लहानमा धार्मिक पर्यटन- प्रदेश २ - कान्तिपुर समाचार
कान्तिपुर वेबसाईट
AdvertisementAdvertisement

लहानमा धार्मिक पर्यटन

कान्तिपुर संवाददाता

सिरहा — ऐतिहासिक तथा पुरातात्त्विक सम्पदाका कारण लहान नगरपालिका पर्यटकीय क्षेत्रका लागि जिल्लामै सम्पन्न नगरपालिकामा परिणत भएको छ । नगरपालिकाका अधिकांश वडामा पर्यटकीय क्षेत्र छन् । ती पर्यटकीय क्षेत्रका कारण लहान नगरपालिका पर्यटनका लागि सम्भावित नमुना नगरक्षेत्र बनेको हो । 

नगरपालिकाको १२ नम्बर वडा सलहेश फूलबारी, १५ मा राजदेवी स्थान, १६ नम्बर वडामा अवस्थित काभ्रे महादेवस्थल, १७ मा देवीदह, १८ मा पकडिया गढ, २० मा ब्रम्हाण फूलबारी, २४ मा मानिक दह र खपटेडाँडा लगायत ऐतिहासिक, धार्मिक पर्यटनस्थल लहान नगर क्षेत्रभित्र छन् ।


नगरपालिकाको १६ नम्बर वडास्थित चुरे क्षेत्रको ओडारभित्र रहेको काभ्रे महादेव स्थललाई दोस्रो हलेसीका रूपमा लिइन्छ । काभ्रेपानी महादेवस्थल ओडारभित्र प्राकृतिक रूपमा उत्पत्ति भएको शिवलिङ र त्यसमाथि गाईको थुन जस्तो ओडारभित्रको छत छ । धार्मिक क्षेत्रका रूपमा मान्यता पाएकाले काभ्रे महादेवस्थलसम्म पुग्नकै लागि सडक डिभिजन कार्यालयले बाटोमा दुई वटा पुल निर्माण कार्य गरिसकेको छ ।


पूर्वप्रधानमन्त्री माधव कुमार नेपालको नेतृत्वको सरकारले घोषणा गरेको बृहत् सलहेश पर्यटकीय क्षेत्रअन्तर्गतका सलहेश फूलबारी, पकडियागढ, देवीदह र ब्रम्हाण फूलबारी सांस्कृतिक सम्पदाभित्र सूचीकृत गरिसकिएको छ । ती सबै स्थानहरू राजा सलहेशको गाथासँग सम्बन्धित छन् । ती स्थानको बृहतर विकासका लागि रणनीति बनाइसकिएको छ ।


यसैगरी, नगरपालिकाको १५ नम्बर वडामा अवस्थित राजदेवी माताको मन्दिर भाकल पूरा गर्ने भगवती देवीस्थानको रूपमा परिचित छ । उक्त मन्दिरमा वैशाख पूर्णिमाका दिन बोकाको बली चढाए भाकल पूरा हुने विश्वासका कारण एकै दिनमा १० हजारभन्दा बढी बोकाको बलि दिइन्छ ।


‘यी सबै ऐतिहासिक तथा पुरातात्त्विक स्थलहरू एउटै नगरपालिकामा हुनु नै धार्मिक पर्यटनको लागि सम्पन्नताको सूचक हो’, नागरिक समाजका अगुवा राजकुमार राउत कुर्मीले भने, ‘अब लहान नगरपालिकाले यी सबै ऐतिहासिक स्थलहरूको विकास गर्न सक्यो भने यो नगरपालिका पर्यटकीय क्षेत्रका रूपमा समृद्ध नगरपालिका हुन सक्छ ।’


उनले ऐतिहासिक तथा पुरातात्त्विक सम्पदाको विकास, सम्पदा संरक्षण र प्रवर्द्धनका लागि नगरपालिकाले एकीकृत गुरुयोजना तयार गरेर अगाडि बढ्न जरुरी रहेको सुझाए ।


धार्मिक पर्यटन प्रवर्द्धन गर्न महोत्सव

यसैबिच लहान नगरपालिकाले धार्मिक पर्यटकीय स्थलका रूपमा विकसित हुँदै गएको लहानको आर्थिक र सामाजिक उत्थानको लागि महोत्सवको आयोजना गर्ने भएको छ । धार्मिक पर्यटनका लागि ऐतिहासिक र पुरातात्त्विक महत्त्वको स्थल यस क्षेत्रमा रहेकाले ऐतिहासिक धार्मिक पर्यटकीय स्थलहरूलाई रष्ट्रिय स्तरमा पहिचान दिलाउनका लागि चैत २५ देखि वैशाख १० सम्म महोत्सवको आयोजना गर्न लागिएको नगरपालिकाले जनाएको छ ।


‘हाम्रो लहान, समृद्ध लहान, पर्यटन सहितको सुन्दर नगर निर्माण गर्ने हाम्रो अभियान’ भन्ने नाराका साथ सुरु गर्न लागिएको महोत्सवमा आर्थिक, सामाजिक, सांस्कृतिक, पर्यटन र कृषि क्षेत्रलाई प्राथमिकतामा राखिएको छ ।


५० करोडभन्दा बढीको व्यापार हुने अपेक्षा राखिएको महोत्सवबाट उठेको रकम पर्यटन क्षेत्रमा लगानी गर्ने नगरपालिकाले जनाएको छ ।

प्रकाशित : माघ १६, २०७५ ११:०८
प्रतिक्रिया
पठाउनुहोस्

स्कुले विद्यार्थीले सुनाए लक्ष्य

पवन यादव

सिमरा — बाराको जितपुर सिमरा उपमहानगरपालिका १५ सुन्दरवस्तीस्थित रहेको एक्स–सर्वीसमेन चिल्ड्रेन एकेडेमीका विद्यार्थीले विद्यालयमा भर्ना भएसँगै लक्ष्य लिएर अध्ययन सुरु गर्छन् ।

विद्यालयमा अध्ययनरत कलिला उमेरका विद्यार्थीले भविष्यमा के बन्ने लक्ष्य सोमबार एक कार्यक्रममा सार्वजनिक गरे । विद्यालयमा आयोजित नागरिक अभिनन्दन तथा विद्यालय भवन उदघाटनमा उनीहरूले आआफ्नो लक्ष्य सार्वजनिक गरेका हुन् ।

सोही विद्यालयमा कक्षा १ मा अध्यनरत छात्रा चाहना तामाङको लक्ष्य अरूभन्दा फरक छ । उनी पढेलेखेर सबैको राजाइ जस्तो डाक्टर, इन्जिनियर बन्न चाहदिनन् । ‘म ठूलो भएर नेपालको पहिलो महिला प्रधानमन्त्री बन्न चाहन्छु,’ उनले भनिन्, ‘यही एम लिएर अघि बढ्दै छु ।’

चाहनाको जटिल लक्ष्य सुनेर कार्यक्रममा उपस्थित सबै अतिथि सहभागी आश्चर्यमा परेका थिए । यति कम उमेरमा प्रधानमन्त्री बन्ने उनको धोको कसरी पूरा हुने हो ? सबै अतिथि सहभागिलाई चिन्तित बनायो ।
उनी मात्र होइन, उनी जस्तै उनका सहपाठीहरूले पनि ठूलो भएर आ आफ्नो लक्ष्य सार्वजनिक गरेका थिए । कक्षा १ मा अध्यनरत विद्यार्थी अनिन्ध साहको लक्ष्यले पनि सबैलाई स्तब्ध बनायो । सामान्य परिवारमा जन्मेका अनिन्धलाई मुकेस अम्बानी, बिनोद चौधरी जस्तै विश्व प्रख्यात बिजनेस म्यान चाहना उनको छ ।

‘पढेलेखेर ठूलो भई विश्व प्रख्यात बिजनेस म्यान बन्छु,’ उनले भने, ‘बिजनेस म्यान बनेर देशको अर्थतन्त्र मजबुत पार्छु ।’ उनको लक्ष्य सुनेर सहभागी अथितिले शुभकामना समेत दिए ।

उनीहरू जस्तै केहीले फोग्राफर, फिल्म डाइरेक्टर, कोरियोग्राफर, डाक्टर, इन्जिनियर, सगीतकार, पाइलट, पुलिस अफिसर, क्रिकेटर, फुटबल खेलाडी, न्युज रिपोर्टर, वैज्ञानिक, सामाजिक कार्यकर्ता लगायत बन्ने लक्ष्य सार्वजनिक गरेका थिए ।

उक्त विद्यालयमा अध्ययनरत युकेजी कक्षामा अध्ययनरत विद्यार्थीदेखि २ कक्षमासम्म अध्ययनरत १२ जना विद्यार्थीले भविष्यमा ठूलो भएर बन्ने लक्ष्य सार्वजनिक गरेका थिए । अहिलेदेखि नै विद्यार्थीले निधो गरेको लक्ष्य भविष्यमा पूरा होस् भन्दै नेपालका लागि भारतीय राजदूत मंजित सिंह पुरीले शुभकामना दिए । ‘हामीले स्कुलमा पढदा अहिलेका विद्यार्थी जस्तो लक्ष्य निर्धारण गर्न सकेका थिएनौं,’ उनले भने, ‘बच्चाहरूको स्पीचले आफूलाई बाल्यकालको सम्झना गरायो ।’ उनीहरूको लक्ष्य प्राप्तिका लागि अभिभावक र शिक्षक दुबैले समयमै ध्यान दिएर सहयोग गर्नुपर्नेमा उनले जोड दिए ।

राजदुत पुरीले नेपाल र भारतको सम्बन्ध भावनात्मक सम्बन्ध नभई बेटीरोटीको सम्बन्ध भएको बताए । ‘नेपालको अन्य क्षेत्रभन्दा यस क्षेत्रको भविष्य उज्वल छ,’ उनले भने, ‘यो क्षेत्र अर्थतन्त्रको हब बन्दै गएको छ ।’ अर्थतन्त्रले नै देशको भविष्य निर्धारण गर्ने गरेको उनको भनाइ थियो ।

वद्यालयका प्रिन्सिपल शंकर गुरुङको अध्यक्षतामा भएको कार्यक्रममा वीरगन्जस्थित भारतीय महावाणिज्यदूतावासका महावाणिज्य दूत रमेश चतुर्वेदी लगायतको उपस्थिति थियो । उक्त अवसरमा विद्यार्थीले गोर्खाली सेनाको पीडालाई चित्रण गर्ने नाटक, अतिथि सम्मानमा परेड समेत प्रस्तुत गरेका थिए ।

प्रकाशित : माघ १६, २०७५ ११:०५
पूरा पढ्नुहोस्
प्रतिक्रिया
पठाउनुहोस्
×