धरानमा अफ्रिकन स्वाइन फिवरले बंगुर मर्दा ३० करोड नोक्सान

बंगुरमा लाग्ने अफ्रिकन स्वाइन फिवरको प्रकोपबाट किसानले पालेका बंगुर मर्दा पछिल्लो एक वर्षमा ३० करोड बराबरको नोक्सानी भएको धरान उपमहानगरपालिका पशु शाखा प्रमुख डा. बिर्खबहादुर कुलुङले बताए ।

गत वर्षको वैशाखदेखि फैलिएको प्रकोप नियन्त्रणमा नआउँदा स्थानीय किसानहरूले ठूलो क्षति बेहोर्नुपरेको कुलुङको भनाइ छ ।

जनशक्ति अभाव र स्थानीय सरकारको मात्र पहलले प्रकोप नियन्त्रण गर्न नसक्दा ठूलो मात्रामा बंगुर मरेको कुलुङले बताए । पशु बिमाको झन्झटिलो प्रक्रियाका कारण धेरै किसानहरु अझै पनि बिमाको पहुँचमा पुगेका छैनन् । सामान्यत: एउटै बंगुर ५० देखि २ सय ५० केजी तौलको हुने र मर्दाखेरि त्यसबाट ठूलो क्षति हुने किसानहरू बताउँछन् ।