धनकुटामा मोटरसाइकल दुर्घटना हुँदा महिलाको मृत्यु- प्रदेश १ - कान्तिपुर समाचार

धनकुटामा मोटरसाइकल दुर्घटना हुँदा महिलाको मृत्यु

रमेशचन्द्र अधिकारी

धनकुटा — धनकुटामा मोटरसाइकल दुर्घटना हुँदा युवतीको मृत्यु भएको छ । कोसी राजमार्गको धरान-धनकुटा सडक खण्डस्थित साँगुरीगढी गाउँपालिका ६ कार्कीछापमा सोमबार श्रीमान्‌ले चलाएको मोटरसाइकल दुर्घटना हुँदा त्यसमा सवार श्रीमतीको मृत्यु भएको हो ।

मृत्यु हुनेमा तेह्रथुमको छथर गाउँपालिका ५ की २२ वर्षीया कौशिला चेम्जोङ रहेको प्रहरीले जनाएको छ ।

को. ३४ प ११८५ नम्बरको मोटरसाइकल मध्याह्न पौने १२ बजे अनियन्त्रित भएर दुर्घटना भएको थियो । मोटरसाइकल चालक मृतकका पति रामकुमार लिम्बु सामान्य घाइते भएका छन् ।

मोटरसाइकलको पछाडी बसेकी चेम्जोङ गम्भीर घाइते भएकी थिइन् । उनको धरानस्थित बीपी कोइराला स्वास्थ्य विज्ञान प्रतिष्ठानमा उपचारका क्रममा अपराह्न साढे ३ बजे मृत्यु भएको जिल्ला प्रहरी कार्यालयका प्रवक्ता डीएसपी चिरञ्जीवी दाहालले जानकारी दिए ।

प्रकाशित : जेष्ठ ९, २०७९ १९:३४
प्रतिक्रिया
पठाउनुहोस्

धनकुटाको सहिदभूमि गाउँपालिकामा एमाले विजयी

रमेशचन्द्र अधिकारी

धनकुटा — धनकुटाको सहिदभूमि गाउँपालिकाको अन्तिम मतगणनाअनुसार अध्यक्ष र उपाध्यक्षमा नेकपा एमालेका उम्मेदवार विजयी भएका छन् । 

एमालेबाट अध्यक्ष पदका उमेदवार मनोज राई ४ हजार २ सय १४ मतका साथ विजयी भएका छन् । उनले गठबन्धनका तर्फबाट एकीकृत समाजवादीका उम्मेदवार जितबहादुर राईलाई पराजित गरेका हुन् । पराजित गठबन्धन उम्मेदवार राईले ४ हजार २७ मत प्राप्त गरेको निर्वाचन कार्यालय स्रोतले जनाएको छ ।

यसैगरी उपाध्यक्षमा पनि एमालेकै रत्नश्वरी राई विजयी भएकी छिन् । उनले ४ हजार ६ सय ७२ मत प्राप्त गरिन् । निकटतम प्रतिस्पर्धी गठबन्धनका तर्फबाट नेपाली कांग्रेसका तोर्णबहादुर खड्काले ३ हजार ३ सय ७१ मत प्राप्त गरेका छन् ।

धनकुटाको सहिदभूमि गाउँपालिका-६ स्थित ठाकुरदेवी माध्यमिक विद्यालयका ३ वटा मतदान केन्द्रमा स्थगित भएको मतदान गत सोमबार सम्पन्न भएको थियो । सोही दिन रातिदेखि थालिएको मतगणना आज अपरान्ह सम्पन्न भएको छ । विजयी दुवै अध्यक्ष र उपाध्यक्ष पुनः दोस्रो कार्यकालका लागि सोही पदमा निर्वाचित बनेका हुन् ।

प्रकाशित : जेष्ठ ४, २०७९ १७:४१
पूरा पढ्नुहोस्
प्रतिक्रिया
पठाउनुहोस्
x
×