दिक्तेलको जालपामा पहिरो जाँदा ६ परिवार विस्थापित
खोटाङ — दिक्तेल रुपाकोट मझुवागढी नगरपालिका-१२ जालपामा पहिरो जाँदा ६ परिवार विस्थापित भएका छन् । शुक्रबार राति परेको अविरल वर्षाका कारण जालपाको साबालुङमा ५ र घलेगाउँमा १ गरी ६ परिवार विस्थापित भएका हुन् ।
झरीले गाउँ चिराचिरा परेपछि साबालुङका रामीरा राई, शारदा राई, भीमबादुर राई, कर्णबहादुर राई र जीतबहादुर राई र घलेगाउँका धनबहादुरको परिवार विस्थापित भएको वडाध्यक्ष दानबहादुर राईले बताए । थप पहिरोको जोखिम बढेपछि साबालुङको बर्मालीघर टोलमा अस्थायी टहरा बनाएर उनीहरूलाई राखिएको स्थानीय प्रसाद राईले बताए ।
उनीहरूलाई प्लास्टिकको टनेल टाँगेर अस्थायी बसोबासको व्यवस्था मिलाइएको वडाध्यक्ष राईले जानकारी दिए । विस्थापितमध्ये रामीरा एकल महिला र शारदा अभिभावकविहीन हुन् । उनीहरूको आर्थिक अवस्थासमेत नाजुक रहेको वडाध्यक्ष राईले बताए ।
