नोबेल मेडिकल कलेजमा विद्यार्थी र प्रशासनबीच झडप- प्रदेश १ - कान्तिपुर समाचार

नोबेल मेडिकल कलेजमा विद्यार्थी र प्रशासनबीच झडप

देवनारायण साह

मोरङ — नोबेल मेडिकल कलेज विराटनगरले अतिरिक्त शुल्क लिएपछि त्यसको विरोधमा उत्रिएका आन्दोलनरत विद्यार्थी र कलेज प्रशासनबीच झडप भएको छ । नोबेल मेडिकल कलेजले एमबीबीएसमा भर्ना भएका नयाँ विद्यार्थीसँग अतिरिक्त शुल्क लिएपछि विभिन्न राजनीतिक संगठनसहित विद्यार्थीहरूले आन्दोलन गर्दैआएका छन् ।

नेपाल विद्यार्थी संघ, अनेरास्ववियु, अखिल क्रान्तिकारी, नेकपा (एकीकृत समाजवादी)का भ्रातृ संगठन अनेरास्ववियू, समाजवादी विद्यार्थी यूनियन मोरङको सहयोगमा पीडित विद्यार्थीहरूले स्थानीय प्रशासनको निर्देशन अवज्ञा गर्दै सोमबार सिटी जुलुस प्रदर्शन गरेका थिए ।

जुलुस प्रदर्शन गर्ने क्रममा आन्दोलनरत विद्यार्थीहरूले तालाबन्दी गरेको कलेज प्रशासनमा कर्मचारीहरूले काम गरिरहेको र भारतीय विद्यार्थी, छात्रवृत्ति र अतिरिक्त शुल्क तिरेका विद्यार्थीहरूलाई अनलाइन कक्षा सञ्चालन गरिरहेको देखेपछि विरोव जनाउँदा झडप भएको हो ।

आन्दोलनरत विद्यार्थीहरूले कलेज प्रशासनमा लगाइएको तालाबन्दीको अवस्था हेर्न जाने क्रममा कलेजका सुरक्षा गार्डले भाटा हिर्काएपछि १० जना विद्यार्थी नेताहरू घाइते भएका छन् । समाजवादी विद्यार्थी यूनियनका साहिल झा, अखिल क्रान्तिकारीका टेकेन क्षेत्री, उमेश सेन्चुरीलगायतका विद्यार्थी नेताहरू घाइते भएको अनेरास्ववियुका नवीन पहाडीले बताए ।

सुरक्षा गार्डहरूले विद्यार्थीहरूलाई भाटाले प्रहार गर्दा टाउको फुटेको, आँखा, हातखुट्टामा चोट लागेको पीडित विद्यार्थीहरूले गुनासो गरेका छन्। सुरक्षा गार्डको आक्रमणबाट जोगिँदै कलेज प्रशासन कार्यालय पुगेका विद्यार्थीहरूले भित्र कर्मचारीले नर्सिङ डिपार्टमेन्टबाट पसेर काम गरिरहेको देखेपछि तोडफोड गरेका छन् ।

विद्यार्थीहरूले प्रशासन फाँटको दुई वटा कम्प्युटर, प्रिन्टर, झ्याल, ढोकाको सिसा फुटाएको कलेज प्रशासनले आरोप लगाएको छ । विद्यार्थी र सुरक्षा गार्टबीच भएको झडपको क्रममा नोबेल अस्पतालको औषधि पसलमा समेत तोडफोड भएको छ ।

विद्यार्थीहरूमाथि सुरक्षा गार्डले आक्रमण गरिरहँदा सुरक्षाकर्मीहरू भने मुकदर्शक बनेका थिए । सुरक्षाकर्मीको व्यवहारले स्थानीय प्रशासनले नोबेल मेडिकल कलेजलाई संरक्षण गरिरहेको अनुभूति भएको आन्दोलनरत विद्यार्थीहरूले गुनासो गरेका छन् ।

‘एकातिर कलेज प्रशासनले विद्यार्थीहरूका अभिभावकलाई डर, त्रास देखाएर अतिरिक्त शुल्क असुली गरी विद्यार्थी भर्ना गरिरहेको र अर्कोतिर स्थानीय प्रशासन लगायत सरकार वार्ता, छलफलका साथै कारबाहीका लागि एक अर्को निकायलाई पत्राचार गरेको देखाइरहेको छ,’ विद्यार्थी नेता पहाडीले भने, ‘चिकित्सा शिक्षा आयोगले गरेको निर्णय विपरीत नोबेलले अतिरिक्त शुल्क असुली गरिरहँदा पनि राज्य मौन रहेकाले अब शान्तिपूर्ण आन्दोलनको औचित्य समाप्त भएको छ ।’ उनले अब नोबेलविरुद्ध तोडफोडमा उत्रिनुको विकल्प नभएको चेतावनी दिए ।

मोरङका प्रमुख जिल्ला अधिकारी काशीराज दाहालले भने कोरोनाको ओमिक्रोन भेरिएन्ट समुदायस्तरमा फैलिसकेको अवस्थामा आन्दोलन गर्दा संक्रमण फैलिने जोखिम बढेकाले नोबेल कलेजविरुद्ध आन्दोलनरत विद्यार्थी संगठनलाई आन्दोलन स्थगित गर्न आइतबार निर्देशन दिएका थिए ।

प्रजिअ दाहालले पठाएको पत्रमा नोबेल मेडिकल कलेजले चिकित्सा शिक्षा आयोगले तोकेको भन्दा बढी शुल्कको विषयमा अनुसन्धान गरी कानुन बमोजिम कारबाहीको प्रक्रिया अघि बढिसकेकोले पनि आन्दोलनको औचित्य नभएको भनिएको छ ।

जिल्ला प्रहरी कार्यालय मोरङले एक साताभित्र अनुसन्धान गरेर विद्यार्थीसँग अतिरिक्त शुल्क लिएको पाइए कलेज सञ्चालकलाई कारबाहीको दायरामा ल्याउन अनुसन्धान सुरु गरेको छ ।

कलेज प्रशासनले चिकित्सा शिक्षा आयोगले तोकेभन्दा विपरीत पठनपाठन सुरु नै नगरी चार लाख ८२ हजार अतिरिक्त शुल्क बुझाउन दबाब दिएपछि अभिभावक तथा विद्यार्थीले प्रदेश १ का मुख्यमन्त्री, मन्त्रीदेखि जिल्ला प्रशासनमा ज्ञापनपत्र बुझाएर मंसिर १९ गतेदेखि न्यायका लागि संघर्ष गर्दै आएका छन् ।

जिल्ला प्रशासन कार्यालय मोरङको निर्देशनमा पुस ११ गतेदेखि पठनपाठन सञ्चालन गरेको कलेज प्रशासनले अतिरिक्त शुल्क नबुझाएको भन्दै पुस १४ गतेदेखि पठनपाठनमा रोक लगाएको छ । पठन पाठनमा रोक लगाएपछि विद्यार्थी संगठनको सहयोगमा पीडित विद्यार्थीहरूले कलेज प्रशासनमा पुस २१ गते तालाबन्दी गरेर रिले अनसन बस्दैआएका छन् ।

चिकित्सा शिक्षा आयोगले भने एमबीबीएस अध्ययनका लागि कुल ४४ लाख ३६ हजार २५ रुपैयाँ शुल्क निर्धारण गरेको छ ।

प्रकाशित : माघ १०, २०७८ १६:०५
प्रतिक्रिया
पठाउनुहोस्

कोरोना नियन्त्रणमा बाँके स्वास्थ्य कार्यालय भूमिकाविहीन

ठाकुरसिंह थारु

नेपालगन्ज — कोरोना संक्रमण फैलिरहँदा जिल्ला स्वास्थ्य कार्यालय बाँके भने भूमिकाविहीन बनेको छ । जिल्ला कोभिड संकट व्यवस्थापन समितिले नै स्वास्थ्य केन्द्रलाई भूमिकाविहीन बनाउँदै लगेको स्वास्थ्यका अधिकारीहरूले गुनासो गरेका छन् ।

कोरोना संक्रमण नियन्त्रणका लागि समितिले स्वास्थ्यका अधिकारीहरूसँग सहकार्यसमेत नगरेपछि स्वास्थ्य केन्द्र भूमिका विहीन बनेको हो । यसअघि स्वास्थ्य केन्द्रले कोरोना संक्रमितहरूको सम्पर्कमा रहेकाहरूको ट्रेसिङ गरी परीक्षण गर्ने र कोभिडबाट जोगिने उपायबारे प्रचारप्रसार गर्दै आएको थियो ।

विभिन्न रोगको अवस्थाबारे अभिलेख राख्ने स्वास्थ्य केन्द्रलाई बाँके जिल्लामा कोरोनाको संक्रमण दर, संख्या, मृत्यु, प्रभावित संख्याको अभिलेखसमेत दिइएको छैन ।

त्यस्तै, जिल्लाको कोरोना संक्रमणको अवस्थाबारे जानकारी दिने स्रोत व्यक्ति (फोकल पर्सन) हुनबाट समेत स्वास्थ्य केन्द्रलाई बन्चित गराइएको छ । यसअघि फोकल पर्सनका रुपमा जिल्ला स्वास्थ्य कार्यालयका प्रमुख वा अधिकृत सरहको स्वास्थ्यका कर्मचारीलाई तोकिने गरेको थियो ।

स्वास्थ्य कार्यालयले सुरुमा सहायक जनस्वास्थ्य अधिकृत नरेश श्रेष्ठलाई फोकल पर्सन तोकिएको थियो । उनको सरुवा भएपछि सहायक जनस्वास्थ्य अधिृकत मानबहादुर नेपालीलाई फोकल पर्सन तोकिएको थियो । तर बाँकेमा भने जिल्ला कोभिड संकट व्यवस्थापन समितिले नेपालगन्ज उपमहानगरपालिकाको स्वास्थ्य शाखामा कार्यरत हेल्थ असिस्टेन्ट तेज वलीलाई दुई वर्षदेखि फोकल पर्सन तोकेको हो ।

‘बाँकेबाहेक अन्य जिल्लामा हेल्थ असिस्टेन्ट फोकल पर्सन भएको सुन्नु भएको छ ?,’ जिल्ला स्वास्थ्य कार्यालय बाँकेका प्रमुख धिरजंग शाहले सोधे, ‘हाम्रो सिनीयर कर्मचारीलाई भूमिका नदिँदा हाम्रो मानमर्दन भएन र ?’

शाहले भनेका छन्, 'स्वास्थ्य कार्यालयलाई जिल्लाको सम्पूर्ण स्वास्थ्य अवस्थाबारे रिपोर्टिङ गर्नुपर्छ । बाँकेमा कोभिड सुरु भएपछि केन्द्रका कर्मचारीहरू रातदिन स्वास्थ्यकर्मीहरूसँगै खटिन्थे । कोरोनाको त्रास कतिसम्म थियो भने स्वास्थ्यकर्मीहरू समेत बिरामी नजिक पुग्न डराउँथे । त्यस्तो अप्ठ्यारोमा पनि स्वास्थ्यका कर्मचारीहरू ज्यानको पर्वाह नगरेर खटिएका थिए ।'

तर पछिल्लो समय भने सहकार्य नगरिएपछि कर्मचारीहरूको गुनासो बढेको जिल्ला स्वास्थ्य केन्द्र बाँकेका प्रमुख शाह बताउँछन् । 'कतिसम्म भने हामीले तोकेको फोकल पर्सनलाई काम गर्न दिइएन ।’

बाँकेका प्रमुख जिल्ला अधिकारी सूर्यबहादुर खड्काले भने कोरोना संक्रमण नियन्त्रणका लागि स्वास्थ्य कार्यालयसँग सम्पर्कमा रहेको बताए । उनले स्वास्थ्य बाहेक अन्य क्षेत्रसँग बैठकमा छलफल हुने गरेको बताए ।

‘म बाँके आएको केही महिना भएको छ । पहिले जे चलेको थियो त्यसलाई निरन्तरता मात्रै दिएका छौँ,’ उनले भने, ‘स्वास्थ्य कार्यालयको भूमिकाविहीन बनाउनु पर्ने कुनै कारण छैन । अझ उहाँहरूको सहयोग अपरिहार्य छ ।’

प्रकाशित : माघ १०, २०७८ १५:४७
पूरा पढ्नुहोस्
प्रतिक्रिया
पठाउनुहोस्
×