गुड्दै गरेको बसमा आगो लाग्यो- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

गुड्दै गरेको बसमा आगो लाग्यो

डम्बरसिं राई

खोटाङ — काठमाडौंबाट दिक्तेल आउँदै गरेको बसमा आगलागी भएको छ । बा ३ ख ८९८१ नम्बरको गुड्दै गरेको बसमा हलेसी तुवाचुङ नगरपालिका–१ बाहुनीडाडाँको कदुवामा शनिबार दिउँसो साँढे चार बजे आगलागी भएको हो ।

जिल्ला प्रहरी कार्यालय खोटाङका प्रवक्ता प्रहरी निरीक्षक रामबालक रायका अनुसार गाडीको इन्जिनमा समस्या आएपछि कारण आगलागी भएको हो । मानवीय क्षति भने नभएको प्रहरीले जनाएको छ । बस भने पूर्ण रुपमा क्षति भएको प्रत्यक्षदर्शी उमेश ढुङ्गानाले बताए ।

बसमा आगो लागेपछि आफूहरू निस्किएको दिक्तेल रुपाकोट मझुवागढी नगरपालिका–१३ नुनथलाका जगशेर राईले बताए । ‘बसमा उभिएर; बसेर खचाखच यात्रु थियौं‚’ राईले भने‚ ‘आगो लागेपछि भागभाग भयो ।’ प्रहरीले भने ३७ जना मात्र यात्रु भएको जनाएको छ ।

प्रकाशित : आश्विन १५, २०७९ १७:४१
प्रतिक्रिया
पठाउनुहोस्

अधिकार माग्दै बालबालिका

तुलाराम पाण्डे

तिलागुफा, कालीकोट — बालबालिकामा लगानी वृद्धि गरी बालअधिकार सुनिश्चित गर्न कालिकोटमा आयोजित बाल कचहरीका सहभागीले जोड दिएका छन् । बालबालिकाविरुद्ध हुने हिंसा अन्त्यका लागि नगर उपप्रमुखसँग बालबालिका कार्यक्रमअन्तर्ग‍त बाल कचहरीका सहभागीले बालबालिकाविरुद्ध हुने सबैखाले हिंसा कम गर्न लगानी वृद्धि हुनुपर्नेमा जोड दिएका हुन् । 


कार्यक्रममा तिलागुफा ६ जुविथाकी १५ वर्षीया जानकी शाहीले विद्यालयमा महिनावारी हुँदा प्याड फेर्नकै लागि दिउँसो घर जानुपर्ने बाध्यता रहेको सुनाउँदै नगरले बालबालिकाको शिक्षा, सुरक्षा र संरक्षणमा लगानी गर्नुपर्ने बताइन् । ‘विद्यालयमा व्यवस्थित खानेपानी, छात्रामैत्री शौचालयको अभाव छ; कहिले पूरा हुन्छ ?’ तिलागुफाका नगर उपप्रमुख महेन्द्रबहादुर शाहीको सहभागितामा आयोजित बाल कचहरीमा जानकीले सोधिन्‚ ‘नगरको बजेट सडकमा मात्र केन्द्रित हुने कहिलेसम्म ?’

बालअधिकार सबैको सरोकार भन्ने नारालाई व्यवहारमा उतार्न बालबालिकाको क्षमता विकास, अर्थपूर्ण सहभागिता र घर तथा विद्यालयका आधारभूत आवश्यकता पूरा गर्न स्थानीय सरकार चुकेको अर्का बालक दीपेन्द्र शाहीले दाबी गरे ।

कार्यक्रममा उपस्थित बालबालिकाहरूले बालविवाह अन्त्य गर्ने विषयमा बेवास्ता गरेको बताए । नागरिक सवलीकरण परियोजनाको सहयोगमा आयोजित बाल कचहरीमा यहाँका सरोकारवालाले नगरपालिकाले बालबालिकाको अधिकार संरक्षणका लागि बजेट विनियोजन गरेर खर्च गर्ने प्रतिबद्धता जनाए ।

तिलागुफामा बालविवाह, बाल श्रम, बालबालिकाको ओसारपसार, बालहिंसा, छोराछोरीमा लैगिंक विभेद कायमै रहेको सुनाउँदै त्यसको अन्त्यका लागि आवश्यक नीति र कार्यक्रमसहित योजना बनाइने नगर उपप्रमुख शाहीले बताए ।

प्रकाशित : आश्विन १५, २०७९ १७:३८
पूरा पढ्नुहोस्
प्रतिक्रिया
पठाउनुहोस्
×