कोसी अस्पतालका ४६ कर्मचारी संक्रमित- प्रदेश १ - कान्तिपुर समाचार
कान्तिपुर वेबसाईट
AdvertisementAdvertisement

कोसी अस्पतालका ४६ कर्मचारी संक्रमित

कान्तिपुर संवाददाता

विराटनगर — तेस्रो चरणको कोरोना संक्रमण सुरु भए यता कोसी अस्पतालका ९ चिकित्सक सहित ४६ कर्मचारी संक्रमित भइसकेका छन् ।  संक्रमित हुनेमा १७ नर्स र बाँकी कार्यालय सहयोगी, सफाइ कर्मचारी र पारामेडिक्स भएको अस्पतालका मेसु डा.चुमनलाल दासले बताए ।

उनले मंगलबारको पीसीआर रिपोर्टमा दुई वरिष्ठ चिकित्सक सहित ५ संक्रमित थपिएको बताए । अन्य ३ मा स्वास्थ्यकर्मी र कार्यालय सहयोगी छन् । यसअघि सोमबारसम्म अस्पतालका ७ चिकित्सकसहित ४१ कर्मचारीमा संक्रमण पुष्टि भइसकेको डा.दासले जानकारी दिए ।

उनका अनुसार संक्रमितमध्ये २ प्रयोगशालाकर्मीसहित ४ सहयोगी कर्मचारी निको भएका छन् । अन्य होम आइसोलेसनमा उपचार गरिरहेको डा.दासले जानकारी दिए । अहिलेसम्म अस्पतालको कुनै पनि विभाग बन्द नगरिए पनि यसैगरि संक्रमण बढिरहेमा आउँदा दिनमा केही भन्न नसकिने उनले बताए ।

स्थिति नसुध्रिएमा डा. दासले विभागहरू बन्द गर्नुपर्ने अवस्था आउन सक्ने संभावना देखिएको बताए । ‘कोभिड–१९ सँग मिल्दाजुल्दा लक्षण भएका थुप्रै कर्मचारी अहिले होम आइसोलेसनमा छन्, कतिपयले पीसीआर परीक्षण गराउन बाँकी छ भने कतिको रिपोर्ट आइसकेको छैन,’डा.दासले भने ।

यसैगरी विराटनगरस्थित भूमि सुधार तथा मालपोत कार्यालयका थप दुई कर्मचारीमा संक्रमणको पुष्टि भएको छ । ६ कर्मचारीमा संक्रमणको पुष्टि र बाँकी केहीमा मिल्दाजुल्दा लक्षण देखिए पछि आइतबारदेखि उक्त कार्यालय दैनिक सेवा बन्द गरिसकेको छ ।

प्रकाशित : माघ ४, २०७८ १४:५७
प्रतिक्रिया
पठाउनुहोस्

स्वास्थ्य सचिव पोखरेल भन्छन्- 'भीड नियन्त्रण होस्, हामी लकडाउनको पक्षमा छैनौं'

कान्तिपुर संवाददाता

काठमाडौँ — स्वास्थ्य सचिव रोशन पोखरेलले स्वास्थ्य मन्त्रालय लकडाउनको विपक्षमा रहेको बताएका छन् ।


संसद्‍को शिक्षा तथा स्वास्थ्य समितिको मंगलबार बसेको बैठकमा स्वास्थ्य सचिव पोखरेलले यस्तो बताएका हुन् ।

'हामी लडकडाउनको पक्षमा छैनौं । भीडको मात्रै चिन्ता छ । भीड नियन्त्रण हामीले मात्रै गर्न सकिँदैन । भीड नियन्त्रण होस् । स्वास्थ्य मन्त्रालय लडकडाउनको विरुद्धमा छ,' स्वास्थ्य सचिव पोखरेलले भने।

कोरोना संक्रमणको तेस्रो लहर तीव्र रुपमा फैलिन थालेपछि सरकारले रोकथामका लागि कडाइ गरेको छ ।

स्वास्थ्य सचिव पोखरेलले एक/दुई दिनमा पीसीआर परीक्षणको शुल्क समायोजन गर्ने पनि बताएका छन् । सरकारी ल्याबमा परीक्षण गर्नेलाई निःशुल्क गराउने पनि उनले बताए ।

बैठकमा समितिकी सभापति जयपुरी घर्तीले भने भीड नियन्त्रणका लागि अन्य निकायसँग आफूहरूले छलफल गर्ने बताएकी थिइन् । यसका लागि थप निर्णय आवश्यक भएको उनको भनाइ छ ।

प्रकाशित : माघ ४, २०७८ १४:५६
पूरा पढ्नुहोस्
प्रतिक्रिया
पठाउनुहोस्
×