नाङ्लोको व्यापार फस्टाउँदै- प्रदेश १ - कान्तिपुर समाचार

नाङ्लोको व्यापार फस्टाउँदै

रमेशचन्द्र अधिकारी

धनकुटा — बाँसको चोयाबाट बनाइएका नाङ्लोको व्यापार फस्टाउँदै गएको छ । धनकुटासँगै सिमाना जोडिएको भोजपुरको होम्ताङलगायत स्थानीयबासीको भरपर्दो आम्दानीको स्रोतको रुपमा नाङ्लो व्यवसाय रहेको छ ।

हतुवागढी गाउँपालिकास्थित होम्ताङका अधिकांशले बाँसबाट घरेलु सामग्री बनाउने गरेको स्थानीय कान्छा राई बताउँछन् । खासगरी होम्ताङको साविकको वडा नं. ५ र ६ मा स्थानीयले व्यावसायिक रुपमा नाङ्लो बनाएर बिक्री गर्दै आएको उनको भनाइ छ । ‘यहाँका अधिकांशको मुख्य आयस्रोत नै नाङ्लो व्यवसाय हो’, उनले भने, ‘बिक्री नहोला भन्ने चिन्ता नभएपछि धेरै उत्पादन हुन्छ ।’

मोटरबाटो बन्नुअघि ढाकरमा बोकेर त्रिवेणीबाट चतारा हुँदै धरान तथा इटहरी लैजाने गरिन्थ्यो । गाउँघरमै सडक बनेपछि ढुवानी साधनबाट नजिकका शहर बजारमा ती सामग्री बिक्री गर्दै आएका छन् । अझ गाउँघरमै पुगेका व्यापारीले सयौंको संख्यामा बिक्री गरेर ढुवानी साधनबाट लैजाने गरेपछि राहत मिलेको स्थानीय दिलबहादुर राईले बताए ।

‘उतिबेला निकै कष्ट हुन्थ्यो’, विगत कोट्याउँदै उनले सुनाए, ‘अब त गाउँघरमै मोटरबाटो पुगेपछि ट्याक्टरमा राखेर सहरमा लैजाने गरिन्छ ।’

थोक मूल्य प्रतिगोटा १ सय रुपैयाँ भएको स्थानीयको भनाइ छ । व्यापारीले भने प्रतिगोटा १ सय १० रुपैयाँसम्म बिक्री गर्दै आएका छन् । बजारमा प्लास्टिकका नाङ्लाहरू भित्रिए पनि बासबाट बनेका नाङ्लोको माग अत्यधिक रहेको स्थानीयको दाबी छ । होम्ताङ गाउँबाट धनकुटाको पाख्रिबास हुँदै ती सामग्री पूर्वका ठुला शहर धरान, इटहरी, विराटनगरलगायत भारततर्फ पनि ढुवानी साधनमार्फत् निर्यात गरिन्छ । अत्यधिक बाँस पाइने भएकाले नाङ्लोलगायत हस्तकलाका सीपमूलक सामग्री बनाइने चलन रहेको स्थानीयले बताए ।

प्रकाशित : माघ १०, २०७८ १९:११
प्रतिक्रिया
पठाउनुहोस्

सरकारको निर्णयविपरीत तीनवटा गाउँपालिकाले खुलाए स्कुल

लक्ष्मी गौतम

पाँचथर — पाँचथरका तीनवटा स्थानीय तहले संघीय सरकार र कोभिड १९ संकट व्यवस्थापन समिति (डिसिएमसी)को निर्णय र आदेश विपरीत विद्यालयहरूमा पठन पाठन जारी राखेका छन् ।




माघ १५ गतेसम्म देशभरका विद्यालय बन्द गर्न संघीय सरकारले गरेको निर्णयसँगै संघीय सरकारको निर्णय कार्यन्वयन गर्न डिसिएमसीले दिएको आदेश विपरीत फालेलुङ, मिक्लाजुङ र तुम्बेपा गाउँपालिकाले पठन पाठन जारी राखेका हुन् ।

फालेलुङ गाउँपालिकाले उक्त क्षेत्रमा कोरोनाको जोखिम नरहेको भन्दै माघ ९ गतेदेखि पठन पाठन सञ्चालन गर्न सबै विद्यालयलाई पत्र लेखेको छ भने मिक्लाजुङले पुस २७ र तुम्बेपाले माघ २ गते नै पत्र लेख्दै पालिकाका सबै विद्यालयमा पठन पाठन जारी राख्न भनेको छ ।

पछिल्लो पटक माघ ७ गते बसेको कोभिड १९ संकट व्यवस्थापन समिति (डिसिएमसी) पाँचथरको बैठकले संघीय सरकारले माघ १५ गतेसम्म विद्यालय बन्द गर्न गरेको निर्णय कडाइसाथ कार्यन्वयन गर्न निर्देशन दिए पनि ती स्थानीय तहले उल्लंघन गरेका हुन् ।

संघीय सरकार र कोभिड १९ संकट व्यवस्थापन समितिले जे जस्तो निर्णय गरेपनि गाँउँपालिकाको शैक्षिक क्यालेण्डर अनुसार पठन पाठन जारी राख्न विद्यालयहरूलाई निर्देशन दिइएको फालेलुङ गाउँपालिकाको शिक्षा शाखा प्रमुख करुणा नेपालले बताइन् ।

उनका अनुसार गाउँपालिकाको शैक्षिक क्यालेण्डरमा पुस २२ देखि माघ ७ गतेसम्म हिउँदे बिदा हुन्छ । तर बिदा सकिए लगत्तै क्यालेण्डर अनुसार नै पठन पाठन सुरु राख्न भनिएको उनले बताइन् ।

मिक्लाजुङ गाउँपालिका अध्यक्ष अमरराज माखिमले अवस्था सामान्य रहेका बेला पठन पाठन नियमित गर्दै समयमै कोर्स सक्नतिर लाग्नुपर्ने भएकाले तत्काल स्कुल बन्द नगर्ने निर्णयमा पुगेको तर्क राखे ।

‘अहिले नै स्कुल बन्द गर्दा शैक्षिक सत्रमा कोर्स सकिँदैन संक्रमण बढ्यो भने स्वतः बन्द गर्छौं,’ माखिमले भने । तीनवटै स्थानीय तहले गाउँ कार्यपालिका बैठकबाटै निर्णय गरेर विद्यालय नियमित राखेको जनाएका छन् ।

संघीय सरकार, डिसिएमसी र स्थानीय तहका फरक फरक निर्णयले अविभावक र विद्यार्थी भने अन्योलमा परेका छन् । 'स्कुल जाऔं कोभिड संक्रमण हुने, नजाऔं पढाइ छुट्ने, कस्को आदेश मान्ने कस्को नमान्ने ?’ मिक्लाजुङको दुर्गा मावि कक्षा १० का छात्र रमेश राईले भने ।

स्थानीय तह, डिसिएमसी र संघीय सरकारका आआफ्नै अडानले आफूहरू पनि अलमलमा परेको अविभावकहरू बताउँछन् । प्रमुख जिल्ला अधिकारी सुरेश न्यौपानेले भने संघीय सरकारले गरेको निर्णय नै सर्वोपरी हुने भएकाले स्कुल खोल्न नमिल्ने बताए । साथै निर्णय कार्यान्वयनमा कडाइ गर्ने उनले बताए ।

प्रकाशित : माघ १०, २०७८ १९:०५
पूरा पढ्नुहोस्
प्रतिक्रिया
पठाउनुहोस्
×