दिवा खाजा खाँदा काँकडभिट्टा माविका ३२ जना विद्यार्थी बिरामी- प्रदेश १ - कान्तिपुर समाचार

दिवा खाजा खाँदा काँकडभिट्टा माविका ३२ जना विद्यार्थी बिरामी

पर्वत पाेर्तेल

काँकडभिट्टा — अखाद्य दिवा खाजा खाएका कारण स्थानीय काँकडभिट्टा माविका ३२ बालबालिकालाई बिहीबार दिउँसो ‘फुड पोइजन’ भएको छ । सरकारले सामुदायिक विद्यालयका शिशुदेखि कक्षा ६ सम्ममा अध्ययनरतलाई प्रति विद्यार्थी १५ रुपैयाँका दरले दिवा खाजा उपलब्ध गराउँदै आएको छ ।

माविकै चमेनागृहमा खाजा खाइसकेपछि विद्यार्थीलाई झाडाबान्ता र पेट दुख्ने समस्या भएको थियो । विद्यार्थी भकाभक बिरामी पर्न थालेपछि विद्यालय प्रशासनले तत्काल उनीहरूलाई उपचारका लागि करिब ३० किलो मिटर टाढाको मेची अञ्चल अस्पताल पुर्‍याएको थियो । उनीहरू सबै खतरामुक्त रहेको उपचारमा संलग्न चिकित्सकले जनाए । ‘स्थिति सामान्य छ, घर पठाउँछौं’, ती चिकित्सकले भने ।

इलाका प्रहरी कार्यालय काँकडभिट्टाका डीएसपी ज्ञानकुमार महतोले खाजाका रूपमा अखाद्य वस्तु दिइएकाले विद्यार्थी अस्वस्थ भएका हुन् । उनले भने, ‘सडेगलेका तरकारी खाजाको रूपमा प्रयोग गरिएको छ, पानीमा पनि फोहोर देखियो ।’ सरकारले विद्यालयलाई दिवा खाजाको मेन्यु नै बनाएर पठाएको छ । तर उक्त मेन्युको बेवास्ता गर्दै जे पायो त्यही ख्वाउँदै आएका छन् । पौष्टिक तत्त्वयुक्त वस्तु मात्रै खाजाको रूपमा बालबालिकालाई दिनुपर्ने भए पनि अधिकांश विद्यालयले अखाद्य वस्तु नै बढी दिइरहेको पाइएको छ ।

चाउचाउ, बिस्कुट, दालमोठलगायतका पत्रु खानाखाजाको रूपमा दिइएको पाइएको छ । ‘यहाँ पनि सरकारी मेन्युअनुसारको खाजा दिइएको पाइएन’, डीएसपी महतोले भने, ‘अखाद्य वस्तु खाएकै कारण विद्यार्थी बिरामी परेको पाइयो ।’ खाद्य प्रविधि तथा गुण नियन्त्रण कार्यालयको एक टोलीले पनि चमेनागृहको अनुगमन गर्नुका साथै विद्यार्थीलाई ख्वाइएको खाजाको नमुना जाँचका लागि लगेको छ ।

चमेना गृहका सञ्चालक विद्यालयकै चौकीदार नारायण विष्टलाई थप अनुसन्धानका लागि हिरासतमा राखिएको प्रहरीले जनाएको छ । बिहीबार उनी आफैंले खाजाको रूपमा मटर छोला पकाएका थिए । केही विद्यार्थीले चना–चटपटे पनि खाएका थिए । खाएलगत्तै बालबालिकालाई सन्चो भएन । ‘अरू बेला पनि यस्तै खाजा दिइन्थ्यो, केही हुन्न थियो’, बिष्टले सफाइ दिँदै भने, ‘आज के कारणले बिरामी भए छक्क परेको छु ।’

विद्यालयका एक शिक्षकले बालबालिकाको स्वास्थ्यमाथि खेलबाड गर्ने अधिकार कसैलाई नभएको भन्दै विद्यालय प्रशासनले जिम्मेवारी लिनुपर्ने जनाए । स्थानीय फणीन्द्र घिमिरेले चमेनागृहले नानीबाबुलाई खाजासँगै फोहोर पानी दिएको दाबी गरे । केही दिनदेखि बाल्टीमा भरेर राखेको पानीमा लार्भाहरू पौडिरहेको देखिन्थ्यो । ‘खाजा त अखाद्य थियो नै, पानी पनि पिउनै नमिल्ने थियो’, घिमिरेले भने, ‘क्यान्टिनको चरम लापरबाहीका कारण विद्यार्थी अस्वस्थ भएका हुन् ।’

बालअधिकारकर्मी मणिकुमार लिम्बूले बालबालिकालाई खाजा ख्वाउने कुरामा अधिकांश विद्यालयमा लापर्बाह भएको दाबी गर्छन् । ‘बच्चाबच्चीलाई पौष्टिक खाना ख्वाउँदा उसको मानसिक र शारिरीक विकासमा सघाउ पुग्छ’, उनी भन्छन्, ‘जसले सिकाइ प्रक्रियामा पनि मद्दत पुग्छ ।’ उनका अनुसार बालबालिकाले खाने, पढ्ने र उनीहरूको सिकाइ प्रक्रिया प्रतिअभिभावक एवं शिक्षकहरू खासै संवेदनशील छैनन् । ‘परिणामस्वरूप यस्ता घटनाहरू दोहोरिरहन्छन्,’ लिम्बूले भने ।

प्रकाशित : भाद्र ९, २०७९ १५:२९
प्रतिक्रिया
पठाउनुहोस्

हिंसापीडित शिक्षक हटाउन दबाब

पर्वत पाेर्तेल

काँकडभिट्टा — झापाको मेचीनगर–७ गोमनसरीस्थित अरनिको माविकी एक महिला शिक्षकलाई ‘चरित्रहीन’ भन्दै बर्खास्तीको मागसहित हस्ताक्षर संकलन भएको छ । दुई महिनाअघि ती शिक्षकले तत्कालीन प्रधानाध्यापक अग्नि घिमिरेले यौनजन्य दुर्व्यवहार गरेको घटना सार्वजनिक गरेकी थिइन् ।

त्यसपछि घिमिरेले राजीनामा दिएका थिए । घटना सेलाउन नपाउँदै अभिभावकको एक समूहले यौन दुर्व्यवहारबाट पीडितलाई नै बर्खास्त गर्न विद्यालय व्यवस्थापन समितिसमक्ष लिखित माग गरेको हो ।

‘शिक्षिकालाई बिनाकारण दोषी देखाएर स्कुलबाट निकाल्ने प्रपञ्च सुरु भएको छ,’ एक शिक्षकले भने, ‘हामी भने यसको तीव्र विरोधमा छौं ।’ अघिल्लो घटनापछि लामो समय मानसिक पीडा भोगेकी उनी हाल थप पीडामा छिन् । ‘मलाई किन चरित्रहीन करार गरेर निकाल्न खोजिएको हो, थाहा छैन,’ उनले कान्तिपुरसँग भनिन्, ‘विद्यालयको मर्यादा र अनुशासनविपरीत कुनै काम गरेको भेटिएमा कारबाही होस् ।’

चन्द्रकला भण्डारी, डिकबहादुर भट्टराईलगायत ७२ अभिभावकले तत्काल उनलाई विद्यालयबाट निष्कासन गर्न माग गरेका छन् । माग पूरा नभए बालबालिका विद्यालय नपठाउने र तालाबन्दी गर्ने चेतावनी पनि दिइएको छ । विद्यालय व्यवस्थापन समितिका अध्यक्षलाई स्थानीयले साउन १३ गते निवेदन बुझाएका थिए । निवेदनमा महिला शिक्षकलाई ‘चरित्रहीन’ को संज्ञा दिइएको छ । निवेदनमा भनिएको छ, ‘महिला शिक्षकलाई स्कुलबाट बर्खास्त गरी अनुशासित एवं मर्यादित रूपमा विद्यालय सञ्चालन गर्न गराउन शिक्षक/शिक्षिकाहरूलाई निर्देशन दिन हुन सञ्चालक समितिसँग माग गरिन्छ ।’

३ सय १२ विद्यार्थी अध्ययनरत विद्यालयमा १५ शिक्षक तथा कर्मचारी कार्यरत छन् । विद्यालय व्यवस्थापन समितिका अध्यक्ष हरि दाहाल पीडित शिक्षकलाई हटाएर आफ्नो नातेदारलाई नियुक्ति गर्ने योजनामा रहेको अन्य शिक्षकहरूको भनाइ छ । ‘त्यही योजना मुताविक ती महिला शिक्षकलाई निष्कासन गर्ने माग अघि बढाइएको हो,’ एक शिक्षकले भने 

प्रधानाध्यापक विशाल भट्टराईले पीडित शिक्षकबाट विद्यालयको अनुशासन उल्लंघन हुने कुनै काम नभएकाले अभिभावकहरूको मागको कुनै औचित्य नरहने बताए । घटना बाहिर आएपछि विद्यालय व्यवस्थापन समितिका अध्यक्ष दाहाल र शिक्षक अभिभावक संघका अध्यक्ष दुर्गा आचार्यले मंगलबार राजीनामा दिएका छन् ।

प्रकाशित : श्रावण १८, २०७९ ०७:१६
पूरा पढ्नुहोस्
प्रतिक्रिया
पठाउनुहोस्
×