तीन पूर्ववडाध्यक्ष दोषी ठहर
विराटनगर — तीन वर्षअघि विवाहसम्बन्धी विवादमा ज्यान गुमाएका विराटनगर–१४ का समानन्द यादवको मुद्दामा जिल्ला अदालत मोरङले तीन पूर्ववडाध्यक्षलाई दोषी ठहर गरेको छ ।
न्यायाधीश दीनबन्धु बरालको इजलासले विराटनगर–१४ का पूर्ववडाध्यक्ष बलदेव यादव, १८ का पूर्ववडाध्यक्ष सञ्जय साह र जहदा गाउँपालिका–१ का पूर्ववडाध्यक्ष प्रदीपचन्द्र यादवसहित दीपेश यादव, भोलु यादव, वीरेशकुमार यादव र विन्देश्वर यादव संलग्न भएको भन्दै दोषी ठहर गरेको छ । अदालतले उनीहरूलाई जनही २ वर्ष कैद र २० हजार रुपैयाँ जरिवाना तोकेको छ । त्यस्तै अदालतले सातै जनाबाट जनही १ लाख ५० हजारका दरले मृतकका परिवारलाई क्षतिपूर्ति भराउन पनि आदेश दिएको अदालतका सूचना अधिकृत हेमबहादुर बुढाथोकीले बताए । उनीहरूमध्ये भोलु र सञ्जयको कैद भुक्तान पूरा भइसकेको छ । उनीहरू क्षतिपूर्ति रकम जनही १ लाख ५० हजार बुझाएर आइतबार रिहा भएको बुढाथोकीले बताए ।
०७५ जेठ ३२ मा नातेदारको विवाहको विषयमा वडा १४ का तत्कालीन वडाध्यक्ष बलदेव यादवको घरमा पञ्चायती बसेको समयमा समानन्द यादवमाथि कुटपिट भएको थियो । उनको असार २७ मा उपचारका क्रममा मृत्यु भएको थियो । आफ्ना नातेदारकी छोरीसँग समानन्दले छोराको विवाह गराउन नमानेपछि तीन तत्कालीन वडाध्यक्षसहित १० जनाले कुटपिट गरेको पीडित परिवारले किटानी जाहेरी दिएका थिए ।
आरोपीमध्ये विराटनगर–१८ का तत्कालीन वडाध्यक्ष सञ्जय र जहदा–१ का तत्कालीन वडाध्यक्ष प्रदीपचन्दलाई जिल्ला अदालतले पुर्पक्षका लागि थुनामा पठाएको थियो । विराटनगर–१४ का पूर्ववडाध्यक्ष बलदेवलाई पुर्पक्षका लागि धरौटीमा छाड्ने आदेश दिएको थियो । मुद्दाका बाँकी तीन जना रविन यादव, शम्भु यादव र दिनेशप्रसाद यादव अझै फरार छन् ।
