कर्मचारीलाई पैदलमार्ग- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

कर्मचारीलाई पैदलमार्ग

आनन्द गौतम

ताप्लेजुङ — फक्ताङलुङ–६ लेलेप इलाडाँडाका १२ जनाको टोलीले लेलेप सुकेपानीदेखि ओलाङचुङगोलासम्मको १६ किमि लामो पैदलमार्ग मर्मत गरेका छन् । बीचमा खाने, बस्ने ठाउँ नभएकाले यो टोलीले पाल, कम्बल, खाना पकाउने सामग्री र भाडावर्तन लिएरै हिँडेको थियो । बाटोनजिकैको ओडार र चौरमा पाल टाँगेर बस्ने, पकाउने, खाने गरेर एक सातामा बाटो मर्मत गरेका हुन् ।

ओलाङचुङगोलादेखि याङमासम्मको बाटो मर्मतको जिम्मा गोला र याङमावासीले लिए । पहिरोले भत्काएर पाइला राख्नै नहुने बाटो चौडा बनाएका छन् । साना खोलामा काठे पुल राखेका छन् । चुनाव गराउनका लागि सदरमुकाम फुङलिङबाट जाने कर्मचारीको सहजताका लागि उनीहरूले दिनरात लागेर पैदलमार्ग बनाएका हुन् ।

खहरे तथा ठाडा खोला, वर्षामा आउने बाढी र पग्लेर बहने हिउँका डल्लाले यहाँका पैदलमार्ग बर्सेनि बिगार्छ । ‘पहिला हिँडेकाहरूले मार्गको पहिचान गर्न सक्ने भए पनि नयाँका लागि त्यो कठिन हुन्छ,’ केशेङहाङले भने, ‘बाटो नबनाउँदा नयाँ मान्छे त भुलिएर हैरानै हुन्छन् ।’

फक्ताङलुङ गाउँपालिका–६ लेलेपको घुन्सा, फले, ग्याब्ला, वडा–७ को ओलाङचुङगोला र याङमामा उम्मेदवारहरू भोट माग्न पुगेनन् । तर मतदान गराउने कर्मचारीहरू भने सदरमुकाम फुङलिङबाट हिँडिसकेका छन् । तिनै कर्मचारीको सहजताका लागि पैदलमार्ग समयमै निर्माण गरिदिएको फक्ताङलुङ गाउँपालिका–७ ओलाङचुङगोलाका वडाध्यक्ष छेतेन शेर्पा लामा बताउँछन् । उनका अनुसार दुई दिनको पैदलमार्ग निर्माणका लागि वडाले करिब डेढ लाख रुपैयाँ छुट्याएको हो । ३२ सय मिटरको ओलाङचुङगोलादेखि ४ हजार २ सय मिटरको याङमासम्म न्यून ज्यालामा स्थानीयले काम गरेका छन् ।

सदरमुकाम फुङलिङबाट याङमा पुग्न कम्तीमा तीन दिनसम्म लाग्छ । फुङलिङबाट एक दिनमा लेलेपको इलाडाँडा पुगिन्छ । त्यहाँबाट ८ देखि १० घण्टाको पैदल यात्रामा गोला पुगिन्छ । गोलाबाट दिनभरि हिँड्नसके याङमा पुगिन्छ । लेक लाग्ने जोखिम भएकाले विशेष ध्यान पुर्‍याएर जानुपर्ने वडाध्यक्ष शेर्पा बताउँछन् ।

भौगोलिक दृष्टिले डोल्पा र हुम्लापछिको तेस्रो ठूलो जिल्ला ताप्लेजुङको याङमामा ६१ मतदाता छन् । गत स्थानीय तहको चुनावमा यहाँ १४ मत झरेको थियो । २ सय ८४ मतदाता रहेको छिमेकी बस्ती ओलाङचुङगोलामा ८५ मत खस्दा १ सय ६९ रहेको घुन्सामा ८१ र ६७ मतदाता रहेको ग्याब्लामा ३२ मत खस्यो । यो पटक पनि त्यही अनुपातमा मत झर्ने आकलन स्थानीयको छ । लामो पैदलयात्रा गर्नुपर्ने भएकाले निर्वाचन गराउने कर्मचारीले सदरमुकामबाट सबैभन्दा चाँडो हिँड्नुपर्छ ।

सबैभन्दा ढिलो मतपेटिका आइपुग्ने पनि यहींको हुन्छ । सरकारले यी केन्द्रका मतपेटिका हेलिकोप्टरबाट ढुवानी गर्ने बताएको छ । २०७४ र गत स्थानीय निर्वाचनमा पनि हेलिकोप्टरबाट ल्याउने बताइएको थियो । तर मौसमअनुकूल नहुँदा पैदलै ल्याउनुपर्‍यो । पातलो बस्ती र कम जनसंख्या रहेको हिमाली क्षेत्रमा मोटरबाटोको पहुँच पुगेको छैन । हरेक वर्षायाममा चल्ने खहरे खोला र हिउँका ढिस्का पग्लिएर खस्दा पैदलमार्ग बिग्रने गरेको वडाध्यक्ष शेर्पा बताउँछन् ।

बाक्लो हिउँ पर्ने पुस, माघ जस्तो मौसम र असार, साउनजस्तो बर्खायाममा त हिमाली बस्तीका गाउँमै थुनिन्छन् । यी क्षेत्रका मार्गहरू अवरुद्ध नै हुन्छन् । भौगोलिक कठिनाइका बाबजुद सुरक्षित मतपेटिका सदरमुकामसम्म ल्याउने दायित्व चुनावमा खटिएका कर्मचारीको हुने प्रमुख जिल्ला अधिकारी महेशकुमार पोख्रेल बताउँछन् ।

प्रकाशित : मंसिर ३, २०७९ ०९:५९
प्रतिक्रिया
पठाउनुहोस्

नागरिक एपबाट मतदान केन्द्र र क्रम संख्या थाहा पाउन सकिने

कान्तिपुर संवाददाता

काठमाडौँ — आइतबार हुने प्रतिनिधि सभा र प्रदेश सभा निर्वाचनका लागि मतदातासम्बन्धि विवरण नागरिक एपमा पनि राखिएको निर्वाचन आयोगले जनाएको छ । एपमा रहेको ‘मतदाता परिचय–पत्र’ अप्सनमा गएर मतदाता परिचय पत्र नम्बर राखेपछि आफ्नो मतदान केन्द्र, क्रम संख्या र मतदान केन्द्रको भूअवस्थिति थाहा पाउन सकिन्छ ।

नागरिक एपमा मतदाता परिचय पत्र लिंक गरी विविध जानकारी प्राप्त गर्न सकिने गरी आयोगले जानकारी दिएको छ । यसका लागि आफ्नो मतदाता परिचय पत्र नम्बर भने थाहा हुनुपर्छ । त्यो थाहा पाउन आयोगको वेबसाइटमा गएर मतदाता नामावलीमा क्लिक गरी प्रदेश, जिल्ला, पालिका, वडा नम्बर छानेर मतदाताले आफ्नो परियच पत्र नम्बर हेर्न मिल्छ।

‘कुन मतदान केन्द्रमा आफ्नो नाम छ र कुन क्रम संख्यामा नाम छ भनेर थाहा पाउन नागरिक एपबाटै खोजी गर्न मिल्ने प्रबन्ध मिलाइएको छ,’ आयोगका सूचना प्रविधि शाखाका कम्प्युटर इन्जिनियर सुरेश बसौलाले भनेका छन्, ‘हामीले दिएका मतदान नामावली मतदान केन्द्रहरूमा प्रिन्ट भर्सनमा गएका हुन्छन् । प्रिन्टमा क्रम संख्या हेरेर आफ्नो विवरण थाहा पाउन समय लाग्न सक्छ । अब नागरिक एपमार्फत कति नम्बरमा आफ्नो नाम छ भनेर सहजै क्रम संख्या हेर्न मिल्छ ।’ सोही एप्लिकेसनबाट मतदाताले आफ्नो मतदान केन्द्रको भूअवस्थिति पनि थाहा पाउन सक्ने बसौलाले बताएका छन् ।

प्रकाशित : मंसिर ३, २०७९ ०९:५७
पूरा पढ्नुहोस्
प्रतिक्रिया
पठाउनुहोस्
x
×