प्रदेश १ उपसभामुखमा कांग्रेसकी राई र एमालेकी दनुवारको उम्मेदवारी दर्ता- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

प्रदेश १ उपसभामुखमा कांग्रेसकी राई र एमालेकी दनुवारको उम्मेदवारी दर्ता

देवनारायण साह

मोरङ — प्रदेश १ उपसभामुखमा नेपाली कांग्रेसकी लिलाकुमारी राई र सत्तारूढ एमालेकी सिर्जना दनुवारले उम्मेदवारी दर्ता गराएका छन् । ६२ वर्षीया राई र ४६ वर्षीया दनुवार दुबै जना उदयपुरबाट समानुपातिक सांसद बनेका हुन् ।

राईकाे प्रस्तावकमा कांग्रेसकी खगेश्वरी पाैडेल र समर्थकमा नेकपा (एकीकृत समाजवादी) की विद्या चाम्लिङ राई समर्थक रहेका छन् ।

दनुवारकाे प्रस्तावकमा माओवादी केन्द्रका प्रदेश सांसद नारायण बुर्जामगर र समर्थकमा राप्रपाकी सबिजा बजगाईँ छन् ।

प्रदेशसभाको बिहीबार बसेको बैठकमा नवनिर्वाचित सभामुख बाबुराम गौतमले प्रदेश उपसभामुखको निर्वाचन शनिबार बिहान ११ बजेका लागि तोकेका छन् ।

प्रदेशसभा सचिव गोपालप्रसाद पराजुलीले बिहीबार सर्वदलीय बैठकबाट उपसभामुख निर्वाचनको कार्यक्रमसम्बन्धी सूचना सार्वजनिक गरेका थिए ।

दलीय भागबण्डामा सत्तारूढ दलमध्ये प्रदेश १ को उपसभामुख एमालेको भागमा परेको छ । सत्तारूढ दलमध्ये एमालेका ४०, माओवादी केन्द्रका १३, राप्रपाका ६ र जनता समाजवादी पार्टीका १ गरी ६० जना प्रदेश सांसद छन् । प्रमुख प्रतिपक्षी दल कांग्रेसका २९ र प्रतिपक्षी दल एकीकृत समाजवादीका ४ जना प्रदेश सांसद छन् ।

प्रकाशित : पुस २९, २०७९ १६:३६
प्रतिक्रिया
पठाउनुहोस्

वीरगन्जमा खाद्यले खरिद गर्‍यो ४ करोड ३५ लाखको धान

शंकर आचार्य

पर्सा — खाद्य व्यवस्था तथा व्यापार कम्पनी लिमिटेड वीरगन्ज शाखाले यस वर्ष किसानबाट करिब १३ हजार ८ सय ९० क्विन्टल धान खरिद गरेको छ । शाखाले यस वर्ष पुस ११ देखि धान खरिद सुरु गरेकोमा बिहीबारसम्म शाखा परिसरमा किसानको धान तौल गरिएको हो ।

शाखा प्रमुख विकास कटुवालका अनुसार यस वर्ष शाखाले प्रति क्विन्टल ३ हजार १ सय २८ रुपैयाँको दरले ४ करोड ३५ लाख रुपैयाँ बराबरको धान खरिद गरेको हो । शाखाले पुस २२ गते नै धान खरिद बन्द गरेकोमा शाखा परिसरमा भित्रिसकेको धान यस अवधिमा तौल गरिरहेको थियो ।

यस वर्ष बाराको फेटा गाउँपालिका र पर्साको पोखरिया नगरपालिका, बिन्दवासिनी तथा जगरनाथपुर गाउँपालिकाका किसानले बढी धान बिक्री गर्न ल्याएको उनले बताए । शाखाले यस वर्ष सोना मन्सुली धान १० हजार र जिरा मसिनो धान २ हजार क्विन्टल गरी कूल १२ हजार क्विन्टल धान खरिदको कोटा पाएको थियो । तर किसानले जिरा मसिनो धान नल्याएपछि शाखाले त्यस बराबरको सोना मन्सुली धान नै खरिद गरेको थियो ।

पछि केन्द्रबाट यस वर्षको कोटामा थप गरी कूल १५ हजार क्विन्टलसम्म धान खरिदको अनुमति पाएको थियो । त्यस कारण शाखाले पुस २२ सम्म मात्र धान खरिद गर्ने घोषणा गरेर १५ हजार क्विन्टल धान शाखा परिसरमा भित्रिसकेको अनुमान गरी नयाँ धान बोकेका ट्याक्टरलाई शाखा परिसरमा प्रवेशमा रोक लगाएको थियो ।

संघीय सरकारले यस वर्ष सोना मन्सुली धानको समर्थन मूल्य प्रति क्विन्टल ३ हजार १ सय २८ रुपैयाँ निर्धारण गरेको थियो । यस वर्ष शाखाले किसानको न्यूनतम २५ देखि अधिकतम ६० क्विन्टलसम्म धान खरिद गरेको थियो । गत वर्ष शाखाले १७ हजार क्विन्टल सोना मन्सुली धान खरिद गरेको थियो ।

प्रकाशित : पुस २९, २०७९ १६:३१
पूरा पढ्नुहोस्
प्रतिक्रिया
पठाउनुहोस्
×