अस्पतालमा सुत्केरी मृत्यु : छानबिन समिति गठन, मृतकको परिवारलाई १० लाख- प्रदेश १ - कान्तिपुर समाचार

अस्पतालमा सुत्केरी मृत्यु : छानबिन समिति गठन, मृतकको परिवारलाई १० लाख

लक्ष्मी गौतम

पाँचथर — पाँचथरको सदरमुकाम फिदिममा भर्खरै सञ्चालनमा आएको गणेशमान सिंह सामुदायिक अस्पतालमा प्रसूति गराएकी महिलाको मृत्यु भएको घटना छानबिन गर्न समिति गठन गरिएको छ । समिति संयोजकका रुपमा पाँचथर अस्पतालका निमित्त प्रमुख बरुण अग्रवाललाई तोकिएको छ ।

फिदिम नगरपालिका–६ की १९ वर्षीया करिना फागो (तुम्रोक) को आइतबार बिहान निधन भएको थियो । त्यसपछि मृतकका आफन्त र अस्पताल सञ्चालकबीच बढेको असमझदारी कम गर्दै समस्या समाधान गर्न जिल्ला प्रशासन कार्यालयमा सम्पन्न सर्वपक्षीय बैठकले घटना छानबिन गर्न समिति गठन गरेको हो ।

अस्पताल प्रशासनले मृतकको परिवारलाई १० लाख रुपैयाँ उपलब्ध गराउने सहमतिसँगै आफन्तले शव बुझ्ने भएका छन् । अस्पताल प्रशासनले मृतकका आफन्तलाई किरिया खर्चस्वरुप तत्काल ५ लाख र नवजात शिशुको शिक्षादीक्षाका लागि बैंक खाता खोलेर थप पाँच लाख गरी १० लाख रुपैयाँको चेक हस्तान्तरण गरेलगत्तै शव बुझ्ने बुझाउने प्रक्रिया सुरु हुने सञ्चालक सन्तोष श्रेष्ठले जानकारी दिए ।

अस्पताल प्रशासनका अनुसार शनिबार उनले सामान्य अवस्थामा बच्चा जन्माएकी थिइन् । साँझ शरीरमा रगतको मात्रा कम भएपछि थप रगत दिइएको थियो । त्यसपछि रक्तस्राव रोकिए पनि अचानक रक्तचाप घटेर स्वास्थ्यमा जटिलता देखिएको थियो ।

यसपछि थप उपचारका लागि तराईको सुविधा सम्पन्न अस्पताल पठाउने तयारी गर्दा गर्दै उनको मृत्यु भएको श्रेष्ठको भनाइ छ । चिकित्सकहरुका अनुसार यो उपचारको क्रममा भएको लापर्बाही होइन । प्रसूतिपश्चात् अचानक हेमोग्लोबिन र रक्तचाप कम हुँदा यस्तो समस्या हुने उपचारमा संलग्न डा. शुभनारायण ठाकुरले बताए । तर परिवारजन भने अस्पताल पक्षको जवाफबाट सन्तुष्ट छैन । पारिवारिक स्रोतका अनुसार फागोले केही दिन अगाडि पाँचथर अस्पतालमा गर्भ परीक्षण गराएकी थिइन् । त्यस क्रममा चिकित्सकले बच्चाको तौल कम रहेको बताएका थिए ।

सामान्य ढंगले शिशुलाई जन्म दिएकी फागोको कसरी अचानक मृत्यु हुनसक्छ भन्दै परिवारजन एवं स्थानीय आक्रोशित छन् । अस्पताल परिसरमा आफन्त, बजारवासीको भीड छ । अप्रिय घट्ना हुनसक्ने भन्दै सुरक्षाकर्मी पनि खटाइएको जिल्ला प्रहरी कार्यालयले जनाएको छ ।

प्रकाशित : श्रावण २२, २०७९ २२:२१
प्रतिक्रिया
पठाउनुहोस्

‘गुरु ट्राभल’ सञ्चालनमा

कान्तिपुर संवाददाता

काठमाडौँ — नेपालको पर्यटन क्षेत्रमा सबल बनाउने उद्देश्यसहित पहिलो पब्लिक लिमिटेड ट्राभल कम्पनी ‘गुरु ट्राभल’ सञ्चालनमा आएको छ । 

ऊर्जामन्त्री पम्फा भुसालले शुक्रबार कम्पनीको उद्घाटन गरिन् । हेलिकोप्टर व्यवसायी तथा पूर्वप्रहरी विज्ञानराज शर्मा अध्यक्ष रहेको कम्पनीमा पर्यटनलगायत क्षेत्रका ६० जना व्यवसायीहरूको लगानी छ । १० करोड रुपैयाँ चुक्ता पुँजीमा सञ्चालित गुरु ट्राभलले अन्तर्राष्ट्रिय हवाई टिकट, होटल बुकिङ, ट्राभल एन्ड टुर प्याकेजलगायतका सेवा बिक्री गर्ने जनाएको छ ।


प्रकाशित : श्रावण २२, २०७९ २२:१४
पूरा पढ्नुहोस्
प्रतिक्रिया
पठाउनुहोस्
x
×