शरणार्थीको हत्या आरोपमा ९ पक्राउ- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

शरणार्थीको हत्या आरोपमा ९ पक्राउ

पर्वत पोर्तेल

झापा — झापाको दमक नगरपालिका-३ बेलडाँगीका ४४ वर्षीय एलबी भनिने लालबहादुर गुरुङलाई इलामको चुलाचुली गाउँपालिका-५ पकुवा भन्ने ठाउँमा हत्या गरेको आरोपमा ९ जनालाई प्रहरीले पक्राउ गरेको छ । 

बुधबार बेलुका ५ बजे १०/१२ जना अपरिचित व्यक्तिहरूले बेलडाँगीस्थित भुटानी शरणार्थी शिविर बस्ने गुरुङलाई दमक र चुलाचुली जोड्ने रतुवा खोलाको झोलुङ्गे पुल नजिकै धारिलो हतियार प्रयोग गरी आक्रमण गरेका थिए । आक्रमणपछि गम्भीर घाइते गुरुङको बीएण्डसी अस्पताल बिर्तामोडमा उपचारको क्रममा मृत्यु भएको थियो ।

घटना सम्बन्धमा तत्काल घटनास्थलमा जिल्ला प्रहरी कार्यालय इलामबाट प्रहरी उपरीक्षक दिलीप घिमिरेको कमाण्डमा परिचालन भएको प्रहरी टोलीले घटनामा संलग्न व्यक्तिहरूको खोजी गर्ने क्रममा चुलाचुली-४ इलामका २५ वर्षीय शिव हिङहाङ भनिने नरेन्द्र दर्जी, २९ वर्षीय झ्याम्ले भनिने नरेशकुमार याखा, २१ वर्षीय अभिषेक केरुङ, २० वर्षीय सेसे भनिने सेसेयाङ याखा, ३३ वर्षीय सन्तु भनिने चन्द्र कुमार यवा, ३५ वर्षीय डम्बर यवा, ३० वर्षीय टिका भनिने नरेन्द्र तुम्रोक, २६ वर्षीय बिक्रम हिङमाङ र २९ वर्षीय पर्शु राई समेत ९ जनालाई विभिन्न स्थानमा लुकीछीपी बसेको अवस्थामा पक्राउ गरेको हो ।

प्रहरीले उनीहरूलाई घटनामा प्रयोग भएको दापसहितको खुकुरी, मृतकलाई हिर्काउन प्रयोग गरेका ढुंगाहरू तथा मृतकले प्रयोग गरेको को. १९ प ३७२५ नम्बरको मोटरसाइकलको दुबै चक्काको टायर काटी फालेको अवस्थामा फेला परी बरामद गरेको हो ।

घटनाको प्रारम्भिक अनुसन्धानको क्रममा घटना भएको ३ दिनअघि मृतक गुरुङले घटनामा संलग्न टीका भनिने नरेन्द्र तुम्रोकका भाइ सुजन तुम्रोकलाई कुटपिट गरेको र सोही घटनाको बदला लिन आरोपितहरूले कुटपिट गरी मार्नेसम्मको योजना बनाएको खुल्न आएको प्रदेश प्रहरी कार्यालयले जनाएको छ ।

प्रकाशित : आश्विन ७, २०७९ १६:०७
प्रतिक्रिया
पठाउनुहोस्

पत्रकारलाई अनेरास्ववियुकी अध्यक्ष बरालले धम्क्याएकोप्रति महासंघको आपत्ति

कान्तिपुर संवाददाता

काठमाडौँ — नेपाल पत्रकार महासंघले पत्रकार बिनु सुवेदीलाई नेकपा एमालेको विद्यार्थी संगठन अनेरास्ववियुकी अध्यक्ष सुनिता बरालले धम्क्याएको घटनाप्रति आपत्ति जनाएको छ । महासंघले जिम्मेवार पदमा बसेको व्यक्तिबाटै अभिव्यक्ति स्वतन्त्रत्राको नाममा पत्रकारलाई आक्रमणको ठाडो धम्की दिनु अत्यन्त दुःखद् र अशोभनीय भएको जनाएको छ । 

अनलाइन खबर डटकममा कार्यरत पत्रकार सुवेदीलाई झापामा रिर्पोटिङ गरेर फर्किएपछि ‘बिनु सुवेदीले कुन दिन झापाली जनताको रामधुलाई भेट्छिन्,’ भनी एमाले कार्यकर्ताबाट गरेको ट्वीटमा अनेरास्ववियुकी अध्यक्ष बरालले कमेन्ट गर्दै 'जरुरत पर्लाजस्तो छ' भनेर धम्की दिएकी थिइन् ।

'समाचारको विषयलाई लिएर अनलाइन खबर डटकममा कार्यरत पत्रकार बिनु सुवेदीलाई नेकपा एमालेको भ्रातृ संगठन अनेरास्ववियुका राष्ट्रिय अध्यक्ष सुनिता बरालले समाजिक सञ्जाल ट्वीटरमार्फत कुटपिट गर्ने भनी धम्काएको घटनाप्रति नेपाल पत्रकार महासंघको ध्यानाकर्षण भएको छ,' महासंघका महासचिव रोशन पुरीले विज्ञप्तिमार्फत भनेका छन्, 'सामाजिक सञ्जालमा विचार अभिव्यक्त गर्नु र त्यसप्रति टीकाटिप्पणी हुनु अभिव्यक्ति स्वतन्त्रता हो । तर अभिव्यक्ति स्वतन्त्रताका नाममा एउटा जिम्मेवार व्यक्तिबाट सामाजिक सञ्जालमार्फत पत्रकारलाई आक्रमणको ठाडो धम्की दिनु अत्यन्त दुःखद् र अशोभनीय काम हो ।'

अध्यक्ष बरालले सामाजिक सन्जालमार्फत गरेको टिप्पणीलाई महासंघले कडा शब्दमा भर्त्सना गरेको छ भने प्रेसको संवैधानिक स्वतन्त्रता र अधिकार सम्मान गर्न ध्यानाकर्षण गराएको छ ।


प्रकाशित : आश्विन ७, २०७९ १६:०३
पूरा पढ्नुहोस्
प्रतिक्रिया
पठाउनुहोस्
×