सोलुखुम्बु जिसस प्रमुखमा कांग्रेसको एकल उम्मेदवारी- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

सोलुखुम्बु जिसस प्रमुखमा कांग्रेसको एकल उम्मेदवारी

भानुभक्त निरौला

सोलुखुम्बु — जिल्ला समन्वय समिति सोलुखुम्बुको प्रमुखमा नेपाली कांग्रेसका कृष्णप्रसाद निरौलाको मात्रै उम्मेदवारी परेको छ । ८ वटा स्थानीय तह रहेको जिल्लामा ५ वटा पालिकामा जित हाँसिल गरेको कांग्रेसको मात्रै जिल्ला समन्वय समितिमा उम्मेदवार दर्ता भएको हो । जिल्ला समन्वय समिति नेतृत्व चयनका लागि ९ मत आवश्यक पर्नेमा कांग्रेससँग १० मत छ । कांग्रेससँग बहुमत भएकाले अन्य अन्य दलले उम्मेदवारी नदिएका हुन् । 

६२ वर्षीय निरौला यसपटकको स्थानीय तह निर्वाचनमा थुलुङदुधकोसी गाउँपालिका वडा नम्बर ३ पञ्चनबाट खुलातर्फ वडा सदस्यमा निर्वाचित भएका थिए । उनी २०५४ को स्थानीय तह निर्वाचनमा नेपाली कांग्रेसका तर्फबाट पन्चन गाविसको उपाध्यक्ष र त्यसअघि २०४३ मा गाउँ पञ्चायतका उपप्रधानमा निर्वाचित भएका थिए ।

त्यस्तै समन्वयको उपप्रमुखमा सोलुदुधकुण्ड ३ बाट वडा सदस्यमा निर्वाचित टिकामाया मगरको उम्मेदवारी परेको छ । ७ सदस्यमा नारायणकुमार निरौला, धर्मध्वज बस्नेत, पेम्बा शेर्पा, सोमराज केसी, हिरामाया विक, सितामाया बस्नेत र कमला नाछिरिङले उम्मेदवारी दिएका छन् ।

आज कांग्रेसबाट मात्रै मनोनयन परेकाले आगामी २६ गते निर्वाचित भएको घोषणा गरेर जेठ २९ गते शपथग्रहण गराउने मुख्य निर्वाचन अधिकृत सन्तोष पराजुलीले जानकारी दिए । वैशाख ३० मा सम्पन्न निर्वाचनमा एमालेले २, माओवादी केन्द्रले १ र कांग्रेसले ५ पालिका जितेका छन् ।

प्रकाशित : जेष्ठ २२, २०७९ १७:३३
प्रतिक्रिया
पठाउनुहोस्

रुकुम पश्चिमको जिसस निर्वाचन जेठ ३१ मा

हरि गौतम

रुकुम पश्चिम — जिल्ला समन्वय समितिको निर्वाचन जेठ ३१ गते हुने भएको छ । मुख्य निर्वाचन अधिकृतको कार्यालयले निर्वाचनको सम्पूर्ण कार्यतालिका सहितको सूचना आइतबार जारी गरी ३१ गते मतदान हुने जानकारी गराएको छ ।

जिल्लाका ६ वटै स्थानीय तहको निर्वाचन, कार्यपालिका सदस्य निर्वाचनपछि मुख्य निर्वाचन अधिकृतको कार्यालय जिल्ला समन्वय समितिको निर्वाचन गराउन लागेको हो ।

निर्वाचन तालिका अनुसार जेठ २६ गते मनोनयन दर्ताको कार्यक्रम तय गरिएको छ । जिल्ला समन्वय समितिको निर्वाचनका लागि जिल्लामा १२ जना मतदाता छन् । ३ नगरपालिकाका ३ प्रमुख र ३ उपप्रमुख, ३ गाउँपालिकाका ३ अध्यक्ष र ३ उपाध्यक्ष गरी १२ जना मतदाताले मतदान गर्नेछन् ।

१२ जनामा ९ जना मतदाता माओवादी केन्द्रबाट निर्वाचित छन् भने २ जना नेपाली कांग्रेसबाट निर्वाचित छन् । एक जना मतदाता नेकपा एकीकृत समाजवादीबाट निर्वाचित भएका छन् ।

चौरजहारी नगरपालिका, आठबीसकोट नगरपालिका, सानीभेरी र त्रिवेणी गाउँपालिकामा माओवादीका प्रमुख, उपप्रमुख, अध्यक्ष उपाध्यक्ष निर्वाचित भएका छन् । मुसीकोट नगरप्रमुखमा नेपाली कांग्रेस र उपप्रमुखमा नेकपा एकीकृत समाजवादीका उम्मेदवार निर्वाचित भएका छन् ।

बाँफिकोट गाउँपालिका अध्यक्ष नेपाली कांग्रेसले जितेको छ भने उपाध्यक्ष नेकपा माओवादीले जितेको छ । जिल्ला समन्वय समितिमा प्रमुख, उपप्रमुख सहित ७ जना सदस्य गरी ९ निर्वाचित हुनेछन् ।

प्रकाशित : जेष्ठ २२, २०७९ १७:१८
पूरा पढ्नुहोस्
प्रतिक्रिया
पठाउनुहोस्
×