हिलेको बक्रकुण्ड धाममा विशेष मेला

त्यसस्थानमा रहेको पाथीभरा, वक्रकुण्डलगायत दर्जन बढी देवालयको पूजा गर्न तथा गुफा नियाल्न धनकुटा, तेह्रथुम, भोजपुर, संखुवासभालगायत जिल्लाबाट सर्वसाधारण पुग्ने गरेको समितिका अध्यक्ष लालचन्द्र गोङ्बाले जानकारी दिए ।

उक्त अवसरमा विभिन्न समूहबीच भजन तथा नृत्य प्रतियोगिता पनि आयोजना गरिएको गोङ्बाले बताए । वक्रकुण्ड थुम्कीबाट मनोरम दृश्यावलोकन गर्न सकिने भएकोले पर्यटकीय दृष्टिले पनि उक्त स्थानमा सर्वसाधारणको जमघट हुने गरेको छ । वक्रकुण्ड थुम्कीबाट पूर्वका तीन वटा राष्ट्रिय निकुञ्ज कञ्चनजंगा, मकालु वरुण र कोसी टप्पु वन्यजन्तु आरक्षण नियाल्न सकिन्छ । त्यहाँस्थित १ सय ८ सीढी उक्लिएर मौसम सफा रहेको बखत ती स्थान नियाल्न सकिने स्थानीयले बताए ।

अरुण उपत्यका, मकालु हिमशृंखला र वरिपरी चियाबारीको हरियालीले सर्वसाधारणलाई लोभ्याउने गरेको स्थानीयवासी उमेश घिमिरेले बताए । मेलास्थलमा संगीनी गीत नृत्यको प्रतियोगितासमेत आयोजना गरिएको आयोजकले जनाएको छ । उक्त स्थानमा १४ वर्ष पहिलेदेखि नागपञ्चमीको दिन विशेष पूजा तथा मेला लाग्ने गर्दछ ।