गायक खरेलले पाउने पारिश्रमिक घाइतेको उपचारमा खर्च गरिने - कोशी - कान्तिपुर समाचार
कान्तिपुर वेबसाईट
AdvertisementAdvertisement

गायक खरेलले पाउने पारिश्रमिक घाइतेको उपचारमा खर्च गरिने 

रमेशचन्द्र अधिकारी

धनकुटा — गायक प्रमोद खरेलले घनकुटा महोत्सवमा आयोजकले आफूलाई उपलब्ध गराउने भनिएको रकम नलिने जनाएका छन् । आफ्नो प्रस्तुति हुनु केही समयअघि भएको घटनाबाट आफू स्तब्ध भएको जनाउँदै खरेलले घटनामा घाइतेको उपचारका लागि पारिश्रमिक उपलब्ध गराएको बताएका हुन् । आफ्नो प्रस्तुति हेर्न आउने दर्शक घटनामा परी घाइते हुनुले आफूलाई दुखित बनाएको समेत उनको भनाइ छ । 

'उत्साह बोकेर धनकुटा गएको थिएँ,' उनले भने, 'घटनाले मलाई असाध्यै दुखित तुल्याएको छ ।' खरेल आफ्नो प्रस्तुतिको लागि महोत्सवस्थलबाट नजिकै रहेको होटल मुर्चुङ्गाबाट बाहिर निस्कँदै गर्दा घटना भएको थियो । उनको प्रस्तुति सुन्न सयौ दर्शक महोत्सवस्थल पुगेका थिए । उद्योग वाणिज्य संघले घटनाबारे जानकारी दिन आइतबार आयोजित पत्रकार भेलामा टेलिफोनमार्फत जनाएका हुन् ।

सांगीतिक कार्यक्रम प्रस्तुत गर्न नपाए पनि घाइतेको उपचारमा आफ्नो दायित्व भएकोले उनले बताए । घाइते बालबालिकाप्रति लक्षित गरी रकम उपलब्ध गराउन आयोजकलाई अनुरोध गरेको उनले बताए । यस्तै, खरेलले उपचाररत घाइतेहरुसँग अस्पतालमा भेटघाट गर्ने समेत जनाए । पारिश्रमिकको रकम भने खुलाउन चाहेनन् ।

यस्तै, भूमि व्यवस्था, सहकारी तथा गरिबी निवारणमन्त्री राजेन्द्र राईको पहलमा बीपी कोइराला स्वास्थ्य विज्ञान प्रतिष्ठानमा उपचाररत बिरामीको निःशुल्क उपचार गर्ने व्यवस्था गरिएको आयोजकले जनाएको छ । औषधिबाहेक सम्पूर्ण उपचार निःशुल्क मिलाइएको संघका अध्यक्ष विजयसन्तोषी राईले बताए ।

मनोरञ्जनात्मक कार्यक्रममा रोक

धनकुटामा सञ्चालन भइरहेको महोत्सवस्थलमा शनिबार राति भएको घटनापछि त्यहाँ आयोजना हुने भनिएका सम्पूर्ण मनोरञ्जनात्मक कार्यक्रममा रोक लगाइएको छ । घटनाबारे आइतबार जिल्ला सुरक्षा समिति बैठक बसेको छ । बैठकले सबै प्रकारको मनोरञ्जनात्मक कार्य बन्द गराउने निर्णय गरेको छ ।

महोत्सवस्थलमा गरिँदै आएको सांस्कृतिक कार्यक्रम, विभिन्न खेल र मनोरञ्जनात्मक कार्यक्रम सञ्चालनमा रोक लगाएको निमित्त प्रमुख जिल्ला अधिकारी ममता अधिकारीले बताइन् । यस्तै, अपराह्न ५ बजेसम्म मात्र स्टल तथा अन्य व्यापारिक गतिविधि सञ्चालन गरिने निर्णय गरिएको जनाइएको छ । यसअघिका प्रमुख जिल्ला अधिकारी युवराज कटेलको यसै साता सरुवा भएर गएपछि प्रशासकीय अधिकृत ममता अधिकारी निमित्त प्रजिअको रुपमा छिन् । नयाँ प्रजिअ लिलाकुमारी केसी पाण्डे भने जिल्ला आइसकेकी छैनन् ।

धनकुटा-५ स्थित तल्लो टुँडिखेलमा उद्योग वाणिज्य संघले आयोजना गरेको एभोकाडो तथा पाँचौ धनकुटा महोत्सवमा गायक प्रमोद खरेलको सांगीतिक प्रस्तुति हुनुअघि करिब साढे ८ बजे राति उक्त घटना भएको हो । ३० जना घाइते भएका छन् । जसमध्ये दुई जनाको अवस्था गम्भीर रहेको प्रहरीले जनाएको छ ।

गत माघ ६ देखि सुरु गरिएको महोत्सव १६ गतेसम्म सञ्चालनमा हुने थियो । आयोजकले सोमबार महोत्सवको औपचारिकरुपमा समापन गर्ने जनाएको छ ।

प्रकाशित : माघ १५, २०७९ २१:१४
प्रतिक्रिया
पठाउनुहोस्

परराष्ट्रमन्त्री पौड्यालको पहिलो विदेश भ्रमण श्रीलंका

कान्तिपुर संवाददाता

काठमाडौँ — परराष्ट्रमन्त्री विमला राई पौड्यालको पहिलो विदेश भ्रमण श्रीलंका हुने भएको छ । श्रीलंकाको ७५ औं स्वतन्त्रता दिवसको अवसरमा सहभागी हुन परराष्ट्रमन्त्री पौड्याल यही बिहीबार कोलम्बो जान लागेकी हुन् ।

परराष्ट्र स्रोतका अनुसार नेपालका लागि श्रीलंकाकी कार्यवाहक राजदूत निलुसा डिल्मिनीले सिंहदरबार पुगेर श्रीलंकाको ७५ औं स्वतन्त्रता दिवसको दिनमा सहभागी हुन निम्तो दिएलगत्तै नेपालले सहभागिता जनाउने जवाफ दिएको हो ।

कार्यवाहक राजदूत डिल्मिनीले श्रीलंकाका विदेशमन्त्री एमयूएम अली सब्रिलेले पठाएको निम्तोलाई परराष्ट्र मन्त्री पौड्याललाई हस्तान्तरण गरेकी थिइन् । जवाफमा परराष्ट्रमन्त्री पौड्यालले आफूले श्रीलंकाको भ्रमण गर्ने जवाफ दिएकी हुन् ।

श्रीलंकाको स्वतन्त्रता दिवस फेब्रुअरी ४ (माघ २१) मा रहेको छ । श्रीलंका ७५ वर्षअघि बेलायतको उपनिवेशबाट स्वतन्त्र भएको थियो ।

दक्षिण एसियाली मुलुक श्रीलंकाले आर्थिक संकटका बाबजुद यसपटक विशेष रुपमा अन्तर्राष्ट्रिय पाहुनाहरु बोलाएर आफ्नो स्वतन्त्रता दिवस मनाउन लागेको छ । यस अवसरमा अन्य मुलुकबाट पनि विदेश मन्त्रीहरुको सहभागिता हुने पक्का भइसकेको छ ।

‘त्यसैले पनि हाम्रो मन्त्रीज्यूले श्रीलंकाको भ्रमण गर्न लाग्नु भएको हो,’ परराष्ट्रका एक कूटनीतिक अधिकारीले भने । परराष्ट्र मन्त्रालयले भने भ्रमणबारे औपचारिक रुपमा घोषणा गर्न भने बाँकी नै छ ।

प्रकाशित : माघ १५, २०७९ २१:००
पूरा पढ्नुहोस्
प्रतिक्रिया
पठाउनुहोस्
×