अपांगता भएका व्यक्तिका लागि रोजगार मेला- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

अपांगता भएका व्यक्तिका लागि रोजगार मेला

देवनारायण साह

मोरङ — अपांगता भएका व्यक्तिहरूका लागि विराटनगरमा पहिलोपल्ट रोजगार मेला आयोजना गर्न लागिएको छ । यो मेलाले प्रदेश १ स्थित औद्योगिक तथा व्यापारिक प्रतिष्ठानहरूलाई अपांगमैत्री बनाउनुका साथै अपांगता भएका व्यक्तिहरूप्रतिको नकारात्मक दृष्टिकोण हटाउने उद्देश्यले मेला आयोजना गर्न लागिएको हो । 

नेपाल उद्योग वाणिज्य महासंघ प्रदेश १, द लेप्रोसी मिसन नेपाल, राष्ट्रिय अपांग महासंघ प्रदेश १ र करुणा फाउन्डेसनको सहयोगमा कार्तिक १८ र १९ गते विराटनगरस्थित जैन भवनको प्रांगणमा मेला आयोजना गर्न लागिएको छ । मेलामा प्रदेश १ स्थित मोरङ, सुनसरी, झापा, इलाम, धनकुटा, पाँचथर, भोजपुर र संखुवासभाका अपांगता भएका ३ सय व्यक्तिहरूलाई यस प्रदेशस्थित औद्योगिक, व्यापारिक प्रतिष्ठान, शैक्षिक संस्था, बैंकिङ तथा विकास क्षेत्रमा रोजगार दिने उद्देश्य रहेको द लेप्रोसी मिसन नेपालअन्तर्गतका फाउन्ड परियोजनाका अध्यक्ष विपिन दासले बताए ।

‘मेला सहभागिताका लागि यस प्रदेशका ती ७ जिल्लाबाट ७ सय २९ जनाको नाम सूचीकृत भएको भए पनि त्यसमध्ये योग्यता र क्षमताका आधारमा रोजगारीका लागि योग्य तीन सय जनाको बायोडेटा तयार पारेका छौं,’ उनले भने, ‘तीन सय जनालाई ९ वटा क्षेत्रमा रोजगारीका लागि सूचीकृत गरेका छौं ।’

रोजगार मेलामा सहभागी हुने अपांगता भएका व्यक्तिहरूलाई रोजगारी, काम गर्ने तरिका र रोजगारीको दिगोपनका लागि अभिमुखीकरण तालिमसमेत दिएको दासले बताए । रोजगारीमा जानका लागि अपांगता भएका व्यक्तिहरूलाई आवश्यक सहायक सामग्रीसमेत परियोजनाले प्रदान गरी काम गर्न योग्य बनाएर मात्रै मेलामा सहभागी गराउने उनको भनाइ थियो ।

उनले तेह्रथुम, उदयपुर, काठमाडौंलगायत जिल्लाबाट पनि अपांगता भएका व्यक्तिहरुले मेलामा सहभागी भएर रोजगारदाताहरुसँग रोजगारीका लागि प्रत्यक्ष रुपमा छलफल गर्न खुल्ला गरिएको बताए ।

प्रकाशित : आश्विन ६, २०७९ १७:५०
प्रतिक्रिया
पठाउनुहोस्

रुकुमपूर्वमा गाडी दुर्घटना, पाँचको मृत्यु, १३ घाइते [अपडेट]

रासस

कर्णाली — रुकुमपूर्वको भूमे गाउँपालिका–३ क्याङ्सी बगरमा भएको बस दुर्घटनामा पाँच जनाको मृत्यु भएको छ । काठमाडौंबाट रुकुमकोट आउँदै गरेको ग१ख ९१०९ नम्बरको बस बिहीबार दुर्घटना हुँदा घटनास्थलमा पाँचको मृत्यु भएको जिल्ला प्रहरी कार्यालय रुकुमपूर्वका प्रहरी नायब उपरीक्षक प्रकाश डाँगीले जानकारी दिए ।

मृतकको सनाखत हुन बाँकी छ । उनले उक्त बसमा सवार १७ मध्ये १३ जना घाइते भएका र तीनको अवस्था गम्भीर रहेको बताए । घाइते सबैको रुकुमपूर्व अस्पतालमा उपचार भइरहेको प्रहरी नायब उपरीक्षक डाँगीले जनाए ।

उनका अनुसार घटनास्थलमा उद्धार कार्य भइरहेको छ । घाइतेलाई हेलिकप्टरबाट उपचारका लागि लैजाने पहल भएको छ ।

नेपाली सेनाको नरसिङ दल गुल्म रुकुमपूर्वका सेनानी बाबुलाल जिसीले घाइतेको उपचारका लागि सुर्खेतबाट हेलिकप्टर ल्याउने तयारी भइरहेको जानकारी दिए ।


प्रकाशित : आश्विन ६, २०७९ १७:४७
पूरा पढ्नुहोस्
प्रतिक्रिया
पठाउनुहोस्
x
×