सिधुवा आगलागी : ४९ लाख रुपैयाँबराबरको क्षति भएको अनुमान

घटनापछि शनिबार प्रहरीले गरेको मुचुल्काअनुसार चार पूर्ण र दुई आंशिकसहित ६ घरमा क्षति पुगेको जनाएको छ । स्थानीय काउली चोकको सन्तबहादुर राईको घरमा डेरा गरी बस्ने ललिता राईले सञ्चालन गर्दै आएको फ्रेस हाउसबाट आगलागी सुरु भएको प्रहरीले जनाएको छ ।

घटनामा सबैभन्दा बढी राईको क्षति भएको थियो । उनको दुईतले पक्की घरमा ३७ लाख रुपैयाँबराबरको क्षति पुगेको थियो । उनीसहित स्थानीय डिकबहादुर खड्का, होमबहादुर थापा, झमक थापा, अर्जुन घिमिरे र डम्बर थापाको घर क्षति पुगेको छ । डिकबहादुर र होमबहादुरको संयुक्त दुई तले घरमा साढे ५ लाख, झमकको ५, अर्जुनको १ र डम्बरको ५० हजार बराबरको क्षति पुगेको प्रहरीले जनाएको छ ।

यसैबीच, अग्निपीडितलाई जिल्ला विपद् व्यवस्थापन समिति, नेपाल रेडक्रस सोसाइटी र छथर जोरपाटी गाउँपालिकाले राहत वितरण गरेका छन् । विस्थापित परिवारलाई तत्काल वैकल्पिक बसोबासको व्यवस्था मिलाइएको प्रमुख जिल्ला अधिकारी युवराज कट्टेलले जानकारी दिए ।