रात्रि बसमा लुटपाट गर्ने आठ जना पक्राउ

लक्ष्मी साह

बारा — 'प्रहरीको सिआईबी टीम हौं' भन्दै पूर्व-पश्चिम महेन्द्र राजमार्गमा रात्रिबसमा लुटपाट गर्ने गिरोहलाई प्रहरीले पक्राउ गरेको छ । जितपुर सिमरा उपमहानगरपालिका-१६ टाँगिया बस्तीबाट आठ जनालाई प्रहरीले पक्राउ गरेको हो । 

सर्लाही हरिवन नगरपालिका-१० का दिलकुमार दोङ (स्कोर्पियो चालक), वडा ८ का विजय लामा, सिन्धुली हरिहरपुर गाउँपालिका-७, का टाइगर भन्ने सुनिल तामाङ, रौतहट गुजरामाई नगरपालिका-२, का ज्ञानबहादुर थिङ, काभ्रे महाभारत गाउँपालिका-२, का विशाल पाख्रिन पक्राउ परेका हुन् । यसैगरी महोत्तरीको साविक बागडा गाविस-५, घर भई हाल बर्दिवास नगरपालिका-११, बस्ने सन्तोष भन्ने रमेशकुमार यादव, सिन्धुली मरिन गाउँपालिका-५, घर भइ हाल बाराको निजगढ नगरपालिका-८, गुम्बा टोल बस्ने संघर्ष थिङलाई पक्राउ गरिएको हो । संघर्षलाई निर्माणाधीन फास्ट ट्रयाकमा ज१२प ४६८० नम्बरको बाइक लिएर अलमल गर्दैगर्दा घटनास्थलमा तत्कालै पुगेका प्रहरी टोलीले पक्राउ गरेको थियो ।

संघर्ष पक्राउ पछि लुट्ने योजनासहित लुटपाटमा संलग्न सबैको नाम ठेगाना खुलाएपछि अरु सात जनालाई प्रहरीले पक्राउ गरेको जनाएको छ । पथलैयामा बसेर लुट्ने योजना बनाइएको पक्राउ परेका गिरोहले प्रहरीसमक्ष बयान दिएका छन् । उक्त रात्रि बसमा काठमाडौंबाट सुन आउँदै छ भनी बर्दिवासका रमेशकुमार यादवले जानकारी पाएपछि टिम तयार गरी लुट्ने योजना बनाएको प्रहरी नायव उपरीक्षक राठौरले बताए । पथलैयामा बसेर योजना बनाएपछि तिनीहरुले सिमरा पुगेर बा१७च ४८७६ नम्बरको स्कोर्पियो भाडामा लिएर रात्रि बसलाई पथलैयाबाट पिछा गर्दै त्यहाँ लुटपाट गर्न पुगेका थिए । लुटपाटमा प्रयोग गरेका भाडाका स्कोर्पियोसमेत प्रहरीले बरामद गरिसकेको छ ।

शुक्रबार बिहान ३ बजे राजमार्गको निजगढ र पथलैयाबीचको १३ किलोमिटर जंगलमा काठमाडौंबाट महोत्तरीको जलेश्वरतर्फ जाँदै गरेको ना७ख २७९० को रात्रि बसमा बा१७च ४८७६ नम्बरको स्कोर्पियोसहित २ वटा मोटरसाइकलमा गएका ८ जनाको गिरोहले लुटपाट गरेका थिए । लुटेराको कुटाइबाट बस चालक गणेश भुसाल र सहचालक सञ्जयकुमार उपाध्याय सामान्य घाइते भएका छन् । सहचालकबाट ४८ हजार २ सय नगद र मोबाइलसमेत लुटिएको छ ।

पक्राउ परेका सबै जना कलैयास्थित जिल्ला प्रहरी कार्यालयको हिरासतमा छन् ।

प्रकाशित : जेष्ठ १९, २०७६ १९:००
प्रतिक्रिया
पठाउनुहोस्
ADVERTISEMENT

बालबालिकाको त्रास हटाउन कक्षा

हुरी प्रभावित १६ वटा गाउँमध्ये १० गाउँमा बालमैत्री स्थल बनाएर उनीहरुलाई मनोपरामर्श दिनुको साथै खेलकुद र मनोरञ्जनको माध्यमले त्रास भुलाउने प्रयास
लक्ष्मी साह

बारा — हुरीको चपेटामा परेका बालबालिकाको त्रास हटाउन हुरी प्रभावित क्षेत्रमा १० वटा बालमैत्री स्थल सञ्चालन गरिएको छ । एक दातृ निकायको सहयोगमा हुरी प्रभावित १६ वटा गाउँमध्ये १० गाउँमा १० वटा बालमैत्री स्थल बनाएर उनीहरूलाई मनोपरामर्श दिनुको साथै खेलकुद र मनोरञ्जनको माध्यमले विपद् भुलाउने कक्षा सञ्चालन भइरहेको छ । 

बाराको फेटा गाउँपालिका–१, भलुहीमा त्रास हटाउन सञ्चालन गरिएको कक्षामा सहभागी झन्झावात प्रभावित बालबालिका । तस्बिर : लक्ष्मी/बारा

कक्षामा प्रोजेक्टरमार्फत कार्टुन, भिडियो तथा कथा सुनाउँदै उनीहरूलाई भुलाउने काम गरिएको छ । परवानीपुर, प्रसौनी, भलुही, भरबलीया, मनगढवा, पुरैनियामा कक्षा सञ्चालन गरिएको छ । प्रत्येक बालमैत्री स्थल (कक्षा) मा ५ वर्षमाथि र १४ बर्ष मुनिका १ सयदेखि १ सय ५० बालबालिका छन् ।

कक्षा संचालन गर्न २० जना महिला र पुरुष सहजकर्ता परिचालन गरी परिवारिक वातावरणमा कक्षा सञ्चालन गरिँदैछ । ‘विपद्पछि बालबालिकामा दीर्घकालीन मानसिक असर पर्न नदिन कक्षा संचालन गरिएको छ, यसले विपद्को त्रास हटेर परिवारिक बातावरणमा घुलमिल हुन सघाउ पुग्छ,’ बालमैत्री कक्षा सञ्चालन गर्ने सामाजिक संस्था ‘संरक्षण नेपाल’ का अध्यक्ष बृजमोहन कुसवाहाले भने, ‘बालबालिकालाई टेन्टमा राखेर ३ महिनासम्म कक्षा सञ्चालन गरिनेछ ।’

भीषण हुरीको चपेटामा २९ जनाको ज्यान गएको थियो, जसमध्ये ६ बालबालिकाले ज्यान गुमाएका थिए । पचासौं बालबालिका घाइते भएका थिए । कतिपयले अभिभावक गुमाएका थिए । ‘विपद्ले बालबालिकालाई जोखिममा पारेपछि बालमैत्री कक्षा संचालन गरी खेलकुद र मनोरञ्जन दिएका छौं,’ कुसवाहाले भने, ‘यसले उनीहरूको मानसिक अवस्थासन्तुलित रहन सहयोग मिल्छ ।’

प्रत्येक दिन कम्तीमा ३ घण्टा बालमैत्री स्थलमा राखेर कक्षा सञ्चालन गरिएको छ । हुरीले झन्डै दुई हजार घर भत्किएकाले सयौं बालबालिकाहरूको कापी, किताब, कलम, खेलकुदलगायतको सामाग्री हराएपछि उनीहरूलाई मानसिक विचलन आएको थियो । ‘दातृ निकायको सहयोगमा कक्षा संचालन गरी बालबालिकाको पीडा भुलाउँदै छौ,’उनले भने, ‘विस्तारै विपद् भुल्दै छन् ।’

उनका अनुसार कतिपय बालबालिकाले अभिभावक गुमाउँदा अहिले पनिमानसिक पीडामा छन् । ‘बालबालिकाहरूले बास गुमाएपछि समस्यामा परेका छन्,’ उनले भने, ‘सबैलाई एकता गरी कक्षा सञ्चालन गरेका छौं ।’

प्रकाशित : वैशाख १६, २०७६ ०९:३६
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×