धनकुटा महोत्सवको तयारी अन्तिम चरणमा
धनकुटा — माघ ६ देखि ११ सम्म हुने प्रादेशिक व्यापार मेला तथा कृषि प्रदर्शनी एवं पाँचौं धनकुटा महोत्सवको तयारी अन्तिम चरणमा पुगेको छ । ‘कृषि, पर्यटन, स्वास्थ्य, शिक्षा, स्वरोजगार, उद्योग व्यापार समुन्नत प्रदेशको आर्थिक विकासको आधार’ महोत्सवको नारा हो ।
महोत्सवमा एकीकृत व्यापार रणनीतिमा समावेश अलैंची, अदुवा, अल्लो, ओलन, अकबरे लगायतका १९ प्रकारका कृषिजन्य उत्पादित वस्तुको प्रदर्शनी गरिने उद्योग वाणिज्य संघका अध्यक्ष विजयसन्तोषी राईले जानकारी दिए ।
महोत्सवको उद्घाटन प्रधानमन्त्री पुष्पकमल दाहाल र समापन प्रदेश १ का मुख्यमन्त्री हिक्मतकुमार कार्कीबाट हुनेछ । महोत्सवको १ सय ८० स्टलमध्ये १ सय ३७ स्टलमा कृषि प्रदर्शनी गरिने आयोजकले जनाएको छ । हरेक दिन राष्ट्रिय तथा स्थानीयस्तरका कलाकारबाट सांगीतिक प्रस्तुति दिइनेछ ।