श्रीमतीले छल गरेपछि....

शाहीमान राई

जनकपुर — तराई मधेसमा दाइजो, बालविवाह, अनमेल विवाह, कुटपिट जस्ता महिलामाथि घरेलुहिंसाका समाचार सुन्ने गरिएको छ । तर महिलाले पुरुषलाई हिंसा गरेको समाचार प्रायः आउँदैन । महिला हिंसाविरुद्ध सामाजिक अभियान व्यापक भएपछि पुरुषमाथिको हिंसा ओझेलमा परे पनि महिलाले पुरुषलाई हिंसा गरेको प्रतिनिधि घटना सार्वजानिक हुन थालेका छन् ।

प्रदेश २ को केन्द्र जनकपुरका एक जना युवालाई सासु ससुरा र श्रीमती मिलेर उठिबास लगाएको घटना सार्वजनिक भएको छ । जनकपुरधाम उपमहानगरपालिका–५ मालीटोलका ४६ वर्षीय विजय साहले आफ्नो पुर्ख्यौली घर जग्गा र नगद समेत ससुरालीले एकलौटी बनाएर घरबाट बाहिर निकालेपछि मात्र उठिबास लगाएको थाहा पाएको बताए ।

डिभी चिठ्ठा परेर २४ वर्षदेखि अमेरिका बस्दै आएका साहको पुर्ख्यौली १३ धुर जग्गामा बनेको घर र अंशमा परेको एक कठ्ठा जमिन ससुरालीले जालझेल गरेर आफ्नो नाममा मालपोत रजिष्ट्रेसन पास गरेको खुलासा गरेका छन् । सन १९९५ मा अमेरिका गएका साहले १५ वर्षअघि छिमेकी वृजनन्दन प्रसाद साह र मन्जुदेवी साहकी छोरी सरिता साहसित मागी विवाह गरेका थिए ।

उनका अनुसार विवाह गरेपछि केही वर्ष आमा गुलावदेवी र श्रीमतीलाई सँगै छाडेर अमेरिका गएका बेला पत्नी सरिताले घरजग्गा आफ्नो नाममा पास गरिदिन दबाब दिन थालिन् । बाबुको मृत्युपछि आमा गुलावदेवीको नाममा नामसारी भइआएको कित्ता नं १८६ को पुर्ख्यौली घरजग्गा र अंशबापत पाएको जनकपुरधाम उपमहानगरपालिका ४ स्थित परिक्रमा सडक छेउको एक कठ्ठा जमिन
आफ्नो नाममा पास गरिदिन दवाव दिदै आएकी थिइन् ।

बुहारीको दवाव थेग्न नसकेर अमेरिकामै बस्दै आएका आमा गुलावदेवीले २०६८ असार २१ गते धनुषा जिल्ला अदालतको पत्रअनुसार अमेरिकाको वासिङटनडिसिस्थित नेपाली राजदुतावासका राजदुत डा.शंकरप्रसाद शर्मामार्फत प्रमाणित गराई विजयको पत्नि सरिता साहको नाममा कित्ता नं १९६ कोघरजग्गाको अधिकृत वारेसनामा दिएकी थिइन् ।

तर सरिताले सोही वारेसनामाको आधारमा २०६८ चैत २२ गते आफ्नो श्रीमान् विजय, दुई जना जेठाजु रामलाल साह र श्रीराम साहसमेतको अंशमा हक लाग्ने कित्ता नं १८६ को १३ धुरजग्गा र श्रीमान विजयको नामको एक तले घरसहितको एक कठ्ठा जमिन बाबु वृजनन्दन प्रसाद साह र आमा मन्जुदेवी साहको नाममा मालपोत रजिष्ट्रेसन पास गरिदिएको पीडित साहले मंगलबार पत्रकार सम्मेलन गरीआफ्नो वेदना सुनाए ।

मालपोत कार्यालयको जग्गा राजिनामाको तमसुक अनुसार सरिताले सासुको घरजग्गा दश लाख ६० हजार रुपैयाँमा आफ्नै बाबुलाई बिक्री गरेको देखिन्छ । तर उक्त जग्गाको बजारमूल्य प्रतिधुर २५ लाख रुपैयाँका दरले तीन करोड २५ लाख रुपैयाँ पर्छ । अर्को जनकपुरको परिक्रमा सडकले छोएको घरसहित एक कठ्ठा जमिनको मुल्य ५ करोडरुपैयाँ पर्ने उनका दाजु रामलाल साहले बताए ।

पछिल्लो समय श्रीमती सरिता, दश वर्षीय छोरा आदित्य साह र अर्को छोरा ८ वर्षीय अंकित साहसहित अमेरिकामै बस्दै आएको विजय साहले बताए । पााच दिनअघि पूर्ख्यौली घरजग्गा आफ्नो नाममा नामसारी गर्न अमेरिकाबाट पारिवारिक सल्लाहअनुसार ससुराली घर आइपुग्दा ससुरालीले बासै नदिएपछि छाँगाबाट खसेजस्तो भएको बताए ।

उनलाई ससुरा वृजनन्दन, सासु मन्जुदेवी, श्रीमतिका भाइहरू राजेश र दीपक साहले कुटपीट, दुरव्यवहार समेत गरेको सुनाए । ससुराली पुग्दा सासु ससुराले विजयको सम्पूर्ण घरजग्गा छोरीबाट आफूले किनेको जवाफ दिएपछि आफूलाई उठिवास लगाएको महसुस गरेको पीडित विजय साहले बताए । ‘उनी अमेरिका जानुअघि पतिको सबै चलअचल सम्पति आमाबाबुलाई रजिष्ट्रेसन पास गरिदिएकी रहिछन्,’ पीडित साहले भने, ‘जग्गाजमिन आफ्नो नाममा पास गरेर फर्किनका लागि मलाई श्रीमतीले नै पठाएको हो, तर यो के भइरहेको हो बुझ्नै सकेको छैन ।’

अमेरिकामा ट्रक चालकको काम गर्दै आएका साहले २४ वर्षको बसाइमा ससुरालीलाई १५ लाख रुपैयाँभन्दा बढी नगद पनि दिएको बताए । यसवाहेक अमेरिकामा तीन लाख डलर (करिब साढे तीन करोड रुपैंयाँ) मा एक तले घर किनेको बताए । त्यही घरमा श्रीमती र छोराहरू बस्दैछन् । तर ससुरालीको कुटाइ र दुर्व्यवहारपछि श्रीमतीले सम्बन्धविच्छेद माग्न थालेको विजय साहले बताए ।

‘अमेरिकी कानुनअनुसार सम्बन्धविच्छेद मागेपछि भइहाल्छ, तर ५० प्रतिशत सम्पत्ति पनि दिनुपर्ने हुन्छ,’ पीडित साहले भने, ‘विदेशमा धेरै दुःख गरें, अहिले घर न घाटको भएँ, सबै सम्पत्ति ससुरालीले लिए, अर्कोतिर श्रीमती पनि पारपाचुके माग्दैछिन् ।’ यतिबेला श्रीमतीसित सम्पर्क समेत हुन नसकेको बताए । ‘मेरो आइफोन खोसिएपछि अर्को सेटवाट सम्पर्क गर्दा सम्पर्क हुन सकेको छैन,’ उनले भने, ‘अब मसित सम्पत्तिकोनाममा पासपोर्ट बाहेक केही छैन ।’

सगोलमा रहेको पुर्ख्यौली जमिन पत्नी सरिताले बाबुआमालाई राजीनामा पास गरिदिएपछि दाजुहरू रामलाल र श्रीरामसित सम्बन्ध बिग्रिएको छ । उनीहरूले आमाको नामको जग्गा तीन भागमा एक एक भाग पाउनुपर्ने माग गर्दै आएका छन् ।

प्रकाशित : वैशाख १६, २०७६ ०९:३४
ADVERTISEMENT
ADVERTISEMENT
प्रतिक्रिया
पठाउनुहोस्

योजना सकियो, सडक अधुरै

स्थानीय तहमा जनप्रतिनिधि आएपछि सहरलाई सुन्दर बनाउन गरिएको प्रयास सकारात्मक भए पनि सडकको दयाँबायाँका घर तथा जग्गा खाली गर्न नसक्दा ठेकेदार कम्पनीका लागि तस्रोपटक थप गरिएको म्याद पनि गज्रिएको छ
शाहीमान राई

जनकपुर — एसियाली विकास बैंकको ऋण सहयोगमा जनकपुरधाम उपमहानगरपालिका एकीकृत सहरी विकास परियोजनाअन्तर्गत सडक विस्तार, कालोपत्रे र फुटपाथ निर्माण पूरा नहुँदै ठेकेदारसितको सम्झौता म्याद सकिएको छ । 

ठेकेदारसित अन्तिमपटक थप गरिएको म्याद सकिएपछि अधुरो रहेको जनकपुरको शिवचोकदेखि कदमचोकसम्मको सडक खण्ड । तस्बिर : शाहीमान/कान्तिपुर

ठेकेदार रमण कन्स्टक्सन कम्पनीलाई तेस्रोपटक २९ मार्च २०१९ सम्मका लागि थपिएको म्याद गुज्रिएपछि अन्तिम चरणमा निर्माणाधीन आयोजना अधुरो रहेको हो । जनकपुरधाम उपमहानगरपालिकाले निर्माणस्थलमा जग्गा र घरधनीसित बरण्डा भत्काउने, दायाँबायाँ सडकलाई जग्गा छोडने विषयमा विवाद समाधान गर्न नसकेपछि थपिएको म्याद गुज्रिएको हो । म्याद गुज्रिएपछि ठेकेदार कम्पनीले मार्च महिनासम्म काम गरेवापतको रकम भुक्तानीका लागि अन्तिमचरणको प्राविधिक मुल्यांकन भइरहेको जनकपुरधाम उपमहानगरपालिकाका इन्जिनियर वीरेन्द्रकुमार यादवले बताए ।

जनकपुरधाम उपमहानगरपालिका क्षेत्रलाई सफा, सुन्दर, आकर्षक, रमणीय, धार्मिक, सांस्कृतिक तथा पर्यटकीय सहर बनाउने लक्ष्यका साथ निर्माणाधीन सडक विस्तार कालोपत्रे आयोजना सम्झौताअनुसार अधिकांश निर्माण पूरा भए पनि अन्तिमचरणमा केही ठाउँमा विवाद कायमै रहेकाले अधुरो हुन पुगेको छ ।

एकीकृत सहरी विकास आयोजना अन्तर्गत निर्माणाधीन सडक विस्तार, ग्राभेल, कालोपत्रे, ढल निकासका लागि ड्रेन निर्माण, टेलिफोन, इन्टरनेट, खानेपानी र विद्युत लाइन मर्मतसम्भार ९५ प्रतिशतभन्दा बढी पूरा भइसकेको इन्जिनियर यादवले बताए ।

जनकपुरको शिवचोकदेखि कदमचोकसम्म जग्गा विवादको कारण करिब ५० मिटर सडक कालोपत्रे गर्न नसकेको ठेकेदारकम्पनी रमण कन्स्ट्रक्सनका साइड इन्चार्ज इन्जिनियर अवधकिशोर साहले बताए । सडकमा ढल निकासको निम्ति ह्युमपाइप विस्तार गरी ड्रेन नाली निर्माण भइसकेको छ । उनका अनुसार पीडारीचोक, भानुचोक, मुरलीचोक, रमानन्द चोक, जानकीमन्दिर लगायत विभिन्न ठाउँमा उपमहानगरपालिकाले साइड क्लियरेन्स (विवाद समाधान) गर्न नसकेपछि करिब ५ सय मिटर फुटपाथ निर्माण पूरा हुन सकेको छैन ।

एसियाली विकास बैंकको १ अर्ब ९० करोड (१९ दशमलव ४४ मिलियन डलर) आर्थिक सहयोगमा निर्माणाधीन जनकपुर उपमहानगरपालिका एकिकृत शहरी विकास परियोजना सुरुदेखि नै जग्गा विवाद, नक्सा, मुआब्जा, क्षतिपूर्ति, राहत, पुनःस्थापना लगायत विभिन्न बहानामा निर्माण सम्पन्न गर्न ढिलाईं भएको थियो ।

सडक विस्तारको क्रममा उत्पन्न बाधा, अवरोध र विवाद जनकपुरधाम उपमहानगरपालिकाले समयमा समाधान गर्न ढिलाई भएपछि ठेकेदार जेडआइपिसी शर्मा, रमन कन्स्ट्रक्सन कम्पनीले अन्तिम चरणको निर्माण कार्य पूरा गर्न नसकेको जनाएको छ । जनकपुर उपमहानगरपालिका, एसियाली विकास बैंक र ठेकेदार जेडआइपिसी रमन कन्स्ट्रक्सन कम्पनीबीच ५ डिसेम्बर २०१८ सम्म परियोजना पूरा गर्ने दोस्रो सम्झौताको म्याद समेत गुजारेपछि तेश्रो म्यादथपिएको थियो ।

एयिाली विकास बैंकको आर्थिक सहयोगमा सञ्चालित एकिकृत शहरी विकास आयोजना अन्तर्गत ३१ किलोमिटर ह्यूमपाइप विस्तार ड्रेन निर्माण, ढल निकास, ३० मिटर चौडाईको ९ दशमलव ५ किलोमिटर सडक कालोपत्रे गर्नुपर्नेमध्ये शिवचोकदेखि कदमचोकसम्म ५० मिटर अधुरो छ ।

उपमहानगरपालिका क्षेत्रको परिक्रमा भित्र पिडारीचोकदेखि थापाचोक, बन्सिचोक, मिल्सएरिया रेलवेस्टेसन, भानुचोक, कदमचोक, मुरलीचोक हुँदै जिरोमाइलसम्म, एयरपोर्टदेखि मुरलीचोक, तिरहुतियागाछी, रामचोक जनकचोक, शिवचोक हुँदै भानुचोकसम्म, रेलवेस्टेसनदेखि जलाध खोलासम्म सडक विस्तार, ग्राभेल, कालोपत्रे, सरसफाइ, ढल निकासका लागि हुमपाइप जडान ड्रेन निर्माण, फुटपाथ, टेलिफोन, खानेपानी र विद्युत लाइन मर्मतसम्भार गरिएको छ ।

सडक पेटी दाँयाबाँया पैदलयात्रीको लागि निर्माण गर्नुपर्ने ३८ हजार वर्गमिटरमध्ये ३७ हजार वर्गमिटर फुटपाथ निर्माण पूरा भइसकेको ठेकेदार कम्पनीका इन्जिनियर साहले बताए ।

परियोजना निर्माणको लागि ठेकेदार जेडआइपिसि रमण कन्स्ट्रक्सन कम्पनी संयुक्तसित एक अर्ब १५ करोड रुपैयाँमा ठेक्का सम्झौता छ । त्यसमध्ये करिब एक अर्ब १२ करोड रुपैंयाँ भुक्तानी पाइसकेको कम्पनीका इन्जिनियर अवधकिसोर साहले बताए ।

सन् २०१५ मा सम्झौता भई २०१६ मा परियोजना शुरु भएको त्यसअवधिको मूल्य समायोजन गरी कुल रकम एक अर्ब २५ करोड रुपैयाँ ठेकेदारलाई भुक्तान दिनुपर्ने भएको उपमहानगरपालिकाका इन्जिनियर वीरेन्द्र यादवले बताए ।

उपमहानगरक्षेत्रमा सडक विस्तार भएपनि जनकपुर उपमहानगर क्षेत्रको फोहर मैला व्यावस्थापनको निम्ति सेनिटरी ल्याण्डफिल्डसाइडको जग्गा व्यावस्थापनको निम्ति गुठी संस्थानसित सम्झौता गरी भाडामा लिएको जग्गामा स्थानीयवासीको अवरोध र विवाद भएपछि जग्गा व्यावस्थापन गर्न नसक्दा विनियोजित ६० करोड रुपैयाँ फिर्ता भएको छ ।

अन्य रकम विद्युत पोल तार विस्तार मर्मतसम्भार एक करोड ४७ लाख, ५ प्रतिशत कन्टिन्जेन्सी, कन्सल्टेन्ट, कार्यालय व्यवस्थापन र कर्मचारी तलवमा खर्च भएको आयोजनाले जनाएको छ ।

उपमहानगर क्षेत्रमा शहरी विकास तथा भवन निर्माण विभागले समेत ८३ करोड रुपैंयाँ लगानीमा सडक विस्तार, ग्राभेल, कालोपत्रे, ड्रेन, ढल, नाला, कल्भर्ट निर्माण गरेको छ । रामचोकदेखि तिरहुतियागाछी, महावीर चोक, जानकीमन्दिर, जनकचोक क्षेत्रमा निर्माणाधीन २१ किलोमिटर सडक विस्तार, ग्राभेल, कालोपत्रे र ह्यूमपाइप विस्तार ड्रेन निर्माण गर्नुपर्नेमध्ये २ किलोमिटर सडक कालोपत्रे र २१ किलोमिटर ड्रेन निर्माण गरिसकेको छ । सडक विस्तार र ड्रेन निर्माणको लागि ३० मिटर चौडाइकोसडक दायाँ बायाँ दुई हजारभन्दाबढी घरटहरा भत्काएर पुननिर्माण
भइरहेका छन् ।

भत्काइएका निजीघर सर्वसाधारण आफ्नै लगानीमा पुननिर्माण गर्दैछन् । सडक विस्ताको क्रममा भत्काइएका घरजग्गाको मुआब्जा, क्षतिपूर्ति वा राहत केही नदिइएकाले उपमहानगरपालिकाप्रति पीडित सर्बसाधारणले गुनासो गर्दै आएका छन् । उपमहानगरपालिकाले मुख्य सडकको चौडाइ तीस मिटर, सहायक सडक २० मिटर, पूराना बजारको सडक १५ मिटर, १३ मिटर, ९ मिटर कायम गरेको छ ।

जनकपुर उपमहानगरपालिकालाई अव्यवस्थित शहरीकरण गरी स्वच्छ, सफा, सुन्दर, आकर्षक पर्यटकीयस्थलको रुपमा विकास गर्ने लक्ष्य पूरा हुने जनकपुर उपमहानगरपलिकाका उपप्रमूख रिताकुमारी मिश्रले बताइन् ।

प्रकाशित : वैशाख ८, २०७६ ०९:४१
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×