त्री साहले जानकारी दिए । वितरण गरिएका भैंसी तीन वर्षसम्म बेच्न नपाइने गरी सम्झौता गर्ने गरिएको पशुपक्षी विकास महाशाखा प्रमुख इन्द्रदेव साहले बताए ।

यसवर्ष प्रक्रियामा छुट भएकालाई अर्को वर्ष पनि वितरण गरिने मन्त्री साहले जानकारी दिए । ‘हामीले चाहेर पनि सहिद र घाइते परिवारका लागि धेरै गर्न सकिइरहेका छैनौं,’ मन्त्री साहले भने, ‘तर संघीयता प्राप्तिमा प्राणको आहुति दिने सहिद परिवार र आफ्नो जीवनको परवाह नगर्ने घाइते परिवारलाई सक्दो सहयोग गर्न प्रदेश सरकार प्रतिबद्ध छ ।’

मधेस आन्दोलनका सहिद परिवारलाई प्रदेश सरकारको पहिलो मन्त्रिपरिषदको निर्णयबाट एक परिवार एक रोजगारको सन्दर्भमा हरेक सहिद परिवारलाई नियुक्ति पत्र दिई सकिएको र व्यवस्थापन मिलाउने क्रममा रहेको मन्त्री साहले जानकारी दिए । प्रदेश सरकारले क्रमैसँग मधेस आन्दोलनका घाइते परिवारलाई आर्थिक सहयोग उपलब्ध गराइरहेको उनले जानकारी दिए ।

सहिदका बालबालिकाको अध्ययनका लागि प्रदेश सरकारले विशेष छात्रवृत्ति योजना ल्याएको जानकारी दिँदै मन्त्री साहले त्यसको सदुपयोग गर्न सबैमा आग्रह गरे । ‘सहिद परिवारको आँखामा आँसु आए त्यो हाम्रा लागि श्रापसरह नै हुनेछ,’ मन्त्री साहले भने, ‘त्यसैले सहिद परिवारलाई हरसम्भव सहयोग गर्न प्रदेश सरकार प्रतिबद्ध छ ।’

प्रकाशित : असार ९, २०७६ ११:०१
प्रतिक्रिया
पठाउनुहोस्
ADVERTISEMENT

आँपको मूल्य अकासियो

भरत जर्घामगर

सिरहा — आँपको मौसमसँगै बजारमा मूल्य अकासिएको छ । उत्पादनमा कमी आउँदा यसवर्ष भाउ महँगिएको हो । उत्पादन घटेसँगै कृषक मारमा छन् । एकातिर उत्पादन घटेको छ भने अर्कातिर बजारमा आँपको मूल्यमा वृद्धि भए पनि किसानले त्यस अनुसारको बजार भाउ पाएका छैनन् । 

लामो खडेरी, फूल लाग्ने समयमा मधुवा किराको प्रकोप र दाना लागिसकेपछि हावाहुरीले क्षतिको कारण यसवर्ष आँप उत्पादन घटेको कृषि प्राविधिकको भनाइ छ । आँपको प्रमुख संकलन केन्द्र मानिएको लहान बजारमा बम्बई र मालदह जातको आँप प्रतिकिलो ७० देखि १ सय २० रुपैयाँमा बिक्री वितरण भइरहेको छ ।

कृषि ज्ञान केन्द्र सप्तरीका अनुसार सिरहामा यसवर्ष ५ हजार ७ सय ५५ हेक्टर जग्गामा कृषकहरूले आँप खेती गरेका थिए । गतवर्ष त्यही जग्गामा ४३ हजार ९ सय ४५ मेट्रिक टन आँप उत्पादन भएको थियो । कार्यालयका कृषि अर्थविज्ञ किसुनदेव राउतले यसवर्ष त्यही जग्गामा २० प्रतिशत ८ हजार ७ सय ८९ मेट्रिक टनमात्र विभिन्न प्रजातिका आँप उत्पादन भएको छ ।

८० प्रतिशत उत्पादन घट्यो । सिरहा, सप्तरीमा उत्पादित आँप लहान बजारमा संकलन गरी काठमाडौं, पोखरालगायतका बजारसम्म पुग्ने गरेको थियो । तर यसवर्ष आँप उत्पादनमा कमी आउँदा स्थानीय बजारमैं खपत हुने भएकाले राजधानीलगायतका बजारमा यहाँका आँप व्यापारीले पुर्‍याउने सम्भावना कम रहेको कार्यालयको भनाइ छ ।

उता, आँपका थोक बिक्रेताले कृषकबाट सयकडाका दरमा खरिद गरी किलोग्राममा बिक्री गर्दा कृषकले भने सोचेजति आम्दानी लिन पाएका छैनन् । लहान बजारमा आँप बेच्न आएकी सप्तरी श्रीपुरकी पार्वती चौधरीले व्यापारीले तौलेर नलिईकन गोटाको सयकडा एक हजारदेखि १३ सय रुपैयाँ दरमा किन्ने गरेकाले आफूहरूले आम्दानी लिन नपाएको सुनाइन् । उनले डेढ बिघा जग्गामा आँप खेती गरेकी छन् । त्यत्ति जग्गामा ७० आँप बोट भए पनि यसवर्ष २५ बोटमा मात्र आँप फलेको सुनाइन् ।

सीमित मात्रामा बजारमा आँप आएकाले व्यापारीले सयकडाको दरले आँपको बिक्री गर्न मानेका छैनन् । लहान बजारस्थित संकलन केन्द्रका थोक बिक्रेता मनोज गुप्ताले मालदह आँप प्रतिकिलो १ सय २० रुपैयाँसम्म बिक्रीे भएको बताए । गतवर्ष लहान बजारमा ४० देखि ५० रुपैयाँ प्रतिकिलो बिक्री गरेको र यसवर्ष बजारमा आँप कमी आएकाले मूल्यमा केही उतारचढाव आएको उनले जानकारी दिए ।

गतवर्षको तुलनामा यो बिक्री दर मूल्य दोब्बरभन्दा बढी हो । सिरहा र सप्तरीलाई आँप खेतीको भण्डार मानिन्छ । सप्तरीमा यसवर्ष ६ हजारभन्दा बढी हेक्टरमा आँप खेती गरिएको थियो । सिरहा र सप्तरीका कृषकहरूले आम्रपाली, मालदह, बम्बई, दशहरी, कलकतिया जातका आँपको खेती गर्दै आएका छन् ।

प्रकाशित : असार ९, २०७६ १०:५९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT