कान्तिपुर वेबसाईट
AdvertisementAdvertisement
२४.१२°C काठमाडौं
काठमाडौंमा वायुको गुणस्तर: १३४

विद्यालयलाई ३६ लाखको जग्गा र भवन सहयोग

प्रदीप मेन्याङ्बो

सुनसरी — आफ्ना स्वर्गीय आमाबाबुले गाउँको शिक्षा क्षेत्रमा दिएको योगदानलाई थप सम्झनयोग्य बनाउन टंक वनेम र उनका दाजुभाइले एक दशकदेखि योजना बनाइरहेका थिए । यसपालि ६ दाजुभाइ, दुई बहिनी र उनीहरूको सबै सन्तान पुर्ख्यौली थलोमा भेला भए ।

विद्यालयलाई ३६ लाखको जग्गा र भवन सहयोग

स्वर्गीय बाबु सिंहराज वनेम र स्वर्गीय आमा मनरानी एभेङथोप्राको स्मृतिमा ताप्लेजुङको साविक ढुङ्गेसाँघु गाविस हाल मैवाखोला–२ स्थित ठोट्ने आधारभूत विद्यालयलाई ३६ लाख रुपैयाँ बराबरको जग्गा र भवन दान गर्न पाएकोमा उनीहरू खुसी भए ।

जग्गादानसँगै वैधानिक प्रक्रिया अपनाएर विद्यालयको नाम पनि परिवर्तन गरेर चैत ११ देखि ठोट्ने सिंहराज–मनरानी आधारभूत विद्यालय राखिएको छ । नेपाली प्रतिभा प्रतिष्ठान बेलायतका उपाध्यक्षसमेत रहेका लेखक साहित्यकार टंक वनेमले बाबुआमाले आफ्नो समयमा समाजमा शिक्षा क्षेत्रमा दिएको योगदानलाई सम्झनयोग्य बनाउन आफूहरू जुट्न नसकेको सुनाए । ‘परिवारका अधिकांश सदस्यहरू विदेशमा बस्ने गरेकाले बल्ल यसपालि साइत जुराउन सकियो,’ उनले भने, ‘पुर्ख्यौली थलो साबिक ढुङ्गेसाँघु– ८ चुम्लोक गाउँमा जुटाउन एक दशक पर्खिनुपर्‍यो ।’

सिंहराज २०१७ देखि २०३१ सालसम्म साबिक ढुङ्गेसाँघु गाउँ पञ्चायत– ८ को वडा अध्यक्ष र २०३६ देखि २०३७ सालसम्म मैवाखोला माध्यमिक विद्यालय तेम्बेको सञ्चालक समितिको अध्यक्ष रहेर शैक्षिक क्षेत्रमा सक्रिय थिए । १९८३ असोज २२ मा जन्मेका उनको निधन २०४६ चैत ११ मा भएको थियो ।

१९८४ भदै ११ मा जन्मेकी मनरानीको २०६८ जेठ २८ मा निधन भएको थियो । उनीहरू दुवै समाज सेवामा सक्रिय रहेकाले छोराबुहारी र छोरीज्वाइँ, नातिनातिनाले ठोट्ने विद्यालयलाई आर्थिक र भौतिक दान गरेको प्रधानाध्यापक चित्रगुप्त वनेमले बताए । २०५७ सालमा सिंहराज वनेम परिवारको संयुक्त लगानीमा करिब १८ लाख रुपैयाँको लागतमा सिंहराज वनेम खेलमैदान निर्माण भएको थियो ।

उक्त खेलमैदान पनि वनेम परिवारले विद्यालयलाई हस्तान्तरण गरेका छन् । प्रअ वनेमका अनुसार सामाजिक रूपान्तरणका लागि शिक्षा नै प्रमुख आधार भएको हुनाले सिंहराजका जेठा छोरा मकर ध्वोज वनेमद्वारा प्रदान गरिएको १७ रोपनी १२ आना माङ्मालुङ प्याङ्सि (बलढेङ्गेढुङ्गा खेत) जग्गालाई खेल मैदान र विद्यालय परिसर बनाइएको थियो ।

उक्त जग्गामा निर्मित सिंहराज खेल मैदानसमेतको २७ लाख तथा नगद ९ लाख रुपैयाँ थप गरेर एकमुष्ट ३६ लाख रुपैयाँ बराबरको चलअचल सम्पत्ति विद्यालयलाई दान गरेपछि अब स्कुलको सम्पत्ति भएको छ । सिंहराजका परिवारले लालिमा क्लब र विद्यालयलाई ‘सिंहराज–मनरानी स्मृति कप महिला फुटबल सञ्चालनका लागि १५ लाख रुपैयाँको अक्षयकोष पनि स्थापना गरेको प्रअ वनेमले बताए ।

यो वर्ष ताप्लेजुङमा सञ्चालन भएको ‘सिंहराज–मनरानी स्मृति कप महिला फुटबल प्रतियोगिता’ का लागि पनि वनेम परिवारले उपाधि विजेतालाई २ लाख ९० हजार रुपैयाँ पुरस्कार प्रायोजन गरेको थियो । उनका अनुसार सिंहराजका छोराबुहारीदेखि पनातिपनातिनाले संयुक्त रूपमा नगद एवं जग्गा दान गरेर विद्यालयको शैक्षिक गुणस्तर सुधार्न सहयोग गरेका छन् । उक्त विद्यालयमा करिब १ सय ५० विद्यार्थी छन् ।

प्रकाशित : चैत्र १७, २०७९ ०७:४३
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?