रहेनन् प्रजातन्त्र सेनानी प्रधान- प्रदेश १ - कान्तिपुर समाचार

रहेनन् प्रजातन्त्र सेनानी प्रधान

विनोद भण्डारी

विराटनगर — प्रजातन्त्र सेनानी तोरेन्द्रमानसिंह प्रधानको सोमबार साँझ निधन भएको छ । श्वासप्रश्वासमा समस्या भएपछि आइतबार न्यूरो अस्पताल भर्ना गरिएका प्रधानको ९२ वर्षको उमेरमा उपचारका क्रममा निधन भएको परिवारजनले जनाएका छन् ।

२००७ सालको राणा शासनविरुद्धको आन्दोलनका सक्रिय सहभागी प्रधान पूर्वप्रधानमन्त्री स्व गिरिजाप्रसाद कोइरालासँगै राजनीतिक आन्दोलनमा सहभागी भएका थिए । उनी राणा शासनविरुद्धको सशस्त्र आन्दोलनमा पूर्वी क्षेत्रमा हतियार संकलन गर्ने लगायत जनकपुर र वीरगञ्जको आन्दोलनमा सक्रिय सहभागी योद्धमध्ये एक थिए ।

प्रजातान्त्रिक आन्दोलनको सुरुवातका क्रममा विराटनगरमा कांग्रेसका गिरिजाप्रसाद कोइरालाको नेतृत्वमा विराटनगर जुट मिलमा मजदुर आन्दोलन सुरु हुँदा युवाहरुलाई आन्दोलनमा जोड्ने सेतूको रुपमा प्रधानले भूमिका खेलेका थिए ।

प्रधानको अन्त्येष्टिमा परोपकार घाट हाटखोला पुगेका कांग्रेस नेता महेश आचार्यले प्रजातन्त्रका सेनानी प्रधान ७५ वर्षदेखि विराटनगरको विकास, नागरिक अधिकार र सुव्यवस्थाको पक्षमा निस्वार्थ रुपले सक्रिय रहेको भन्दै स्मरण गरे ।

गिरिजाप्रसाद निकाट रहेका प्रधानले कहिल्यै पनि पदको लोभ गरेनन् । आचार्यका अनुसार गिरिजाप्रसाद पनि उनीसँग पटकपटक राजनीति र समसामयिक विषयमा सुझाव लिने गर्थे ।

'विभिन्न संघ संस्थामा आवद्ध रहेका प्रधान जहिले पनि मुलुकको हित र कुशल शासनका बारेमा मात्र सुझाव दिनुहुन्थ्यो,' आचार्यले भने, 'उहाँले कहिल्यै पनि व्यक्तिगत लाभका लागि यसो र उसो गरिदेउ भन्नुभएन ।'

प्रधानका श्रीमती र तीन छोरी छन् । विराटनगरको आर्दश पुस्तकालय, एलिट क्लब, रोटरी क्लबका संस्थापक प्रधानले नेपाल क्षयरोग निवारण संस्था, कोसी अस्पताल, महेन्द्र मोरङ क्याम्पस, पूर्वाञ्चल विश्वविद्यालयको स्थापनाका लागि अग्रणी भूमिका खेलेका थिए ।

उनलाई नजिकबाट चिन्ने छिमेकी सुदर्शनबहादुर श्रेष्ठले भने विराटनगरले निस्वार्थ, निष्ठावान र सामाजिक धरोहर गुमाएको प्रतिक्रिया दिए । विराटनगर महानगरपालिका वडा नम्बर १० निवासी प्रधान मुटु तथा स्वासप्रस्वास सम्बन्धी रोगबाट ग्रसित थिए ।

उनको यसअघि ६ पटक हृदयघात भएको थियो । पुर्ख्यौली थलो काठमाडौं भएका उनी पछिल्लो समय प्रत्यक्ष राजनीतिबाट टाढा बसेर हरियाली जोगाउने र तराइ मधेशमा घट्दै गएको भूमिगत जलस्तर नियन्त्रण गर्ने अभियानमा संलग्न थिए ।

वर्षाका लागि बिरुवा रोप्ने र भूमिगत जलस्रोत बचाउने लगायत सचेतना फैलाउने अभियानमा उनी सक्रिय थिए । यसका लागि रुद्राक्ष, श्रीखण्ड, अशोक र कपुर प्रजातिका बिरुवा उनी नि:शुल्क वितरण गर्थे ।

उनको पार्थिर शरीरमा मंगलबार प्रदेश १ का मुख्यमन्त्री राजेन्द्रकुमार राईले राष्ट्रिय झण्डा ओढाएर श्रद्धाञ्जली दिए भने कांग्रेस नेता महेश आचार्य र केन्द्रीय सदस्य अमृत अर्यालले पार्टीको झण्डा ओढाएर हाटखोलास्थित परोपकार घाटमा उनको अन्त्येष्टि गरिएको छ।

प्रकाशित : आश्विन ४, २०७९ १९:३७
प्रतिक्रिया
पठाउनुहोस्

कांग्रेस नेता आचार्यलाई युवाको चुनौती

विनोद भण्डारी

विराटनगर — २०५६ देखि २०७४ सम्मको प्रतिनिधिसभाको निर्वाचनमा मोरङको क्षेत्र नं ४ बाट चुनाव लड्दै आएका कांग्रेस नेता महेश आचार्यलाई आसन्न निर्वाचनमा उम्मेदवार बन्न सकस छ । उनलाई करिब अढाई दशकमा यो क्षेत्रबाट तयार भएका ४० माथिका युवा पुस्ताले उम्मेदवारीमा चुनौती दिएका छन । ती आकांक्षीलाई व्यवस्थापन गर्न उनलाई कठिन भएको छ ।


एउटै निर्वाचन क्षेत्रबाट चुनाव लडेका आचार्य २०५६ र २०७० मा विजयी तथा २०६४ र २०७४ मा हार बेहोरेका थिए । यस अवधिमा उनी पाँच पटक मन्त्री र एक पटक राष्ट्रिय सभाको सदस्य बने । आचार्य २०५६ मा पहिलो पटक उम्मेदवार बन्दा विराटनगर महानगरपालिकाका निवर्तमान प्रमुख भीम पराजुली महेन्द्र मोरङ क्याम्पसको स्वतन्त्र विद्यार्थी यूनियनका सदस्य थिए । नेपाल विद्यार्थी संघका पूर्वसभापति गुरुराज घिमिरे संघको केन्द्रीय सदस्य थिए । पूर्वराज्यमन्त्री दिलीप गच्छदार तत्कालीन क्षेत्र नं ३ का क्षेत्रीय सभापति थिए ।

अहिले यी तीनै जना आचार्यको उम्मेदवारीमा तगारो बनेका छन् । यीबाहेक संविधान सभाका पूर्वसदस्य अमृत अर्यालले पनि क्षेत्र नं ४ बाट आचार्यलाई यस पटक चुनौती दिएका छन् । अर्यालको निर्वाचन क्षेत्र ५ हो । अघिल्लो निर्वाचनमा उक्त क्षेत्रबाट माओवादीका शिवकुमार मण्डलसँग पराजित भएका अर्याल यसपाली उक्त क्षेत्र गठबन्धनमा माओवादी केन्द्रलाई पर्ने पक्काझैं देखिएपछि उनले यो क्षेत्र ताकेका हुन् । आचार्यको उम्मेदवारीमा चुनौती दिनेमध्ये केन्द्रीय सदस्यद्वय अर्याल र पराजुलीसहित गच्छदार संस्थापन पक्षका र घिमिरे संस्थापन इतरका हुन् । आचार्य पार्टीको १४ औं महाधिवेशनयता कुनै गुट–उपगुटमा देखिएका छैनन् । स्वतन्त्र रूपमा उपसभापति पदको उम्मेदवार बन्दा उनी ठुलो मतान्तरले पराजित भएका थिए ।

क्षेत्र नं ४ मा पनि अघिल्लो निर्वाचनमा माओवादी केन्द्रका अमनलाल मोदीसँग आचार्य ७ हजारभन्दा बढी मतान्तरले हारेका थिए । उनले आफ्ना सम्धी विश्वनाथ रिजाललाई प्रदेशसभाको प्रत्यक्ष उम्मेदवार बनाउँदा उनीमाथि पार्टीभित्रै ठूलो अन्तर्घात भएको कांग्रेसजनको ठहर थियो । गठबन्धनमा क्षेत्र नं ४ कांग्रेसको भागमा पर्‍यो भने अन्तिम पटक चुनावी मैदानमा उत्रिने इच्छा भएको उल्लेख गर्दै आचार्यले भने, ‘त्यसका लागि आकांक्षी युवापुस्ताको व्यवस्थापनको पक्षमा लागि परेको छु ।’ यो क्षेत्रमा आकांक्षी पाँचै जनाको आ–आफ्नो संगठन छ ।

‘युवा पुस्तामा आकांक्षा बढ्नु स्वाभाविक हो,’ आचार्यले भने, ‘त्यसका लागि पार्टीको केन्द्रीय र जिल्ला तहको नेतृत्वले पनि भूमिका खेल्नुपर्छ ।’ उनी अहिले पार्टीको कुनै पनि भूमिकामा छैनन् । नेतृत्वले उनीहरूको भूमिका व्यवस्थापन गरेर आफूलाई अन्तिम पटक मौका दिन्छ भन्नेमा विश्वस्त रहेको उनको भनाइ छ । तर युवा आकांक्षीले आचार्यलाई विश्राम गर्न आग्रह गरेका छन् । पराजुलीले महेश दाइ समानुपातिकमा गएर युवालाई अवसर दिनुपर्ने बताए । ‘क्षेत्र नं ४ मा उहाँको क्रेज घट्दो छ, अघिल्लो निर्वाचनले पनि यसलाई पुष्टि गरेको छ,’ उनले भने, ‘महेश दाइले यो क्षेत्रबाट राजनीति सुरु गर्दा जन्मिएका बच्चा अहिले मतदाता भएका छन्, युवा मतदाताको लहरमा उहाँ अहिले हुनुहुन्न ।’

अर्का आकांक्षी घिमिरेले भने, ‘यो क्षेत्रका अन्य सबै आकांक्षीले पटकपटक अवसर पाइसकेका छन्, म अहिलेसम्म वडा अध्यक्ष पनि भएको छैन ।’ आचार्यले यसअघि अवसर नै नपाएका युवालाई सहयोग गर्नुपर्ने घिमिरेले धारणा राखे । उनी पार्टीको हालै सम्पन्न १४ औं महाधिवेशनमा संस्थापन इतरपक्षबाट प्रदेश सभापतिमा २ मतले पराजित भएका थिए । अर्याल र गच्छदारले पनि आचार्यलाई समानुपातिकमा बसेर आफूलाई सहयोग गर्न सुझाव दिँदै टिकटका लागि सभापति शेरबहादुर देउवाकोमा पुगेका छन् । मोरङमा अर्याल र गच्छदार देउवाका विश्वास पात्र हुन् । गठबन्धनमा यो क्षेत्र कांग्रेसको भागमा परे यिनै दुईमध्ये एकले टिकट पाउने सम्भावना बढी रहेको पार्टी निकटहरू बताउँछन् ।

प्रकाशित : आश्विन ३, २०७९ ०७:३५
पूरा पढ्नुहोस्
प्रतिक्रिया
पठाउनुहोस्
×