प्रदेश १ मा कोरोना संक्रमणको ‘हटस्पट’ बन्यो विराटनगर- प्रदेश १ - कान्तिपुर समाचार

प्रदेश १ मा कोरोना संक्रमणको ‘हटस्पट’ बन्यो विराटनगर

देवनारायण साह

मोरङ — प्रदेश १ मा विराटनगर महानगरपालिका कोरोना संक्रमणको ‘हटस्पट’ बनेको छ । महानगरमा मात्रै दैनिक संक्रमितको संख्या थपिने क्रम बढ्दै जाँदा बिहीबारसम्ममा प्रदेशकै कूल संक्रमितको ४१ प्रतिशत संक्रमित पुग्दा पनि बजार क्षेत्रको भिड नियन्त्रण नहुँदा कोरोना संक्रमण अनियन्त्रित हुने जोखिम बढेको हो ।

कोरोना संक्रमणको लक्षण देखिएका सबै व्यक्तिले एन्टिजेन तथा पीसीआर परीक्षण नगराउने भएकाले पनि संक्रमणदर बढिरहेको छ ।

प्रदेशभरि कूल सक्रिय संक्रमितको संख्या ४ हजार ५१५ रहेकोमध्ये विराटनगर महानगरमा मात्रै त्यसको ४१ दशमलव १३ प्रतिशत अर्थात् १ हजार ८ सय ५७ संक्रमित रहेका छन् । कोरोना संक्रमण बढ्दै गएकाले विराटनगरस्थित कोशी अस्पतालका ८३ जना स्वास्थ्यकर्मी संक्रमित भएका छन् । कर्मचारीहरूमा संक्रमण देखिएपछि मालपोत तथा भूमि सुधार कार्यालयको सेवा ठप्प पारिएको छ । यहाँका अधिकांश सरकारी कार्यालय, प्रदेश सरकारका विभिन्न मन्त्रालयका कर्मचारी संक्रमित भएका छन् ।

सुनसरी-मोरङ औद्योगिक करिडोरमा कच्चा पदार्थ तथा मालवस्तु लिएर भारतबाट दैनिक १ हजारभन्दा बढी सवारी साधन विराटनगर भित्रिने गरेका छन् । मालबाहक सवारी लिएर आउने चालक र दुई जनासम्म सहचालक गरी दैनिक ३ हजारभन्दा बढी व्यक्तिले यहाँका चिया, नास्तालगायतका पसलमा स्वास्थ्य सुरक्षा मापदण्ड नै नअपनाई जाने गरेकाले संक्रमणदर बढेको हो ।

दैनिक संक्रमितको संख्या बढ्दै गए पनि यहाँका उद्योग, कलकारखाना, पसल, व्यवसाय र बजारमा स्वास्थ्य सुरक्षा मापदण्ड पालन गरिरहेको देखिँदैन ।

जिल्ला प्रशासन कार्यालय मोरङले मास्क नलगाउनेलाई १ सय र उद्योग, व्यवसायमा स्वास्थ्य सुरक्षा मापदण्ड नअपनाउने उद्योगीलाई ५ हजार रुपैयाँसम्म जरिवाना गर्ने निर्णय गरेको छ । तर त्यसको कार्यान्वयन नहुँदा यहाँ स्वास्थ्य सुरक्षा मापदण्ड अपनाउन अटेरी हुने गरेको पाइएको हो ।

कोरोनाको तेस्रो भेरिएन्टले संक्रमितको स्वास्थ्यमा कम असर पार्ने हल्लाले पनि लक्षण देखिएका व्यक्तिहरू मौसमी रुघाखोकी भन्दै परीक्षण गराउन नजाने गरेको देखिन्छ ।

कोशी अस्पतालका प्रमुख डा. चुमनलाल दासले स्वास्थ्य सुरक्षा मापदण्डको पालनासँगै खोप सेवा प्रभावकारी बनाउनुको विकल्प नभएको बताए । ‘सर्वसाधारण सबैलाई कोरोनाबाट बच्ने उपायबारे जानकारी भइसकेकाले सबैले आफैं सचेतता अपनाउनुको विकल्प छैन,’ उनले भने, ‘सर्वसाधारणले अनावश्यक घर बाहिर ननिस्किने र लक्षण देखिए पीसीआर वा एन्टिजेन परीक्षण गराएर होमआइसोलनमा बस्नु अपरिहार्य छ ।’

उनले कोशी अस्पतालमा हालसम्ममा चिकित्सक तथा स्वास्थ्यकर्मी नै ८३ जना संक्रमित भइसकेकाले बिरामीलाई सेवा दिन पनि कठिनाइ भइसकेको विषय सबैले बुझ्नु आवश्यक भएको बताए ।

कोरोना संक्रमणको लक्षण देखिएका सबै व्यक्तिले एन्टिजेन र पीसीआर परीक्षण नगराएकाले पनि महानगरमा संक्रमणदर बढ्दै गएको छ । विराटनगर महानगरका प्रमुख प्रशासकीय अधिकृत उमेश बस्नेतले कोरोनाको तेस्रो भेरिएन्टमा संक्रमितको स्वास्थ्यमा कम असर पार्ने गरेकाले परीक्षण गराउन नआउने गरेको बताए । जिल्ला प्रशासन कार्यालयले मास्क नलगाउने र स्वास्थ्य सुरक्षा मापदण्ड पालना नगर्नेलाई कारबाही गर्ने विषय कार्यान्वयनमा नआउँदा पनि बजार क्षेत्रको भिड नियन्त्रणमा समस्या भएको उनले बताए ।

महानगर प्रमुख भीम पराजुलीले ज्येष्ठ नागरिक, अपांग, अशक्तमा कोरोना संक्रमणको लक्षण देखिए घर-घरमा मोबाइल भ्यानमा गएर स्वाब संकलन गर्ने व्यवस्था गरेको तर त्यसका लागि सम्पर्क गर्न मानिसहरू हिच्किचाउने गरेको बताए । ‘अतिथि सदनमा रहेको स्वाब संकलन केन्द्रमा पनि कोरोना संक्रमणको लक्षण देखिएका कमै व्यक्तिहरू स्वाब दिन आउन गरेकाले पनि संक्रमणदर बढिरहेको छ,’ उनले भने, ‘त्यसैले कोरोना संक्रमण नियन्त्रण तथा रोकथामका लागि शुक्रबारबाट महानगरको १९ वटै वडाबाट खोप अभियान सुरु गर्न लागेका छौं ।’

उनले वडा नम्बर ३, ५ र १५ मा डेडिकेटेड खोप केन्द्र राखेर खोप सेवा प्रवाह गर्ने तयारी गरिएको सुनाए । पराजुलीले स्थानीय बजार, उद्योग, पसल, कलकारखानामा सुरक्षाकर्मीसहितको टोली परिचालन गरेर स्वास्थ्य सुरक्षा मापदण्ड पालना नगर्नेलाई कारबाहीको दायरामा ल्याउने व्यवस्था गरेको बताए ।

प्रकाशित : माघ ६, २०७८ २०:५३
प्रतिक्रिया
पठाउनुहोस्

उपत्यकामा शुक्रबार रातिदेखि यातायातका साधनमा जोरबिजोर प्रणाली

मातृका दाहाल

काठमाडौँ — कोरोना संक्रमण ह्वात्तै बढेपछि उपत्यकाका तीन वटै जिल्ला प्रशासन कार्यालयले सार्वजनिक तथा निजी सवारीसाधनमा जोरबिजोर प्रणाली लागूको निर्णय गरेका छन् । जिल्ला प्रशासन कार्यालय काठमाडौं, भक्तपुर र ललितपुरका प्रमुख जिल्ला अधिकारीहरूको संयुक्त बैठकले शुक्रबार रातिदेखि लागू हुने गरी अनिश्चितकालका लागि जोरबिजोर लागू गरेको हो ।

त्यस्तै, बस चलाउनुअघि नियमित रूपमा निसंक्रमित गर्नुपर्ने निर्णय पनि भएको छ । सार्वजनिक सवारीसाधनमा मास्क नलगाएका यात्रुलाई प्रवेश नदिने गरी त्यसको कडाइका साथ कार्यान्वयन गर्न सुरक्षा निकायलाई निर्देशन दिइएको छ । सार्वजनिक सवारीमा सिट क्षमताभन्दा बढीलाई राख्न पाइने छैन । लामो दूरीका सवारीसाधनले बीचमा गाडी रोकेर यात्रु चढाउन पाउने छैनन् । लामो दूरीका सवारीमा यात्रा गर्नेको सम्भव भएसम्म एन्टिजेन परीक्षणको व्यवस्था मिलाउन भनिएको छ । अत्यावश्यक सेवाका सवारी भने निर्बाध रूपमा सञ्चालन गर्न दिइनेछ ।

सबै सार्वजनिक सेवा प्रवाह गर्ने कार्यालय आलोपालो प्रणालीबाट सञ्चालन गर्ने निर्णय भएको छ । त्यसको आवश्यक प्रबन्ध सम्बन्धित कार्यालय प्रमुखले मिलाउनुपर्नेछ । ललितपुरका प्रजिअ घनश्याम उपाध्यायले संक्रमणको दर बढ्दै गएपछि सवारीसाधनमा जोरबिजोर प्रणाली लागू गरिएको बताए । ‘उपत्यका सबैभन्दा बढी जोखिममा परेको देखिन्छ, त्यसलाई समेत मध्यनजर गरेर जोरबिजोर प्रणाली जारी गरिएको हो,’ उनले भने, ‘सार्वजनिक सेवा लिन, दैनिक उपभोग्य वस्तु किनमेल गर्दा पनि अब अनिवार्य खोप कार्ड लिएर मात्रै जानुपर्नेछ ।’

यस्तै, मठमन्दिर, गुम्बा, मस्जिद, चर्चलगायत धार्मिक स्थलमा पुजारी/पण्डितबाट हुने नियमित नित्य/पूजाबाहेक कर्म निषेध गरिएको छ । भेला, जुलुस, सभा/सम्मेलन, महोत्सव, सिनेमा, नाचघर, डान्स/दोहोरी क्लब, पकेट हाटबजार, जिमखानालगायत क्षेत्र सञ्चालनमा अर्को आदेश नभएसम्मका लागि रोक लगाइएको छ । सबै किसिमका शैक्षिक पठनपाठन तथा तालिम/सेमिनार, गोष्ठी आयोजना गर्न पाइने छैन । विदेशबाट आउनेको रिपोर्ट नेगेटिभ आए पनि अनिवार्य ५ दिन क्वारेन्टिनमा बस्नुपर्नेछ । होटलमा आउनेलाई २४ घण्टाभित्र अनिवार्य एन्टिजेन्ट परीक्षण गर्ने र त्यसपछिको हरेक ७२ घण्टामा परीक्षण गरी जिल्ला कोभिड संकट व्यवस्थापन केन्द्रमा बुझाउनुपर्नेछ ।

सार्वजनिक तथा निजी सेवा प्रदायकले सम्भव भएसम्म विद्युतीय प्रणालीबाट सेवा प्रवाहको प्रबन्ध मिलाउन पनि भनिएको छ । मास्क नलगाई सार्वजनिक तथा निजी सेवा लिन गएमा न्यूनतम ५ रुपैयाँ लिएर मास्क उपलब्ध गराउने व्यवस्था मिलाउन पनि निर्देशनमा भनिएको छ ।

‘संक्रमण बढेपछि प्रशासनले आवागमन र भीडभाडजन्य सेवामा केही कडाइ गरेको छ, यो आम नागरिकको हकहितकै लागि हो,’ प्रजिअ उपाध्यायले भने, ‘सबैले जनस्वास्थ्यका मापदण्ड उल्लंघन गर्ने, आदेश पालनामा अटेर गर्ने गरे संक्रामक रोग ऐन २०२० र स्थानीय प्रशासन ऐन २०२८ ले दिएको अधिकार प्रयोग गरी कैद र जरिवाना गरिनेछ ।’

आदेशको पूर्णपाठ




प्रकाशित : माघ ६, २०७८ २०:३८
पूरा पढ्नुहोस्
प्रतिक्रिया
पठाउनुहोस्
×