निजामती सेवा ऐन दुई महिनाभित्र संसद्मा टेबल गर्छु : मन्त्री मोदी
मोरङ — संघीय मामिला तथा सामान्य प्रशासनमन्त्री अमनलाल मोदीले निजमाती सेवा ऐन चालु अधिवेशनमा नै दुई महिनाभित्र संसद्मा टेबल गर्ने बताएका छन् । प्रेस सेन्टर मोरङले शुक्रबार विराटनगरमा आयोजना गरेको पत्रकार सम्मेलनमा मन्त्री मोदीले सरोकारवालासँग छलफल भइरहेकाले चाँडै सबैको सहमतिमा कर्मचारीलाई न्याय हुने गरी निजामती सेवा ऐन संसद्मा टेबल गर्ने बताएका हुन् ।
‘नयाँ सरकारले २० प्रतिशत कर्मचारी भर्ना गरेर काम गर्न पाउने व्यवस्थाबारे समेत बहस र छलफल भइरहेको छ,’ उनले भने, ‘अहिलेको प्रविधि युगमा यति धेरै कर्मचारी आवश्यक भए/नभएको बारेमा समेत अध्ययन गरिरहेको छु ।’
कर्मचारीहरुलाई आ–आफ्ना दरबन्दी भएको ठाउँमा हाजिर भएर काम गर्न निर्देशन दिएको मन्त्री मोदीले बताए । ‘काठमाडौंमा नै बस्ने कर्मचारीको प्रवृत्ति रहेकाले त्यस्ता बरन्डामा बस्ने कर्मचारीहरुको सूची बनाउँदै छु,’ उनले भने, ‘मन्त्रालयमा वर्षौंदेखि एउटै शाखा एकै जना कर्मचारी बसिरहेको अवस्थामा परिवर्तन ल्याउँछु ।’ मन्त्रालयमा कार्यरत कर्मचारीहरूलाई दुई वर्षमा शाखा परिवर्तन, ३ वर्षमा सरुवा, ४ वर्षमा पालिकामा काम गर्न जानुपर्ने मोदीको भनाइ थियो ।
कर्मचारीतन्त्रमा हालसम्म देखिएका बेथिति अन्त्य गर्ने उनले प्रतिबद्धता जनाए । ‘सांसद तथा नेताहरूले आ-आफ्ना क्षेत्रका पालिकामा नाम तोकेरै प्रमुख प्रशासकीय अधिकृत पठाइदिन सिफारिस गर्न थालेका छन्,’ उनले भने, ‘पावर र पैरवीका आधारमा कुनै पनि कर्मचारीको सरुवा हुँदैन र कानुनअनुसार कर्मचारीले तोकिएको ठाउँमा तोकिएको अवधिसम्म इमानदार भएर सेवा प्रवाह गर्नुपर्छ ।’ सुशासन कायम गरेर जनतामा आशा जगाउने गरी सबैले आ–आफ्नो जिम्मेवारी इमानदारितापूर्वक निर्वाह गर्न उनले निर्देशन दिए ।
प्रतियोगिताको उद्घाटन गर्दै नगर प्रमुख शाक्यले खेलकुदले विद्यार्थीलाई अनुशासित बनाउनुको साथै शारीरिक रूपमा स्वास्थ्य बनाउन पनि मद्दत गर्ने भएकाले विद्यार्थी जीवनमा खेलकुदको धेरै महत्त्व भएको बताए । 
