कान्तिपुर वेबसाईट
AdvertisementAdvertisement
१९.१२°C काठमाडौं
काठमाडौंमा वायुको गुणस्तर: २५४

सडक सञ्जाल : सधैंको चुनावी मुद्दा

मध्य पहाडी लोकमार्ग चाँडो बनेमा पूर्वी तराई हुँदै राजधानी काठमाडौंसँगको दूरीसमेत कम हुने आसमा स्थानीय मतदाता
चन्द्र कार्की

तेह्रथुम — प्रतिनिधि र प्रदेशसभा निर्वाचनमा उम्मेदवारले ग्रामीण सडकलाई सदरमुकामसँग जोड्ने र जनजीविकाको विषयलाई प्रमुख चुनावी मुद्दा बनाएका छन् । सडक सञ्जाल अभावमा स्थानीय कृषि उत्पादन र जडीबुटी बाहिर पठाउन नसक्दा स्थानीय किसानपीडित छन् ।

सडक सञ्जाल : सधैंको चुनावी मुद्दा

कांग्रेसका उम्मेदवार सीता गुरुङले आठराई क्षेत्र हुँदै सदरमुकाम म्याङलुङ र छथर क्षेत्रको शुक्रबारे हुँदै म्याङलुङ जोड्ने मुख्य सडक मार्गको स्तरोन्नति गरी सवारी आवागमन सहज बनाउने प्रतिवद्धता व्यक्त गरेकी छन् । राष्ट्रिय गौरवको आयोजना मध्यपहाडी लोकमार्ग यही जिल्ला भएर निर्माण भइरहेकाले सडक चाँडो बनेमा पूर्वी तराई हुँदै राजधानी काठमाडौंसँगको दूरीसमेत कम हुने आसमा स्थानीय मतदाता छन् ।

संक्रान्तिबाट म्याङलुङ आउने ६७ किलोमिटर सडक बनिसकेको छ । तर बीचका केही स्थानमा पुल निर्माण र सडकको स्तरोन्नति भने बाँकी छ । सडक बनेमा अहिले बारीमै खेर गइरहेको उत्पादनले बजार पाउने फेदाप गाउँपालिका औंसीका युवा सञ्जय मास्केले बताए । आर्थिक उपार्जनका आधार खोज्ने र युवालाई गाउँगाउँमा रोजगारी सृजना गराउने आश्वासन पनि उम्मेदवारले बाँडिरहेका छन् ।

‘जिल्लाको समृद्धिका लागि व्यवस्थित सडक सञ्जाल हाम्रो पहिलो मुद्दा हो,’ प्रतिनिधिसभाका लागि एमालेका उम्मेदवार डा. विजय सुब्बाले भने । २०७४ मा सम्पन्न प्रदेश र प्रतिनिधिसभा निर्वाचनमा पनि एमाले र कांग्रेसका उम्मेदवारले यिनै मुद्दालाई जोडतोडका साथ उठाएका थिए । दुवै दलका उम्मेदवारले पर्यटनको मुद्दालाई पनि प्राथमिकतामा राखेका छन् । एकै स्थानमा २८ प्रजातीका गुराँस फुल्ने तीनजुरे मिल्के जलजले, दक्षिण एसियाकै अग्लो भनीएको ह्यात्रुङ झरना, तमोर नदीमा र्‍याफ्टिङलगायतका पर्यटकीय संभावना बोकेका क्षेत्रको विकास गरी पर्यटक भित्र्याउने योजना पार्टीको रहेको एमाले पूर्वअध्यक्ष लक्ष्मण तिवारीको भनाइ छ ।

७ दशमलव ५ मेगावाटको खोरुङगा खोला जलविद्युत् आयोजना निर्माण गरेर जिल्लालाई उज्यालो बनाउने काम गरेको एमालेले तमोर जलाशययुक्त आयोजना निर्माण गरी जिल्लाबासीलाई सेयरधनी बनाउने एजेन्डा पनि अघि सारेको छ । चुनावी वाचा, जितेपछि हुँदैन पूरा

कांग्रेस र एमालेले स्थानीय उत्पादन अदुवा, अकबरे, दूध, चिया र बन्दाको जिल्लामै प्रशोधन उद्योग स्थापना र भण्डारण स्थल निर्माण गर्ने वाचा दोहोर्‍याएका छन् । प्रशोधन र भण्डारण केन्द्र नहुँदा उत्पादनको राम्रो मूल्य नपाइरहेको किसानको गुनासो छ ।

२०७४ को निर्वाचनमा पनि कांग्रेस र एमाले दुवै दलका उम्मेदवारले यिनै मुद्दालाई प्रमुखताका साथ उठाएर मतदाता समक्ष भोट मागेका थिए । कांग्रेस उम्मेदवारले चुनाव हारे । एमालेले जित्यो । तर विकास निर्माणका काम त परको कुरा, विजयी सांसद भवानीप्रसाद खापुङ नै अहिले एमालेसँग छैनन् । प्रत्येक चुनावमा जिल्लामा प्रशोधन केन्द्र खोल्ने पार्टीले नीति नै लिएको बताउने गरेका दलले चुनाव पछि यस्ता मुद्दा बिर्सने गरेका छन् । यस्तो अवस्थामा पनि कांग्रेस र एमाले दुवैले प्रतिनिधिसभाको १ र प्रदेशसभाका दुवै सिट जित्ने दाबी गर्दै आएका छन् ।

प्रतिनिधिसभामा सत्ता गठवन्धनबाबट कांग्रेसक गुरुङ र एमालेबाट सुब्बा उम्मेदवार छन् । प्रदेशसभा १ मा एमाले प्रदेश कमिटि सदस्य रहेका किशोरचन्द्र दुलाल उम्मेदवार छन् । दुलाल पूर्वजिविस सभापति हुन् । कांग्रेसले भने सत्ता गठबन्धन दलको सहयोगमा युवा नेता सन्तोष सुब्बालाई उम्मेदवार बनाएको छ । उनी कांग्रेस महाधिवेशन प्रतिनिधि हुन् ।

एमाले जिल्ला अध्यक्ष रहेका तेजमान कन्दङवा प्रदेशसभा २ बाट उम्मेदवार बनेका छन् । कन्दङवा २०७४ को निर्वाचनमा प्रदेश सभा सदस्य निर्वाचित भएका थिए । सत्ता गठवन्धनबाट नेकपा माओवादी केन्द्रका केन्द्रीय सदस्यसमेत रहेका युवा नेता दुर्गाप्रसाद चापागाईले उम्मेदवारी पाएका छन् । २०७० को दोस्रो संधिवानसभा निर्वाचनमा चापागाई माओवादी पार्टीबाट संविधानसभा सदस्यका उम्मेदवार थिए । उनले त्यतिबेला जिल्लामा तेस्रो मत प्राप्त गरे । सत्ता सहयात्री रहेको नेपाल कम्युनिस्ट पार्टी (एस) का जिल्ला अध्यक्ष कृष्ण चोङवाङले प्रदेशसभा १ को सदस्यका लागि उम्मेदवारी दिए पनि अन्तिमा आएर कांग्रेसलाई समर्थन गर्दै उम्मेदवारी फिर्ता लिएका थिए ।

प्रतिनिधिसभाको एक सिटका लागि एक स्वतन्त्रसहित ९ राजनीतिक दलका १० जनाले उम्मेदवारी दिएको निर्वाचन अधिकृत निराज शर्माले जानकारी दिए । त्यस्तै प्रदेश निर्वाचन क्षेत्र १ मा एक स्वतन्त्र सहित ८ राजनीतिक दलका ९ जनाको उम्मेदवारी परेको छ । प्रदेश निर्वाचन क्षेत्र २ मा पनि एक स्वतन्त्रसहित ७ राजनीतिक दलका ८ जना उम्मेदवार छन् । वडा तह सम्म नै पार्टीको संगठन राम्रो रहेकाले मतदाता थप उत्साहित भएकाले जित सुनिश्चित रहेको दाबी एमालेको छ । कांग्रेसले पनि आफूहरू जनतामाझ लोकप्रिय रहेकाले पार्टीका उम्मेदवारले जित्ने दाबी गरेको छ ।

प्रकाशित : आश्विन २८, २०७९ ०८:१०
प्रतिक्रिया
पठाउनुहोस्
जनताको राय

पूर्वउपराष्ट्रपतिका छोरा तथा अखिल क्रान्तिकारीका महासचिव दिपेश पुनपछि सत्तारूढ माओवादीका उपाध्यक्ष तथा पूर्वसभामुख कृष्णबहादुर महरा सुन तस्करी अनुसन्धानमा पक्राउ परेका छन् । के सरकारले भ्रष्टाचारविरुद्ध शून्य सहनशीलता अपनाएकै हो त ?