प्रदेश १ मा पर्यटन सूचना केन्द्र- प्रदेश १ - कान्तिपुर समाचार

प्रदेश १ मा पर्यटन सूचना केन्द्र

कान्तिपुर संवाददाता

मोरङ — प्रदेश १ मा आउने पर्यटकहरूलाई पर्यटकीय स्थलबारे सूचना तथा जानकारी प्रदान गर्न विराटनगरमा मंगलबार ‘पर्यटन सूचना केन्द्र’ स्थापना गरिएको छ । अन्तर्राष्ट्रिय पर्यटन दिवसको अवसरमा संघीय र प्रदेश सरकारको सहयोगमा नेपाल उद्योग वाणिज्य महासंघ प्रदेश १ ले विराटनगरको बरगाछीस्थित कार्यालयमा उक्त सूचना केन्द्र स्थापना गरेको हो ।

महासंघका केन्द्रीय सदस्य तथा प्रदेश १ उपाध्यक्ष एवम् मुख्यमन्त्रीका आर्थिक सल्लाहकार राजेन्द्र राउतले एक कार्यक्रमका बीच सूचना केन्द्रको उद्घाटन गरेका हुन् ।

सूचना केन्द्रमा प्रदेश १ लगायत देशभरिका पर्यटकीय गन्तव्य, होटल, ट्राभल्सलगायत सूचना पर्यटकहरूलाई उपलब्ध गराउने व्यवस्था गरिएको महासंघ प्रदेश १ का पर्यटन क्षेत्रका विषयगत समितिका सभापति भविस श्रेष्ठले बताए । ‘प्रदेश १ स्थित १४ वटै उद्योग वाणिज्य संघको कार्यालयमा पर्यटक सूचना केन्द्र स्थापना गरेर सेवा सञ्चालन गर्छौं,’ उनले भने, ‘सूचना केन्द्रमार्फत यस प्रदेशस्थित रानी, काँकडभिट्टा, पशुपतिनगरलगायत नाकामा पर्यटक डेस्कसमेत राखेर पर्यटकहरूलाई सेवा प्रदान गर्छौं ।’

पर्यटक डेस्कमार्फत भारतलगायत तेस्रो मुलुकबाट यस प्रदेशमा भित्रिने पर्यटकको तथ्यांक संकलन गर्ने व्यवस्था मिलाएको श्रेष्ठले सुनाए । उनले रानी नाकामा माइती नेपालसँगको सहकार्यमा पर्यटक डेस्क सञ्चालन गर्ने उनले बताए ।

महासंघका केन्द्रीय सदस्य राउतले प्रदेश १ मा धार्मिक पर्यटनको ठूलो सम्भावना रहेको र त्यसका लागि भारतीय पर्यटक भित्र्याउन सरकारले पर्यटकमैत्री सेवा सुविधा प्रदान गर्नु अपरिहार्य रहेको बताए । उनले भने‚ ‘यस प्रदेशस्थित पर्यटकीय गन्तव्यहरूबाट लाभ लिनका लागि सरकारले विराटनगर विमानस्थललाई क्षेत्रीय स्तरमा स्तरोन्नति गर्नु आवश्यक छ । साथै यस प्रदेशस्थित १६ वटै विमानस्थलमा विराटनगर विमानस्थलबाट उडान हुनु आवश्यक छ ।’ पर्यटकहरूलाई आवश्यक पर्ने यातायात सेवाको पनि उपयुक्त व्यवस्था नभएकाले तीनै तहका सरकारले पूर्वाधारमा सहयोग गर्नुपर्ने उनले बताए ।

‘बढीभन्दा बढी पर्यटक भित्र्याउन भारतीय पर्यटकका लागि ५ सय र २ हजारको भारतीय नोट ल्याउन सरकारले खुल्ला गर्नुपर्छ,’ राउतले भने, ‘सरकारले नाकाहरूमा सटही काउन्टको व्यवस्था तत्काल गर्नुपर्छ ।’

प्रकाशित : आश्विन ११, २०७९ १८:२९
प्रतिक्रिया
पठाउनुहोस्

पर्यटकीय गन्तव्य खोज्दै पदयात्रा

कान्तिपुर संवाददाता

भक्तपुर — चाँगुनारायण नगरपालिकाले पर्यटकीय गन्तव्य खोज्दै ‘चाँगुनारायण पर्यटन वर्ष २०८२’ को तयारी थालेको छ । नगरप्रमुख जीवन खत्रीले आगामी दुई वर्षभित्र पर्यटकीय गन्तव्यको खोजी गरी भौतिक पूर्वाधार निर्माण गरेर पर्यटन वर्ष मनाउने बताएका छन् । मंगलबार ४३ औं विश्व पर्यटन दिवसको अवसरमा नगरपालिकाले नगर क्षेत्रभित्रको पर्यटकीय गन्तव्य खोजी गर्दै पदयात्रा आयोजना गरेको छ ।

यस अवसरमा संयोजक नगरप्रमुख खत्रीसहित प्रमुख कार्यकारी अधिकृत हिरामान सुवेदी, जनप्रतिनिधि, कर्मचारी, विभिन्न संघसंस्थाका प्रतिनिधिहरूले बाँसबारी, मणिकर्णिका, वाल्मिकेश्वर, सरस्वतीस्थान हुँदै कल्पेश्वरसम्म पदयात्रा गरेका छन् ।

नगरको मुख्य पर्यटकीय गन्तव्य विश्वसम्पदामा सूचीकृत चाँगुनारायण मन्दिर, नगरकोटसँगै धार्मिक पर्यटकीय गन्तव्यको रुपमा प्रर्वद्धन गर्न मणिकर्णिका, वाल्मिकेश्वर, सरस्वतीस्थान हुँदै कल्पेश्वर पदमार्गको रुपमा विकास गर्ने नगरप्रमुख खत्रीले बताए ।

‘आन्तरिक तथा बाह्य पर्यटकको लागि पर्यटकीय क्षेत्रको पहिचान तथा प्रर्वद्धन गर्न भौतिक पूर्वाधारको मर्मत तथा निर्माणमा विशेष योजना ल्याइनेछ,’ उनले भने, ‘पर्यटकीय क्षेत्रको सडक सुधार र विस्तार, शौचालय निर्माण, विश्रामस्थललगायत व्यवस्थापन गर्नेछौं ।’ नगरपालिकाले प्रदेश र संघीय सरकारको समन्वयमा पर्यटन क्षेत्र प्रर्वद्धन गर्ने लक्ष्य लिएको उनले बताए ।


यसैबीच, भक्तपुर नगरपालिकाले भक्तपुर प्रवेश गर्ने पर्यटकलाई लाखे प्याखं (नाच) प्रर्दशन गरेर स्वागत गरेको छ । पर्यटन दिवसको अवसरमा मंगलबार भक्तपुर दरबार क्षेत्रको खौमा ध्वाकामा विदेशी पर्यटकको पहिलो समूहलाई लाखे प्याखं प्रर्दशन, खादा, भादगाउँले टोपी, परम्परागत थैली र पुष्पगुच्छाद्वारा स्वागत गरेको नगरप्रमुख सुनिल प्रजापतिले बताए ।

भक्तपुर नगरपालिका र भक्तपुर पर्यटन विकास समिति, भक्तपुर टुर गाइड व्यवस्थापन समिति र पर्यटक प्रहरीले संयुक्त रुपमा भक्तपुर प्रवेश गर्ने पहिलो समूह जर्मनी, अष्ट्रिया र बुल्गेरियाका ४ जना पर्यटकहरूलाई लाखे प्याखंका साथ स्वागत गरेको छ ।

पर्यटक प्रवेश शुल्कबाटै भक्तपुर नगरपालिकाले सम्पदाहरूको संरक्षण गर्नुका साथै शिक्षा, स्वास्थ्य, सरसफाइ जस्ता जनताका आधारभूत आवश्यकता पूरा गर्दै आएको नगरप्रमुख प्रजापति बताउँछन् । कोभिड १९ का कारण लकडाउन हुँदा नराम्रो असर पुगेको पर्यटन क्षेत्र प्रर्वद्धनका लागि नगरपालिकाले पर्यटकको सेवामा आवश्यक स्थानीय पथप्रदर्शकहरूको तालिम, चिनियाँ, जापानीलगायत विदेशी भाषाहरूको प्रशिक्षण, ठाउँठाउँमा पर्यटक शौचालय र पर्यटक सूचना केन्द्रको व्यवस्था गर्दै आएको उनले बताए ।

विदेशी पर्यटकलाई स्वागत गर्दै नगरप्रमुख प्रजापतिले भक्तपुरलाई संसारकै हेर्न र घुम्नलायक सहरको रुपमा विकास गर्ने उद्देश्य लिएको बताए । ‘पर्यटकीय क्षेत्रहरूमा विशेष सरसफाइ, समय समयमा सांस्कृतिक विधाहरूको प्रतियोगिताको आयोजना गर्नुका साथै सांस्कृतिक गुरुहरूको सम्मान कार्यक्रम पनि गर्दै आएका छौं,’ उनले भने ।

प्रकाशित : आश्विन ११, २०७९ १८:२८
पूरा पढ्नुहोस्
प्रतिक्रिया
पठाउनुहोस्
×