तमोर नदीमा खसेर वृद्धको मृत्यु
धनकुटा — धनकुटा नगरपालिका ९ मूलघाटस्थित तमोर नदीको पुलबाट आइतबार बिहान एक वृद्धको खसेर मृत्यु भएको छ ।
मृत्यु हुनेमा स्थानीय ८० वर्षीय हर्कबहादुर साम्पाङ रहेको प्रहरीले जनाएको छ ।
बिहान पौने ११ बजे पुलबाट नदी किनारमा खसेका उनको घटनास्थलमै मृत्यु भएको जिल्ला प्रहरी प्रमुख एसपी लक्ष्मीराज अधिकारीले जानकारी दिए । मादक पदार्थ सेवन गरेका कारण पुलबाट खसेको प्रारम्भिक अनुसन्धानबाट खुलेको उनले बताए । घटनालगत्तै मूलघाटमा गएका मलामीहरुले प्रहरीलाई खबर गरेका थिए ।
करिब ५० मिटर अग्लो पुलबाट नदी किनारमा रहेको ढुंगामा बज्रिँदा साम्पाङको मृत्यु भएको प्रत्यक्षदर्शी गोपाल बराइलीले जानकारी दिए ।
घटनाबारे थप अनुसन्धान भइरहेको प्रहरीको भनाइ छ ।
प्रतिक्रिया