घाइते बालिकाको मृत्यु- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

घाइते बालिकाको मृत्यु

कान्तिपुर संवाददाता

मोरङ — मोरङको पुरानो बजार रंगेली–७ स्थित माउन्ट मकालु बोर्डिङका प्रिन्सिपलको घरेलु कामदारले चलाएको स्कुल बसले किचेर सिकिस्त घाइते भएकी थप एक बालिकाको उपचारको क्रममा शुक्रबार बिहान मृत्यु भएको छ ।

प्रिन्सिपल भक्तराज (बीआर) सुब्बाको घरमा कार्यरत विजय माझीले मंगलबार स्कुलको को १ क ११३० नम्बरको बस चलाउँदा कक्षा एलकेजीमा अध्ययनरत स्थानीय ५ वर्षीय ऋतिक मण्डल र रंगेली–६ की ५ वर्षीया सोनमकुमारी मण्डललाई विद्यालयको गेटमै किचेको थियो । ऋतिकको घटना स्थलमा मृत्यु भएको थियो ।

घाइते सोनमको उपचारका क्रममा न्युरो अस्पताल विराटनगरमा मृत्यु भएको प्रहरीले बताएको छ । प्रिन्सिपल सुब्बाले माझीलाई बिहान–बेलुका घरको काम गराउन र विद्यालय बसमा विद्यार्थी ओसार्न लगाउँदै आएको स्थानीयको भनाइ छ । माझीसँग सवारी चालक अनुमतिपत्रसमेत छैन । उनी फरार छन । इप्रका रंगेलीका प्रहरी निरीक्षक शैलेन्द्र न्यौपानेका अनुसार विद्यालयका अर्का सवारी चालकलाई प्रहरी नियन्त्रणमा राखेर माझीको खोजी भइरहेको छ ।

सवारी चालक अनुमतिपत्र नभएकालाई विद्यालयको बस चलाउन दिएकोमा विद्यालय व्यवस्थापनसँग जोडिएकालाई पनि कानुनी कारबाही गर्ने तयारी भइरहेको उनले बताए । आक्रोशित स्थानीयका अनुसार साढे ८ लाख क्षतिपूर्ति दिएर घटनालाई ढाकछोप र थामथुम गर्ने प्रयास भइरहेको छ ।

विद्यालय परिसरभित्र ज्यान गएकोले माझीसँगै प्रिन्सिपल सुब्बालाई कर्तव्य ज्यानमा मुद्दा चलाइनुपर्ने स्थानीयको माग छ । स्थानीयका अनुसार सत्ता र शक्तिमा पहुँच राख्ने केही नेताहरू प्रहरीलाई दबाब दिएर मुद्दालाई कमजोर पार्नतिर लागेका छन् ।

विद्यालय व्यवस्थापनमा संलग्न मुख्य व्यक्तिहरूलाई कानुनी दायरामा नल्याए आफूहरू सडकमा उत्रिन बाध्य हुने स्थानीयको चेतावनी छ । जनप्रतिनिधिकै रोहबरमा ज्यानको मूल्य तोकेर अपराधीलाई उन्मुक्ति दिने षड्यन्त्र भइरहेको स्थानीयको आरोप छ ।

प्रकाशित : असार १८, २०७९ ०८:२६
प्रतिक्रिया
पठाउनुहोस्

निउरो टिप्न जाँदा गोली लागेर मृत्यु

कान्तिपुर संवाददाता

बर्दिया — बर्दियासित सीमा जोडिएको भारतको मुर्तिहास्थित घना जंगलमा गएका बेला गोली लागेर घाइते एक नेपालीको उपचारका क्रममा शुक्रबार मृत्यु भएको छ । परिवारका अनुसार निउरो टिप्न उक्त जंगलमा गएका गुलरिया–३ का ५४ वर्षीय हेमराज गोडियालाई गोली लागेको हो ।

गोली लागेर घाइते भएपछि भाग्दै घर नजिक पुगेका थिए । त्यस क्रममा उनी बेहोस भएका थिए । होसमा आएपछि फोन गरी आफन्तलाई बोलाएको उनकी श्रीमती मडेरीले बताइन् । त्यसपछि राति नै उनलाई गुलरिया अस्पताल पुर्‍याइएको थियो ।

अत्यधिक रगत बगेकाले मृत्यु भएको प्रहरी उपरीक्षक वीरेन्द्रबहादुर शाहीले बताए । उनलाई कसले गोली हानेको हो भन्ने अनुसन्धान भइरहेको उनले जनाए । नजिकै कतरनिया वन्यजन्तु आरक्ष भएका कारण अनधिकृत रूपमा जंगल प्रवेश गरेको भन्दै भारतीय वन रक्षकले गोली हानेको आशंका नेपाली सुरक्षाकर्मीले गरेका छन् । पोस्टमार्टमपछि उनको शव आफन्तले बुझेका छन् ।

प्रकाशित : असार १८, २०७९ ०८:२५
पूरा पढ्नुहोस्
प्रतिक्रिया
पठाउनुहोस्
×