तालाबन्दीका बावजुद पाथीभरा क्याम्पसमा निर्वाचन गरिने

ताप्लेजुङ — एमाले निकट अनेरास्ववियु र जसपा निकट संघीय विद्यार्थी युनियनको तालाबन्दीका बीच पाथीभरा बहुमुखी क्याम्पसमा आइतबार स्ववियु निर्वाचन हुने भएको छ । क्याम्पस प्रशासन र स्ववियु निर्वाचन समितिले शनिबार एक विज्ञप्ति प्रकाशन गरी आइतबार बिहान ८ बजेदेखि दिउँसो ४ बजेसम्म मतदान हुने जनाएको हो ।

‘स्वतन्त्र विद्यार्थी युनियन निर्देशिका २०७९ र क्याम्पसमा पूर्व प्रकाशित स्ववियु निर्वाचन तालिका अनुसार बिहान ८ देखि बेलुका ४ बजेसम्म मतदान हुने सम्बन्धित सबैमा जानकारी गराइन्छ,’ क्याम्पस प्रमुख मोहन कुमार राई र स्ववियु निर्वाचन अधिकृत युवराज बस्नेतद्वारा जारी सूचनामा उल्लेख छ ।

दुई विद्यार्थी संगठनले अचानक निर्वाचन अधिकृत परिवर्तन गरिएको र परिचय पत्रमा क्युआर स्क्यान गर्दा पूर्ण विवरण नदेखिएको भन्दै सच्याउन माग गर्दै क्याम्पस प्रशासन र निर्वाचन अधिकृतको कार्यालयमा तालाबन्दी गरेका छन् ।

निर्वाचन अधिकृत उमेश अधिकारीले जरुरी कामले विराटनगर जानुपर्ने भन्दै राजीनामा दिएपछि क्याम्पस प्रशासनले समितिका सदस्य बस्नेतलाई निर्वाचन अधिकृत बनाएको छ । अधिकारीले कसैको दवाव र हठातमा नभइ आफ्नो विशेष कामले सबै विद्यार्थीलाई सुनाएर राजीनामा दिएको कान्तिपुरलाई बताए । निर्वाचन प्रयोजनका लागि बारबेरा गर्ने, मतपत्र छाप्ने लगायतका काम पूरा भएको राईले बताए । शनिबार बिहान बसेको क्याम्पस सञ्चालक समितिको बैठकले पूर्व निर्धारित कार्यक्रम अनुसार नै निर्वाचन गर्ने निर्णय गरेको थियो ।

वर्तमान अवस्थामा निर्वाचन गर्न नसक्ने मनसाय शुक्रबार क्याम्पस प्रशसानले प्रकट गरेपछि नेविसंघ नेतृत्वको चार विद्यार्थी संगठनले निर्वाचन गराउन दवाव दिँदै नाराजुलुस गरेको थियो । क्याम्पसमा कांग्रेस निकटको नेविसंघ, माओवादी निकटको अखिल क्रान्तिकारी, नेकपा एस निकटको अखिल र संघीय लिम्बूवान परिषदको विद्यार्थी संगठनले गठबन्धन गरेका छन् । निर्वाचनको सम्पूर्ण प्रक्रिया पूरा भई मौन अवधि सुरु हुनै लाग्दा तालाबन्दी भएपछि आफूलाई निर्वाचन किन नगर्ने भन्ने जवाफ दिने अवस्था नभएको क्याम्पस प्रमुख राई बताउँछन् । क्याम्पसमा ९ सय ८३ विद्यार्थी मतदाता रहेको क्याम्पस प्रशासनले जनाएको छ ।