पहिरोमा अभिभावक गुमाएकालाई घर- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

पहिरोमा अभिभावक गुमाएकालाई घर

लक्ष्मी गौतम

पाँचथर — असार १७ गते गएको पहिरोमा बाबु आमा गुमाएका पाँचथरको फालेलुङ ७ निवासी दुई जना बालबालिकालाई नेपाली सेनाको रणशेर गणले घर निर्माण गरिदिएको छ । गाउँपालिका र जनसेवा समाज पाँचथरसँग सहकार्य गरी गणले चिटिक्क परेका तीनकोठे घर निर्माणपछि हस्तान्तरण गरेको हो । 

घर निर्माणका लागि नेपाली सेनाका १६ जना जनशक्तिले असार २७ देखि निरन्तर १२ दिनसम्म काम गरेका थिए ।

घर निर्माणका लागि गाउँपालिकाले जस्तापाता र काँटी तथा वडा कार्यालयले काठ र ढुंगाजस्ता सामग्री सामग्री सहयोग गरेको गाउँपालिका अध्यक्ष वीरविक्रम थाम्सुहाङले जानकारी दिए ।

ढुंगा,बालुवा र काठ प्रयोग गरिएको घरमा सिमेन्ट प्लस्टर गरिएको छ । नवनिर्मित घर शुक्रबार एक कार्यक्रबीच हस्तान्तरण गरिएको छ ।

असार १७ गते राति अविरल वर्षासँगै घरमाथिबाट खसेको पहिरोले घर बगाउँदा फालेलुङ ७ का रुपलाल मगर, उनकी श्रीमती र भतिजी सविना मगरको ज्यान गएको थियो । त्यसपछि घरबारविहीन भएका छोरा प्रसन र छोरी करुणा मगरका लागि घर बनाउन नेपाली सेनाले सक्रियता देखाएको हो ।

घर निर्माणका लागि सेनाले सक्रियता देखाएपछि जनसेवा समाजका अध्यक्ष राजेन्द्र अधिकारीले गाउँपालिका अध्यक्ष वीरविक्रम थाम्सुहाङ र परिवारबीच छलफल गर्दै निर्माण प्रक्रिया अगाडि बढाउन सहजीकरण गरेका थिए । निर्माणका लागि कुल १ सय १९२ जनशक्ति लागेको गणपति राउतले जानकारी दिए ।

घर निर्माणमा जनशक्ति बाहेक करिब डेढ लाख रुपैयाँ लगानी भएको गाउँपालिकाले जनाएको छ ।

प्रकाशित : श्रावण ७, २०७९ १३:५३
प्रतिक्रिया
पठाउनुहोस्

किसानको करोडौं रुपैयाँ ठगेर व्यवसायी फरार

लक्ष्मी गौतम

पाँचथर — पाँचथरको फिदिम नगरपालिकाका किसानको करोडौं रकम ठगेर दुग्ध व्यवसाय सञ्चालन गर्दै आएका एक व्यवसायी फरार भएका छन् ।

जुम्लाको कनकासुन्दरी गाउँपालिकाबाट आएर फिदिम-३ लालिखर्क कनकासुन्दरी नमक दुग्ध डेरी सञ्चालन गर्दै आएका महेन्द्र हमाल साउन ४ गते फरार भएका हुन् ।

करिब ६ महिनाअघि जुम्लाबाट पाँचथर आएका हमाल फिदिम नगरपालिका २, ३, ७, ८, १४ सँगै फाल्गुनन्द गाउँपालिका ३ र ४ का १ हजारभन्दा धेरै किसानले उत्पादन गरेको दूध खरिद गर्दै दुग्धजन्य वस्तु उत्पादन गर्दै आएका थिए ।

पछिल्लो समय फिदिमस्थित करदाता सेवा कार्यालयबाट कनकासुन्दरी डेरी उद्योगका नाममा ८१७८३१४८४ नम्बरको प्यान लिएर कारोबार गर्दै आएका उनी साउन ४ गते बिहान ११ बजे छोरी र श्रीमतीसहित सदरमुकाम जाने बहानामा फरार भएको भन्दै किसानहरूले जिल्ला प्रहरी कार्यालय पाँचथरमा निवेदन दर्ता गराएका छन् ।

हमालले सञ्चालन गर्दै आएको डेरीका कर्मचारी सुरेन्द्र राईका अनुसार असार महिनामा हमालले यस क्षेत्रका किसानबाट ६५ लाख रुपैयाँको दूध खरिद गरेका थिए । उनले खरिद गरेको दूधबाट उत्पादन गरेको घ्यु र छुर्पीसहितका दुग्ध उत्पादन फिदिममा सञ्चालित सिदिन डेरीमा बिक्री गर्ने गर्थे ।

फिदिम क्षेत्रका किसानलाई भुक्तानी गर्न बाँकी रहेको ६५ लाख, सिदिन डेरी उद्योगको १६ लाख, राँकेका दुग्ध व्यवसायी वाङगेल तामाङको ५ लाख, फिक्कलका कुमार ढुंगेलको ५ लाख रुपैयाँ ठगेर हमाल फरार भएको किसानहरूले प्रहरीमा दर्ता गराएको निवेदनमा उल्लेख छ ।

जिल्ला प्रहरी कार्यालय पाँचथरका प्रमुख (डीएसपी) राकेश थापाले व्यवसायी र किसानले दर्ता गराएको निवेदनका आधारमा घटनाको अनुसन्धान र अभियुक्तको खोजी कार्य सुरु भएको बताँउछन् ।

प्रकाशित : श्रावण ६, २०७९ १०:४२
पूरा पढ्नुहोस्
प्रतिक्रिया
पठाउनुहोस्
x
×