सुनसरी — इटहरीको मुख्य चोकमा सवारी व्यवस्थापन गर्न कोशी प्रदेशमै पहिलो पटक ८ महिनाअघि ट्राफिक लाइट जडान गरिएको थियो । यो उपायसँगै सवारी व्यवस्थापनमा सहज हुने अपेक्षा गरिए पनि बारम्बार बिग्रिरहँदा दुर्घटनाको जोखिम बढेको छ । 

कहिले बल्ने त कहिले बन्द हुने हुँदा यात्रुहरू झुक्किंदा दुर्घटनाको जोखिम बढेको हो । एक दुई दिन बल्ने, फेरि बन्द हुने समस्या बारम्बार आए पनि पूर्णरुपमा समाधान हुन नसकेको कोशी प्रदेश ट्राफिक प्रहरी कार्यालय इटहरीका एसपी श्याम कुमार महतोले बताए ।

ट्राफिक लाइटअनुसार बाटो काट्ने बानी परेका यात्रुहरू लाइट नबेको बेला पनि सोही अनुसार सवारी चलाउँदा दुर्घटनाको जोखिम बढेको महतोको भनाइ छ । लाइट नबलेको बेला चौक परिक्रमा वा घुमेर आफ्नो दिशा जानुपर्छ । तर यात्रु, सवारी चालकहरूले झुक्किएर छड्के बाटो क्रस गर्दा दुर्घटनाको जोखिम बढेको छ ।

यसरी बाटो काट्दा फरक दिशाबाट आएका सवारी एक आपसमा ठोक्किने उच्च जोखिम रहेको ट्राफिक प्रहरीको भनाइ छ । अहिले इटहरीको मुख्य चोकमा यस्तो समस्या बारम्बार देखिन थालेको छ । मुख्य चोकमा ट्राफिक लाइटको अवस्था र संकेत अनुसार सवारी चलाउने र बाटो काट्नु पर्छ । रातो बत्ती बल्दा रोकिने, पहेलो बत्ती बल्दा दायाँबायाँ हेरेर विचार गर्ने र हरियो बत्ती बले पछि लाइट संकेत देखाएको दिशातर्फ सवारी गुडाउने यो ट्राफिक लाइटको सामान्य तथा सर्वमान्य नियम हो ।

ट्राफिक लाइटमा सवारीलाई छड्के रुटमा सञ्चालन गर्न लगाइन्छ । गोलो चोकलाई घुम्नु वा परिक्रमा गर्न लगाइँदैन । यो लाइट बलेको वा सञ्चालन भएको बेला मात्रै हो । यही नियम इटहरीबासी र इटहरीको मुख्य चोक हुँदै सवारी चलाउनेहरू अभ्यस्त हुँदैछन् । तर नबलेको बेला यो नियम लागू हुँदैन ।

आफू जाने दिशा गोलो चोक घुमेर वा परिक्रमा गरेर जानुपर्छ । अर्थात पुरानो शैली अपनाउनुपर्छ । तर ट्राफिक लाइट नबलेको बेला पनि छड्के रुटमा सवारी चलाउँदा दुर्घटना हुने उच्च संभावना हुन्छ । फरक दिशाबाट आएका सवारी क्रस गर्न खोज्दा दुर्घटनामा पर्न सक्छन् । हेर्दा सामान्य लागे पनि यो सुरक्षासँग जोडिएको संवेदनशील विषय हो । सानो त्रुटिले ठूलो दुर्घटना ल्याउन सक्ने यात्रुहरू बताउँछन् ।

लाइटमा समस्या आउन थालेको स्वीकार्दै एसपी महतोले भने,‘यो प्राविधिक विषय हो । समस्या आए पछि जानकारी गराउँछौं, प्राविधिक आएर बनाउँछन् । समस्या चाहिँ देखिन थालेको छ ।’ यो समस्याका कारणले ट्राफिक प्रहरीले गाली खानुपरिरहेको उनी बताउँछन् । उनी भन्छन्,‘जडान मन्त्रालयले गरेको हो, पालिकाले मेन्टेनेन्स गर्ने हो, हामीले मोनिटरिङ मात्रै गर्ने हो । तर समस्या आउँदा यात्रुले हामीलाई गाली गर्छन् ।’ ट्राफिक लाइटको तार जलेका कारण समस्या देखिएको तर प्राविधिक लगाएर मर्मत गरी सञ्चालनमा आएको इटहरी ६ का वडाअध्यक्ष दिवस पोख्रेलले जानकारी दिए ।

उनले एमसीबीमा समस्या आउँदा पनि प्राविधिक बोलाएर मर्मत गरिंदै आएको बताए । पोखरेलका अनुसार इलेक्टोनिक सामान भएकाले समयसमयमा समस्या आउनु स्वाभाविक हो तर सँगसँगै मर्मत पनि भइरहेकै छ । विधुत प्राधिकरणले पोल सार्ने, तार व्यवस्थापनका लागि लाइन काट्ने गरेका कारण पनि ट्राफिक लाइटमा समस्या आउने गरेको उनले सुनाए । प्रदेश सरकारको लगानीमा जडान भएको ट्राफिक लाइट मुख्यमन्त्री राजेन्द्र राईको पालामा इटहरी उपमहानगरपालिकालाई हस्तान्तरण गरिएको हो । अहिले जडान गर्ने कम्पनिकै प्राविधिकले मर्मतको काम गर्दैछ । प्रदेशले हस्तान्तरण गरे पछि यो उपमहानगरको दायित्वमा आएको छ । तर उपमहानगरले हालसम्म यसको मर्मत व्यवस्थापनका लागि छुट्टै बजेट विनियोजन नगरेको वडा अध्यक्ष पोख्रेलले बताए । सानोतिनो खर्च वडाबाटै गर्ने गरिए पनि असार पछिको मर्मत व्यवस्थापनका लागि उपमहानगरले छुट्टै बजेटको व्यवस्थापन गर्नुपर्ने उनले बताए ।