नवजात शिशु हत्याका दोषी ९ वर्षपछि पक्राउ- प्रदेश १ - कान्तिपुर समाचार

नवजात शिशु हत्याका दोषी ९ वर्षपछि पक्राउ

रमेशचन्द्र अधिकारी

धनकुटा — नवजात शिशुको हत्या गरेर फरार रहेका एक व्यक्तिलाई प्रहरीले ९ वर्षपछि पक्राउ गरेको छ । पक्राउ पर्नेमा भोजपुर नगरपालिका ४ का ४३ वर्षीय प्रेमकुमार राउत रहेको प्रहरीले जनाएको छ ।

२०७० साल असार ७ गते धनकुटा नगरपालिका ५ बिहीबारे हाटको खोल्सीमा नवजात शिशुको हत्या गरेर फालेको अभियोगमा राउत अदालतबाट दोषी ठहर भएका थिए ।

प्रहरीले उनलाई काठमाडौं महानगरपालिका ९ बाट पक्राउ गरेको जिल्ला प्रहरी प्रमुख एसपी लक्ष्मीराज अधिकारीले जानकारी दिए ।

एक महिलासँग अनैतिक सम्बन्ध राखी उनीबाट जन्मिएको बच्चाको हत्या गरेको कसुरमा उनलाई पक्राउ गरिएको अधिकारीले बताए । काठमाडौंको गौशालामा नक्कली नामबाट होटल सञ्चालन गरेर बस्दै आएका राउतलाई प्रहरीले पक्राउ गरेको हो ।

उक्त कसुरमा जिल्ला अदालत धनकुटाले २०७४ कात्तिक २० गते उनलाई सर्वस्वसहित जन्मकैदको फैसला गरेको थियो ।

उक्त मुद्दामा सर्वोच्च अदालतले २०७६ वैशाख १६ गते राउतमाथि जन्मकैदको अन्तिम फैसला सुनाएको थियो।

राउतलाई प्रहरीले नियन्त्रणमा लिएर पत्रकार सम्मेलन मार्फत् सार्वजनिक गरेको हो । प्रहरीले काठमाडौंबाट पक्राउ गरी जहाज मार्फत् सोमबार धनकुटा ल्याएको थियो । उनलाई जिल्ला अदालतमा बुझाइएको प्रहरीले जनाएको छ । उक्त घटना भएलगत्तै पक्राउ परेकी अभियुक्त महिला भने कैद सजाय भुक्तान गरी छुटिसकेकी छन् ।

प्रकाशित : भाद्र २२, २०७९ १७:५७
प्रतिक्रिया
पठाउनुहोस्

विद्यालय हातामै धूमपान

विद्यालयले व्यवसायीसँग सुर्तीजन्य तथा मादकपदार्थ बिक्रीवितरण गर्न नपाउने गरी सम्झौता गरिएको छ, पछिल्लो समय गुनासो आएकाले विद्यालयले गम्भीरतापूर्वक लिनेछ : प्रअ
रमेशचन्द्र अधिकारी

धनकुटा — यहाँको एक विद्यालय हाताभित्रकै चमेनागृहमा खुलमखुला धूमपान बिक्रीसँगै सेवन हुने गरेको छ । बिहिबार दिउँसो धनकुटा–५ स्थित गोकुण्डेश्वर बालमन्दिर माविको हाताभित्र सञ्चालित चमेनागृहमा बर्दीधारी प्रहरीसँगै बसेका सादा पोसाकका अर्का प्रहरीले निर्बाध चुरोट तानिरहेका देखिन्थे । विद्यालयभन्दा ५० मिटर दूरीमा रहेको होटलमा समेत कक्षा सञ्चालनकै समयमा मदिरा बिक्री वितरण भइरहेको हुन्छ ।

विद्यालय परिसरभित्र व्यापारिक प्रयोजनका लागि बनाएर भाडामा दिइएका अधिकांश होटल तथा चमेना गृहमा पठनपाठन भइरहेको समयमा समेत मद्यपन तथा धूमपान निर्बाध बिक्री वितरण तथा सेवन हुने गरेको छ ।

विद्यालयले भाडामा दिँदा मादक पदार्थ तथा सुर्तीजन्य पदार्थ बिक्रीवितरण गर्न नपाउने गरी सम्झौता गरिएको हुने प्रधानाध्यापक दामोदर मिश्रले बताए । तर अनुमगन अभावले बेचबिखन भइरहेको हुन सक्ने उनले बताए । ‘विद्यालयले व्यवसायीसँग सुर्तीजन्य तथा मादकपदार्थ बिक्रीवितरण गर्न नपाउने गरी सम्झौता गरेको छ,’ उनले भने, ‘पछिल्लो समय गुनासो आएकाले विद्यालयले गम्भीरतापूर्वक लिनेछ ।’ जिल्लाका अधिकांश विद्यालय आसपासका होटल तथा खाजा पसलमा यसप्रकार धूमपानजन्य वस्तु बिक्री भइरहेको हुन्छ ।

सुर्तीजन्य पदार्थको प्रयोग नियन्त्रण तथा नियमन गर्न एघार वर्ष पहिले कानुन बने पनि प्रभावकारी पालना हुन सकेको छैन । विद्यालय, सरकारी कार्यालय तथा सार्वजनिकस्थलमै खुला रुपमा चुरोट, खैनी, गुट्का जस्ता सुर्तीजन्य वस्तु निर्बाध बेच्ने गरिएको गुनासो चुलिएको छ । नियमन गर्ने निकायले चासो नदेखाउँदा लापरबाही बढेको स्थानीय नरेश श्रेष्ठले सुनाए । उनका अनुसार चोक, बजार र पसलमा चुरोट पिउने एवं गुटका खाने प्रशस्त भेटिने गरेको बताए ।

सुर्तीजन्य पदार्थ नियन्त्रण तथा नियमन ऐन २०६८ मा सार्वजनिकस्थलमा धूमपान तथा सुर्तीजन्य पदार्थ सेवन गर्न नपाइने स्पष्ट व्यवस्था छ । १८ वर्षभन्दा कम उमेरका बालबालिका तथा गर्भवतीलाई सुर्तीजन्य पदार्थ बिक्री वितरण गर्न/गराउन वा निःशुल्क उपलब्ध गराउन नपाइने र त्यसो गरेमा १० हजार रुपैयाँसम्म जरिवाना गराइने उल्लेख छ ।

फुटकर रूपमा चुरोट, बिँडी वा सिगारको खिल्ली बिक्रीवितरण गर्न नपाइने, कार्यालय र सार्वजनिकस्थलमा धूमपान तथा सुर्ती सेवन निषेधको सूचना अनिवार्य टाँस गरिनुपर्ने, त्यस्ता पदार्थ बिक्री, वितरण गर्न इजाजतपत्र अनिवार्य लिनुपर्ने ऐनमा उल्लेख छ ।

प्रकाशित : भाद्र ११, २०७९ ११:०२
पूरा पढ्नुहोस्
प्रतिक्रिया
पठाउनुहोस्
×