धानखेती बढे पनि उत्पादन घट्यो, आयात बढ्यो

गत वर्ष ३ लाख ३२ हजार हेक्टरमा धान रोपाइँ भएको थियो । १३ लाख ११ हजार टन धान उत्पादन भएको थियो । यसपालि ३ लाख ३६ हजार हेक्टरमा धान रोपाइँ भएकोमा १२ लाख ८२ हजार टन मात्र उत्पादन भएको छ । धान पाक्ने समयमा परेको बेमौसमी वर्षाका कारण खेती बढे पनि यसपालि उत्पादन घट्यो । प्रदेश कृषि मन्त्रालयका प्रवक्ता राजेन्द्र उप्रेतीका अनुसार बेमौसमी वर्षाले प्रदेशमा करिब ५० हजार हेक्टरको पाकेको धान क्षतिग्रस्त भएको थियो ।

उत्पादन घटेपछि जोगबनी नाकाबाट धान र चामलको आयात बढेको छ । चालु वर्षको पाँच महिनामा यो नाकाबाट दुई अर्बभन्दा बढी मूल्यको धान र चामल आयात भएको भन्सारको तथ्यांक छ । भन्सार अधिकृत अमित तिवारीका अनुसार साउनदेखि मंसिरसम्ममा १ अर्ब १२ करोड ७३ लाख ६६ हजार मूल्य बराबरको ४० हजार ६ सय ४१ टन धान र ८३ करोड ८३ लाख ८८ हजार मूल्य बराबरको १७ हजार ८ सय ३७ टन चामल आयात भएको छ ।

गतवर्षभरिमा यो नाकाबाट ३ अर्ब ५० करोड ३६ लाख ३२ हजार मूल्यको १ लाख १५ हजार २ सय ९४ टन धान र २ अर्ब ३४ करोड ३५ लाख ७७ हजार मूल्यको ५२ हजार ६ सय ८१ टन चामल आयात भएको तिवारीले बताए । झापा, मोरङ र सुनसरीमा प्रधानमन्त्री एकीकृत कुषि परियोजनाअन्तर्गत धान जोन कार्यक्रम लागू गरिएको छ ।

झापामा गत वर्ष ८५ हजार ७ सय ५० हेक्टरमा धान रोपाइँ हुँदा ४ लाख १५ हजार ६ सय २५ टन धान उत्पादन भएको थियो । यसपालि करिब दुई हजार हेक्टर बढी ८७ हजार ५ हेक्टरमा रापाइँ गर्दा ४ लाख २३ हजार टन मात्र उत्पादन भएको छ । मोरङमा गत वर्षभन्दा ११ हजार टन धान उत्पादन घटेको छ ।