ट्याक्टरबाट खसेर खोटाङमा एक जनाको मृत्यु
खोटाङ — ट्याक्टरले किचेर खोटाङमा एक जनाको मृत्यु भएको छ । मंगलबार राति दिक्तेलबाट खार्मी गइरहेको प्रदेश १ २०–००३ त १४९२ नम्बरको ट्याक्टरले किचेर दिक्तेल रुपाकोट मझुवागढी नगरपालिका–११ का ५३ वर्षीय टेकबहादुर राईको मृत्यु भएको हो ।
दिक्तेलबाट आफ्नै पसलको सामान लिएर जाने क्रममा दिक्तेल रुपाकोट मझुवागढी नगरपालिका–२ सोल्मामा ट्याक्टरबाट खसेपछि त्यही ठाउँमा चक्काले किचेको प्रहरीले जनाएको छ ।
सडक भत्किएको ठाउँमा उक्त घटना भएको प्रहरी प्रवक्ता प्रहरी निरीक्षक रामवालक रायले बताए । उदयपुर चौदण्डीगढी नगरपालिका–४ घर भएका ट्याक्टर चालक २५ वर्षीय प्रभात राई प्रहरी नियन्त्रणमा छन् ।
शव पोस्टमार्टमका लागि जिल्ला अस्पताल दिक्तेलमा ल्याइएको छ । मृतकका आफन्त आएपछि पोस्टमार्टम गरिने प्रहरी निरीक्षक रामवालक रायले सुनाए ।
प्रकाशित : आश्विन १२, २०७९ ०८:२३