२८.१२°C काठमाडौं
कोशी प्रदेश : नयाँ सरकार गठनको खेल
मोरङ — संघीय सत्ता समीकरण फेरिएसँगै प्रदेशमा पनि सत्ताको गणितीय खेल सुरु भएको छ । योसँगै कोशी प्रदेशका मुख्यमन्त्री हिक्मत कार्की नेतृत्वको सरकारको दिनगन्ती सुरु भएको हो । नयाँ गठबन्धन दलहरूले प्रदेश सरकारको नेतृत्वमा आ–आफ्नै दाबी प्रस्तुत गर्न थालेपछि कोशी प्रदेश सरकारको नेतृत्व अब कसको भागमा पर्ला भन्ने चासो बढेको छ ।
कोशी प्रदेशसभामा प्रतिनिधित्व गर्ने दलका सांसदले आ–आफ्नै दाबी प्रस्तुत गरिरहे पनि प्रदेश सरकारको नेतृत्व केन्द्रीय सत्ता गठबन्धन दलका शीर्ष नेताहरूले गर्ने निर्णयमा निर्भर छ । प्रधानमन्त्री पुष्पकमल दाहालले सोमबार दोस्रो पटक सदनबाट विश्वासको मत पाएपछि प्रदेशको सत्ता समीकरणको बाटो खुलेको हो ।
९३ सदस्यीय कोशी प्रदेशसभामा एमालेका ४०, राप्रपाका ६, कांग्रेसका २९, माओवादी केन्द्रका १३, नेकपा (एकीकृत समाजवादी) का ४ र जनता समाजवादीका १ जना प्रदेश सांसद छन् । माओवादी केन्द्र र राप्रपाको समर्थनमा एमालेका कार्कीले नेतृत्व गरिरहेको सरकार माओवादीले समर्थन फिर्ता लिएसँगै ढल्ने अवस्थामा पुगेको र नयाँ सरकार गठनको खेल सुरु भएको हो । यसका लागि सभामुख बाबुराम गौतम निर्णायक हुने देखिन्छन् । अहिलेका नयाँ गठबन्धनमा रहेका कांग्रेस, माओवादी केन्द्र, एकीकृत समाजवादी र जनता समाजवादी पार्टीका सभामुखसहित ४७ जना सांसद पुग्ने देखिन्छ ।
माओवादी केन्द्रका नेता इन्द्रबहादुर आङ्बोले प्रदेश सरकार फेरबदलको अवस्था रहे पनि अहिले संघदेखि प्रदेशसम्म त्यस्तो कुनै तयारी नरहेको दाबी गरे । उनले गठबन्धन दलका केन्द्रीय शीर्ष नेताहरूले निर्णय गरेपछि मात्र प्रदेश सरकार परिवर्तनको प्रक्रिया सुरु हुने बताए । त्यसपछि मात्रै सरकारको नेतृत्व कसले गर्ने भन्ने विषय आउने आङ्बोको भनाइ छ । तर उनले आफू मुख्यमन्त्री बन्नका लागि जोडदार पहल गरिरहेको उनीनिकट प्रदेश सांसद बताउँछन् ।
एकीकृत समाजवादीका नेता तथा पूर्वमुख्यमन्त्री राजेन्द्रकुमार राईले पनि पुनः मुख्यमन्त्रीका लागि पहल गरिरहेको बताइन्छ । तर कांग्रेसका प्रदेश सांसदहरू एकीकृत समाजवादीका ४ जना मात्रै प्रदेश सांसद रहेकाले मुख्यमन्त्री दिएर अघि बढ्दा नकारात्मक सन्देश जाने भएकाले त्यस्तो हुन नदिन पार्टीभित्र दबाब बढाइरहेको बताउँछन् ।
कांग्रेसका प्रदेश सांसद केदार कार्कीले संख्यात्मक हिसाबले यस प्रदेश सरकारको नेतृत्व कांग्रेसले पाउनु स्वाभाविक भएको बताउँछन् । तर कांग्रेस संसदीय दलका नेता उद्धव थापाले भने सरकारको नेतृत्वका बारेमा अन्योलता व्यक्त गरे । ‘प्रदेशसभामा प्रतिनिधित्व गर्ने गठबन्धन दलहरूको संख्यात्मक हिसाबले सरकारको नेतृत्वको ग्यारेन्टी हुने अवस्था छैन,’ उनले भने, ‘गठबन्धन दलका केन्द्रीय शीर्ष नेताहरूले गरेको निर्णयका आधारमा प्रदेश सरकारको नेतृत्व कसले गर्ने विषय सुनिश्चित हुन्छ । यो विषयमा हामी बोलेर केही हुने अवस्था छैन ।’ सरकारको नेतृत्वको विषयमा कांग्रेसभित्र अन्तरद्वन्द्व देखिएको छ । यस प्रदेशमा कांग्रेसको पार्टीगत राजनीतिमा नेता कृष्णप्रसाद सिटौला पक्ष हाबी भएकाले सरकारको नेतृत्व अन्य पार्टीलाई नै छाडेर बढी मन्त्री लिएर सरकारमा जाने विषयमा बहुमत प्रदेश सांसदहरू एकमत देखिएका छन् ।
प्रकाशित : चैत्र ७, २०७९ ०७:५२
