प्रदेश प्रहरी ऐनप्रति गृहमन्त्री असन्तुष्ट

केन्द्र–प्रदेश सरकारबीच विमति
अजित तिवारी

जनकपुर — प्रदेश २ सरकारले प्रहरी ऐन ल्याएपछि सर्लाही पुगेका गृहमन्त्री रामबहादुर थापाले त्यसप्रति असन्तुष्टि जनाए । प्रदेश सरकारले प्रदेश प्रहरी ऐन संसदीय समितिमा छलफल गरी असार १६ गते टेबल गरेपछि गृहमन्त्री थापाले असन्तुष्टि जनाएका हुन् ।

प्रदेश २ का मुख्यमन्त्रीको कार्यालय । जनकपुर चुरोट कारखानाको एजिएम बस्ने कार्यालयमा मुख्यमन्त्री तथा मन्त्रिपरिषद्को कार्यालय स्थापना गरिएको छ । तस्बिर : अजित

गृहमन्त्री थापाले प्रदेश २ को सरकारले ल्याएको प्रदेश प्रहरी ऐनप्रति आपत्ति जनाए । उनको संकेत आफूले ऐन तयार नपार्दै मस्यौदा तयार पारेकोमा छ । ‘प्रदेश प्रहरी ऐन संविधानलाई टेकेर नै ल्याएका हौं,’ प्रदेश २ का आन्तरिक मामिला तथा कानुनमन्त्री ज्ञानेन्द्र यादवले भने, ‘संविधानमा संघीय सरकारले अगाडि बनाउने र प्रदेश सरकारले पछाडि बनाउने केही उल्लेख छैन ।’ उनले ऐन ल्याउन संघीय सरकार ढिलाइ गरे अर्को साता प्रदेश सरकारले लोकसेवा ऐन पनि ल्याउने दाबी गरे ।

प्रदेश २ को सरकारले गठन भएदेखि नै केन्द्र सरकारसँंग बिमति राख्दै आएको छ । मुख्यमन्त्री लालबाबु राउतले कर्मचारी अभाव, सचिवमा सरुवा र कर्मचारीले नटेरेको मामिलामा संघीय सरकारलाई पत्र नै लेखेर असन्तुष्टि जनाएका थिए । प्रदेश सरकार मुख्यत: ३ वटा मामिलामा केन्द्र सरकारसित बिच्किएको छ । पहिलो : प्रदेश प्रहरी ऐन । दोस्रो : थाहै नदिई कर्मचारी सरुवा र तेस्रो : प्रदेशको मन्त्रालय स्थापना गरिएको जनकपुर चुरोट कारखानालाई फेरि सञ्चालनमा ल्याउने तयारी ।

भारतीय प्रधानमन्त्री नरेन्द्र मोदीको जनकपुर भ्रमण बेला जानकी मन्दिरमा राखिएको फरक आकार र रूपको राष्ट्रिय झन्डाबारे मुख्यमन्त्री कार्यालयका सचिव हरि फुयाँल र आन्तरिक मामिला तथा कानुन मन्त्रालयका सचिव देवीराम भण्डारीलाई सामान्य प्रशासन मन्त्रालयले सोधेको स्पष्टीकरणमा पनि प्रदेश सरकारले आपत्ति जनाएको थियो । त्यसलगत्तै सामान्य प्रशासन मन्त्रालयले थाहै नदिई प्रदेश २ का चारवटा मन्त्रालयको सचिवको सरुवा र हेरफेर गर्‍यो । कृषि मन्त्रालयका सचिव विजयचन्द्र झा, भौतिक पूर्वाधार मन्त्रालयका सचिव कौशल झा र आर्थिक मामिला मन्त्रालयका सचिव बिसुकुमार केसी काठमाडौं तानिए । सामाजिक विकास मन्त्रालयका सचिव किरण रूपाखेतीलाई आर्थिक मामिला मन्त्रालय र आन्तरिक मामिला मन्त्रालयका सचिव देवीराम भण्डारीलाई सामाजिक विकास मन्त्रालयको सचिवमा हेरफेर गरियो ।

ठूलो संख्यामा सचिवको सरुवा र हेरफेरपछि मुख्यमन्त्री राउतले सामान्य प्रशासन मन्त्रालयलाई पत्र नै लेखेर असन्तुष्टि जाहेर गरे । ‘प्रदेश सरकारमा जनशक्तिको अभाव रहेको र भर्खर अभ्यासरत रहेका कर्मचारीलाई छोटो समयमा सरुवा गर्दा दैनिक प्रशासनिक काममा अप्ठ्यारो परेको छ । अब कर्मचारी सरुवा गर्दा प्रदेश सरकारसित सहमति लिनु होला,’ मुख्यमन्त्री राउतले लेखेको पत्रमा उल्लेख छ । प्रदेश सरकारले मन्त्रालय र आवास स्थापना गरेको जनकपुर चुरोट कारखानालाई फेरि सञ्चालनमा ल्याउन केन्द्र सरकारका उद्योगमन्त्री मातृका यादव यो बीचमा करिब ४ पटक कारखानाको अवलोकन गरे । कारखानाको आवास क्षेत्रमा प्रदेश प्रमुखको कार्यालय, मुख्यमन्त्रीको निवास, मन्त्रालय, मन्त्रीको निवास र सचिवको निवास राखिएको छ ।

कारखानाको एजिएम कार्यालयमा मुख्यमन्त्री तथा मन्त्रिपरिषदको कार्यालय स्थापना गरिएको छ । जनकपुर चुरोट कारखाना फेरि सञ्चालनमा आए प्रदेश २ को प्रशासनिक भवन र आवास त्यहाँबाट हटाउनुपर्छ । जचुकालि आफ्नो मातहतमा ल्याउन प्रदेश सरकार प्रयासरत रहेका बेला उद्योगमन्त्री यादव कारखाना छिट्टै सञ्चालनमा आउने दाबी गरिरहेका छन् ।

प्रकाशित : श्रावण ८, २०७५ ०८:४५
प्रतिक्रिया
पठाउनुहोस्

सिमसार संरक्षणमा स्थानीय

भरत जर्घामगर

सिरहा — चुरे फेदीको लहान–१५ ढोढनास्थित कोइरालो सामुदायिक वनभित्रको सिमसार क्षेत्र जोगाउन गाउँले जुटेका छन् । ६० हेक्टरमा फैलिएको वनमध्ये १० हेक्टर सिमसारमा पर्छ । वनक्षेत्र बहुमूल्य सालका रूखले घेरिएको छ ।

बाह्रैमास पानी रहने सिमसार क्षेत्र संरक्षण गर्न गाउँलेले ५ हजार अम्रिसो र ४ सय ५० वटा बाँसका बिरुवा रोपेका छन् । वन समितिका सचिव रुद्र नारायण चौधरीले ३ हेक्टर जग्गामा वृक्षरोपण गरिएको बताए । ‘वनमा रहेको करिब चार हेक्टर क्षेत्रफलको दहमा प्रचण्ड गर्मीमा समेत पानी सुक्दैन,’ उनले भने, ‘यस क्षेत्रलाई पर्यटकीय स्थलमा परिणत गर्न वन कार्यालयलाई आग्रह गरिएको छ ।’

सिमसार क्षेत्रमा पानी सुक्न नदिन अम्रिसो र बाँसका बिरुवा रोपिएको उनले बताए । चौधरीका अनुसार पर्यटकीयस्थल बनाउन स्थानीय सामुदायिक वन र जिल्ला वन कार्यालयको संयुक्त लगानीमा आन्तरिक पर्यटन प्रवद्र्धनको तयारी सुरु गरिएको छ । त्यसका लागि स्थानीय वन उपभोक्ता समितिको प्रत्यक्ष रेखदेखमा वन कार्यालयले २५ लाख रुपैयाँ लगानी गरेको उनले जानकारी दिए । ढोढनाकै प्रसिद्ध राजदेवी मन्दिरदेखि एक किमि पूर्वमा पर्ने उक्त सिमसार क्षेत्रलाई पर्यटकीय स्थल बनाउन आर्थिक वर्ष ०७४/७५ देखि लगानी थालिएको हो ।

‘चार हेक्टर जलाशयलाई सफा गरी त्यहाँ बोटिङ चलाउने तयारी गरिएको छ,’ उनले भने, ‘वन क्षेत्रभित्र बोटिङबाहेक पर्यटकका लागि गर्मी छल्न गोलघर, उद्यान तथा पार्क निर्माण गर्छौं ।’ वडाध्यक्ष तेजनारायण चौधरीले पर्यटकीय पूर्वाधार सम्पन्न भएपछि कोइरालो वन र राजदेवी मन्दिरलाई जोड्ने सडक निर्माण गरी ती दुवै स्थललाई टुरिज्म सर्कलभित्र गाभ्ने योजना रहेको जानकारी दिए । प्रत्येक वैशाख पूर्णिमामा ठूलो संख्यामा बलिपूजा हुने राजदेवी मन्दिरमा प्रत्येक शनिबार घुइँचो लाग्छ ।

‘धार्मिक तथा पर्यटकीय सम्भावना बोकेका ती दुवै स्थललाई जोड्न सके यहाँको विकासमा प्रशस्त टेवा पुग्ने भएकाले कोइरालो वनलाई पर्यटकीय सिमसार क्षेत्रमा रुपान्तरण गर्न खोजेका हौं,’ जिल्ला वन अधिकृत सुनिलकुमार सिंहले भने, ‘चालु आवमा पूरै सिमसार क्षेत्रलाई जलाशयमा परिवर्तन गरी र्‍याफ्टिङ चलाउने तयारी गर्दैछौं ।’

प्रकाशित : श्रावण ८, २०७५ ०८:४३
पूरा पढ्नुहोस्
प्रतिक्रिया
पठाउनुहोस्