खुम्बु घुम्न आएका दुई विदेशी बेपत्ता- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

खुम्बु घुम्न आएका दुई विदेशी बेपत्ता

भानुभक्त निरौला

सोलुखुम्बु — सोलुखुम्बुको सगरमाथा क्षेत्रको भ्रमणमा आएका दुई जना विदेशी पर्यटक तीन सातादेखि वेपत्ता भएका छन् । खुम्बु क्षेत्र आएका भारतीय नागरिक ३१ वर्षीय पुरुष सिरनाथ चन्द्रमोहोन र कोरियाली नागरिक ५० वर्षीया महिला योहन २४ दिनदेखि सम्पर्कविहीन रहेको जिल्ला प्रहरी कार्यालय सोलुखुम्बुले जनाएको छ ।

जेठ ५ गते सगरमाथा राष्ट्रिय निकुन्जको मन्जो चेकपोस्टमा इन्ट्रि भएर आधारशिविरतर्फ लागेका ती दुवै पर्यटक त्यसयता सम्पर्कमा नरहेको प्रहरी निरीक्षक उमाशंकर प्रसाद शाहले बताए ।

भारतीय नागरिक सम्पर्कविहिन भएको भन्दै खोजीमा सहयोग गरिदिन भारतिय दूतावासबाट टेलिफोन आएको र कोरियाली नागरिक परिवारको सम्पर्कमा नभएको खबर प्राप्त भएको प्रहरीले जनाएको छ ।

पथ प्रदर्शकबिना खुम्बु घुम्न आएका उनीहरुको खोजी कार्यलाई तीव्र बनाइएको जिल्ला प्रहरी कार्यालयले जनाएको छ ।

प्रकाशित : जेष्ठ ३१, २०७९ १०:५०
प्रतिक्रिया
पठाउनुहोस्

धनकुटामा श्रीमतीमाथि खुर्पा प्रहार

रमेशचन्द्र अधिकारी

धनकुटा — धनकुटाको चौबिसे गाउँपालिका–५ हमेलामा एक शिक्षकले आफ्नै श्रीमतीमाथि खुर्पा प्रहार गरेका छन् । ३३ वर्षीय जसन तामाङले २८ वर्षीया श्रीमती सुनितालाई सोमवार राति खुर्पा प्रहार गरेको जिल्ला प्रहरी कार्यालयका प्रवक्ता डीएसपी चिरञ्जीवि दाहालले बताए ।

तामाङ स्थानीय मछिन्द्रदेवी आधारभूत विद्यालयका स्थायी शिक्षक हुन् । सुनिता रगताम्मे अवस्थामा छिमेकीको शरणमा पुगेर ज्यान जोगाएको स्थानीयले बताए ।

उनको बायाँ खुट्टा, दायाँ हात र शरीरका विभिन्न भागमा चोट लागेको छ । गम्भीर घाइते अवस्थामा उद्धार गरी राति नै धरानस्थित बिपी कोइराला स्वास्थ्य विज्ञान प्रतिष्ठानमा उपचारका लागि लगिएको छ । घटनामा सम्लग्न तामाङलाई मौनाबुधुकबाट खटिएको प्रहरी टोलीले नियन्त्रणमा लिएको छ ।

घरायसी विवादका कारण घटना भएको प्रहरीको भनाई छ । घटनाबारे थप अनुसन्धान भइरहेको प्रहरी प्रवक्ता दाहालले जानकारी दिए ।

प्रकाशित : जेष्ठ ३१, २०७९ १०:४८
पूरा पढ्नुहोस्
प्रतिक्रिया
पठाउनुहोस्
×