सोलुमा मोटरसाइकल दुर्घटनाबाट युवकको मृत्यु
सोलुखुम्बु — मोटरसाइकल दुर्घटनमा परी सोलुखुम्बुको माप्यदुधकोसी गाउँपालिकाका एक युवकको मृत्यु भएको छ । मंगलबार मध्याह्न भएको दुर्घटनमा माप्यदुधकोसी गाउँपालिका ४ का २१ वर्षीय हेम कुमार राईको मृत्यु भएको जिल्ला प्रहरी कार्यालय सोलुखुम्बुले जनाएको छ ।
काँकुबाट बासातर्फ जाँदै गरेको बा. ४४ प २६१९ नम्बरको पल्सर मोटरसाइकल रमिते डाँडामा अनियन्त्रित भई दुर्घटना हुँदा राईको ज्यान गएको प्रहरी निरीक्षक राम किशोर शाहले बताए ।
मध्याह्न साढे १२ बजे भएको माप्यदुधकोसी ४ को उक्त दुर्घटनामा सख्त घाइते भएका राईको प्राथमिक अस्पताल खास्तावमा उपचारको क्रममा मृत्यु भएको हो ।
उनको शरीरमा बाहिरी चोट भने नदेखिएको बताइएको छ । घटनाको विषयमा थप अनुसन्धान भइरहेको जिल्ला प्रहरी कार्यालय सोलुखुम्बुले जनाएको छ ।
