ज्योति फर्किँदा ज्येष्ठ नागरिक खुसी

पाँचथर — भारतको पश्चिम बंगाल र सिक्किमसँग सिमाना जोडिएको पाँचथरको फालेलुङ गाउँपालिकामा पहिलो पटक आयोजना गरिएको निःशुल्क शिविरमा ६६ जनाको आँखा अपरेशन गरिएको छ ।

गाउँपालिकाको वडा नम्बर ३ मा रहेको नाम्लुवा भञ्ज्याङमा अवस्थित उपस्वास्थ्य चौकीमा आयोजित शिविरमा ६६ जना नागरिकका आँखाको शल्यक्रिया गरिएको छ ।

फागुन ३० देखि चैत ३ गतेसम्म सञ्चालन भएको शिविरमा मोतियाबिन्दु, ऐजेरु पलाएका र मासु पलाएका गरी ६६ जना नागरिकको शल्यक्रिया गरिएको हो ।

यस्तै दुई सय जना विद्यार्थीसँगै ८ सय जनाको आँखा जाँच, पाँच सय जनालाई औषधि वितरण र दुई सय ५० जनालाई चस्मा वितरण गरिएको आयोजक संस्थाको तथ्यांक छ ।

फालेलुङ गाउँपालिकाको आर्थिक र मेची आँखा अस्पताल बिर्तामोड झापाको प्राविधिक सहयोगमा जिल्लामा कृयाशील सामाजिक संस्था जनसेवा समाजको आयोजनामा शिविर सञ्चालन गरिएको थियो ।

शिविरमा नेपाली सेनाको फिदिमस्थित रणशेर गणले स्वयंसेवक उपलव्ध गराएको आयोजक जनसेवा समाजका अध्यक्ष राजेन्द्र अधिकारीले जानकारी दिए ।

भारतको पश्चिम बंगाल र सिक्किमसँग सिमाना जोडिएको फालेलुङमा आँखाको समस्या भएका बिरामीको मागका आधारमा यो शिविरका लागि बजेट व्यवस्थापन गरिएको पालिका अध्यक्ष वीरबिक्रम थाम्सुहाङले बताए ।

यस क्रममा फालेलुङ ५ का ८१ वर्षीय विष्णुप्रसाद थाम्सुहाङले शिविरमा अपरेशनपछि ज्योति फर्केकोमा खुसी व्यक्त गरेका थिए ।