महसुल नतिर्ने धाराको लाइन काट्न थालियो 

फिदिम खानेपानी तथा सरसफाई उपभोक्ता समितिले तीन महिनाभन्दा धेरै महसुल नबुझाएका ग्राहकको धाराको लाइन काट्न थालेको हो । ‘तीन महिनासम्म नियमित महसुल नतिर्नका साथै दस हजार रुपैयाँभन्दा धेरै बक्यौता रहेका ग्राहकको धारा काट्न थालेका छौं,’ उपभोक्ता समिति अध्यक्ष प्रकाश गुरुङले भने ।

गुरुङका अनुसार फिदिम नगरपालिका वडा नम्बर १, २ र ४ नम्बर वडामा २ हजार ६ सय उपभोक्ताका घरमा धारा जडान गरिएको छ । तीमध्ये एक हजारभन्दा धेरै ग्राहक नियमित महसुल तिर्दैनन् । उपभोक्ता समितिको तथ्यांकअनुसार हाल ५६ लाख रुपैयाँ महसुल उपभोक्ताका नाममा बक्यौथता छ । पटक-पटक अनुरोध गर्दा पनि महसुल नबुझाएपछि धारा काट्न थालिएको गुरुङले बताए । ग्राहकका नाममा १० हजारदेखि ३ लाख ५२ हजार रुपैयाँसम्म बक्यौता छ । सबैभन्दा धेरै पाँचथर जिल्ला अदालतले मात्रै ३ लाख ५२ हजार रुपैयाँ तिर्न बाँकी रहेको उपभोक्ता समितिले जनाएको छ ।

फिदिम बजार र आसपासमा वितरण भएको खानेपानी एशियाली विकास बैंकको ऋण सहयोगमा १६ किलोमिटर टाढा पर्ने आप्तावाखोला मुहानबाट ल्याइएको हो ।

महसुल नउठ्दा विभिन्न निकायबाट लिएको सापटी र ऋणको किस्ता तिर्न कठिनाई भएको भन्दै समितिले धारा काट्ने निर्णय गरेको हो । पटक-पटक महसुल बुझाउन अनुरोध गर्दा अटेर गर्ने २६ जना ग्राहकका धारा यो साता काटिएको समितिले जनाएको छ । धारा काट्न थालिएपछि बिलम्ब शुल्कसहित ३३ लाख रुपैयाँ महसुल जम्मा भएको बताइएको छ ।

समितिको आग्रह नमान्ने, शुल्क बुझाउन अटेर गर्ने र सम्पर्कमा नआउने ग्राहकका धारा काट्ने अभियानलाई निरन्तरता दिने योजना अध्यक्ष गुरुङले सुनाए । धारा काटिएपछि महसुल बुझाउने उपभोक्ताका धारामा तत्काल पानी जोड्ने गरिएको छ ।