खोटाङमा बढ्यो महँगी- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

खोटाङमा बढ्यो महँगी

डम्बरसिं राई

खोटाङ — दसैं, तिहारजस्ता चाडका बेला जिल्लामा उपभोग्य वस्तुको मूल्य बढेको छ । चामल, ग्यास, चिनीलगायत वस्तुमा महँगी बढेको खोटाङ उद्योग वाणिज्य संघका अध्यक्ष उपीनकुमार राईले बताए । उनका अनुसार जिरा मसिना चामलको मूल्य प्रतिकेजी ९० रुपैयाँको दरले प्रतिबोरा २२ सय ५० रुपैयाँ, सोना मन्सुलीको प्रतिकेजी ६० रुपैयाँको दरले बोराको १७ सय रुपैयाँ पुगेको छ ।

अन्य चामलको मूल्य पनि बढेको छ । मैदा प्रतिकेजी ६० बाट बढेर ८० रुपैयाँ पुर्‍याइएको छ । मैदा र चामलमा पहिलेको तुलनामा २० प्रतिशत मूल्य बढेको राईको भनाइ छ ।

चिनीको मूल्य एक सय रुपैयाँ पुगेको छ । मूल्य वृद्धि भए पनि बजारमा चिनी अभाव देखिएको छ । कालो दालको मूल्य प्रतिकेजी दुई सय रुपैयाँ पुगेको छ । नुनको मूल्य तीस रुपैयाँ छ । ग्यासको मूल्य पनि आकाशिएको छ । ग्यास प्रतिसिलिन्डर दुई हजार एक सय ५० रुपैयाँ पुगेको छ ।

जिल्लाको उत्तरी क्षेत्रमा पर्ने केपिलासगढी गाउँपालिका केन्द्र बाक्सिलामा पनि उपभोग्य वस्तुको मूल्य बढेको छ । उद्योग वाणिज्य संघ केपिलासगढीका अध्यक्ष शिवकुमार राईका अनुसार जिरा मसिना प्रतिकेजी ८८ रुपैयाँको दरले प्रतिबोरा २२ सय, सोना मन्सुली प्रतिकेजी ५५ रुपैयाँको दरले प्रतिबोरा १६ सय ५० रुपैयाँ पुगेको छ । मैदा प्रतिकेजी ६७ रुपैयाँ पुगेको छ ।

दिक्तेलमा भन्दा बाक्सिलामा केही सस्तो देखिएको छ । ग्यास भने प्रतिसिलिन्डर २४ सय रुपैयाँ पुगेको छ । ‘तराईबाटै मूल्य बढेर आएकाले भाउ बढाउनु परेको हो’– राईले भने । जिल्लाको दक्षिण क्षेत्रमा पर्ने खोटेहाङ गाउँपालिकाको केन्द्र खोटाङ बजारमा पनि उपभोग्य वस्तुको मूल्य बढेको छ । स्थानीय व्यवसायी दिनेशकुमार थापाका अनुसार जिरा मसिना चामल प्रतिबोरा २२ सय, सोना मन्सुली प्रतिबोरा १६ सय ५० रुपैयाँ, मैदा प्रतिकेजी ८५ रुपैयाँ पुगेको छ । ग्यास प्रतिसिलिन्डर २२ सय रुपैयाँ पुगेको थापाले सुनाए । खानेतेलमा भने प्रतिलिटर ५० रुपैयाँले घटेको छ । ‘भन्न पनि लाजमर्दो, तराईबाटै मूल्य बढेर आएकाले नबढाई धरै पाइएन,’थापाले भने ।

महँगीमा पनि प्रशासन भने मौन बसेको उपभोक्ताको गुनासो छ । पुरानो सामान बिक्री भइरहेकाले कतिपय उपभोग्य वस्तु अखाद्य भइसकेको हुन सक्ने दिक्तेल बेसक्याम्पका स्थानीय नेत्र कटवालले बताए ।

प्रमुख जिल्ला अधिकारी सूर्यप्रसाद सेडाईंले भने यसबारेमा उद्योग वाणिज्य संघसंग बेला–बेलामा छलफल भइरहेको र बजार अनुगमन पनि भइरहेको बताए ।

प्रकाशित : आश्विन १३, २०७९ १६:०८
प्रतिक्रिया
पठाउनुहोस्

नुवाकोटमा ‘ट्राफिक प्रहरीको दुई मिनेट’ कार्यक्रम सञ्चालन

रासस

काठमाडौँ — जिल्ला ट्राफिक प्रहरी कार्यालय नुवाकोटले चाडपर्व लक्षित सुरक्षा योजनाअन्तर्गत चालक र सहचालकसँग छ बुँदे प्रतिबद्धता गराउन सुरु गरेको छ । 

चाडपर्वको समयमा हुनसक्ने सवारी दुर्घटना न्यूनीकरण गर्न र यात्रुवर्गलाई सहज यात्रा गराउन ट्राफिक प्रहरीले चालक तथा सहचालकलाई ‘ट्राफिक प्रहरीको दुई मिनेट’ कार्यक्रममार्फत छ बुँदे प्रतिबद्धता गराउन सुरु गरेको कार्यालयका वरिष्ठ प्रहरी नायब निरीक्षक गुणनिधि खकुरेलले जानकारी दिए । उनका अनुसार यात्रुलाई सम्मानजनक व्यवहार गर्नेदेखि चालक र सहचालक भएकामा गर्व गर्नेसम्मका विषयलाई प्रतिबद्धता जनाउन लगाइएको छ ।

प्रतिबद्धता पत्रमा 'म यात्रुलाई सम्मानजनक व्यवहार गर्छु, तोकिएको भाडादर भन्दाबढी भाडा लिने छैन, ट्राफिक नियमको पूर्ण पालना गर्छु, आरक्षण सिटको व्यवस्था अनुसार यात्रु व्यवस्थापन गर्नेछु, अपांगता भएका व्यक्ति, असहाय र विद्यार्थीले भाडा दरमा पाउने छुटको व्यवस्था गर्ने छु तथा आफू चालक र सहचालक भएकामा आफ्नो कामप्रति गर्व गर्दछु,' भनिएको छ ।

चाडपर्वको समयमा हुनसक्ने सवारी दुर्घटना रोक्न नियम पालनामा सचेत गराउन छ बुँदे प्रतिबद्धतासहित चालक र सहचालकलाई ट्राफिक प्रहरीले दुई मिनेट कार्यक्रममार्फत यात्रुदेखि सवारीसाधनको अवस्थाको जानकारी समेत संकलन सुरु गरेको छ ।

'यो समय (चाडपर्व)मा यात्रुलाई पर्नसक्ने समस्या र सवारीसाधनको अवस्था थाहा पाउन चोकपोष्ट र छड्के चेकजाँच गर्न थालेका छौं', खकुरेलले भने, 'सिट संख्याभन्दा धेरै यात्रु राख्ने, बढीभाडा असूल गर्ने, तोकिएको गन्तव्यसम्म नपुर्‍याउने समस्या हुन नदिन सचेत गराइरहेका छौं, हतार गर्ने, बिग्रेका साधन गुडाउने, एकजना चालकले लामो समयसम्म चलाउने लगायतका सम्भावित दुर्घटनाका कारण रोक्न सकिनेछ भन्ने विश्वास छ ।'

प्रकाशित : आश्विन १३, २०७९ १५:५७
पूरा पढ्नुहोस्
प्रतिक्रिया
पठाउनुहोस्
×