खोप सेवा प्रभावकारी बनाउन गाउँ-गाउँमा अभियान चलाइने- प्रदेश १ - कान्तिपुर समाचार

खोप सेवा प्रभावकारी बनाउन गाउँ-गाउँमा अभियान चलाइने

देवनारायण साह

मोरङ — स्वास्थ्य तथा जनसंख्यामन्त्री विरोध खतिवडाले कोरोनाविरुद्धको खोप सेवा प्रभावकारी बनाउन तिथि-मिति तोकेर कार्यसूची बनाई गाउँ-गाउँमा अभियान चलाउन प्रदेश र स्थानीय सरकारलाई आग्रह गरेका छन् ।


मुख्यमन्त्री तथा मन्त्रिपरिषद्‍को कार्यालयमा आइतबार आयोजित कार्यक्रममा उनले प्रदेश १ को कुन जिल्लाको कुन/कुन स्थानीय तहमा सबभन्दा कम १८ वर्षमाथिका व्यक्तिले खोप लगाएका छन् त्यहाँबाट खोप अभियान सञ्चालन गर्न आग्रह गरेका हुन् ।

कोरोना महामारीले आर्थिक गतिविधि र सक्रिय जीवनशैलीमा असर पर्न नदिनका लागि सम्पूर्ण तयारी गर्न उनले प्रदेश र स्थानीय सरकारलाई आग्रह गरे । ‘आर्थिक गतिविधि र सक्रिय जीवनशैलीलाई ठप्प पारेर पूर्ण लकडाउनमा नजाने सरकारको रणनीति रहेकाले सोही अनुसार कोरोना नियन्त्रण र रोकथामको व्यवस्थापनमा जुटौं,’ उनले भने, ‘यसका लागि खोप सेवा १८ वर्षमाथिका प्रत्येक नागरिक लगाउनुको विकल्प छैन त्यसैले खोपको दुई मात्रा पूरा भएकालाई बुस्टर डोज खोप लगाउने अभियानसमेत सुरु गरिसकेका छौं ।’

कोरोनाको तेस्रो लहरमा विद्यालय पनि पूर्ण रुपमा बन्द नगर्ने सरकारको रणनीति रहेको खतिवडाको भनाइ थियो । उनले कोरोनाको तेस्रो लहरमा बालबालिका बढी प्रभावित हुने भएकाले १५-२० दिन विद्यालय बन्द गरेर अवस्थाको अध्ययन गर्ने र त्यसपछि भौतिक उपस्थितिमा नै विद्यालय सञ्चालन गर्ने योजना सार्वजनिक गर्ने बताए ।

उनले १ वर्षदेखि १२ वर्ष उमेर समूहका बालबालिकालाई खोप दिन विश्व स्वास्थ्य संगठनले अनुमति दिनासाथ खोप लगाउन सुरु गर्ने सम्पूर्ण तयारी भइसकेको उनले बताए । यसका लागि मोडर्ना र फाइजर खोपका लागि पहिलो भुक्तानीसमेत गरिसकेको खतिवडाले बताए ।

प्रकाशित : माघ २, २०७८ १९:५४
प्रतिक्रिया
पठाउनुहोस्

तनहुँ जिप दुर्घटना : दुई दिनपछि मृतकका आफन्तले बुझे शव

रासस

तनहुँ — शुक्रबार राति करिब ८ बजेको समयमा जिप दुर्घटनामा परी मृत्यु भएका छ जनामध्ये आइतबार साँझ चार जनाको शव आफन्तले बुझेका छन् । पीडित पक्ष, पीडक र प्रशासन प्रहरीबीच भएको त्रिपक्षीय छलफलमा सहमति जुटेपछि आफन्तजनले शव बुझेका हुन् ।

मृतकका परिवारलाई बीमाबापतको ५ लाख रुपैयाँका दरले क्षतिपूर्ति दिने र घाइतेको जिपका धनीले उपचार खर्च बेहोर्ने सम्झौता भएको हो । मृतकका परिवारलाई काजकिरीयाबापत ५० हजार रुपैयाँका दरले आजै प्रदान गरी बाँकी चार लाख ५० हजार रुपैयाँ २५ दिनभित्र बुझाउने सहमतिअनुरुप आफन्तजनले शव बुझेका हुन् ।

बन्दीपुर–६ का ५३ वर्षीय हरि न्यौपाने र ४८ वर्षीया सुशीलादेवी न्यौपानेबाहेकको शव आफन्तले बुझेको सामाजिक अभियानकर्मी सिद्धान्त थापामगरले जानकारी दिए । मृतक न्यौपानेद्वय श्रीमान्–श्रीमती हुन् । निजका छोरा रोजगारीको सिलसिलामा विदेशमा रहेकाले छोरा आएपछि शव बुझ्ने बताइएको छ ।

दुर्घटनामा परी मृत्यु भएका सोही स्थानका २४ वर्षीय रोशन गुरुङ, नौ महिनाकी आरुबी थापा, ४८ वर्षीय सन्तबहादुर गुरुङ र ५० वर्षीया बिमाया गुरुङको आइतबार परिवारले शव बुझी लगेका छन् । साराङघाटबाट बन्दीपुरतर्फ जाँदै गरेको ग१ज ६५५५ नंको जिप बन्दीपुर–६ धरमपानीमा दुर्घटना हुँदा छ जनाको मृत्यु भएको थियो भने सात सख्त घाइते भएका छन् ।

दुर्घटनामा परी घाइते भएका अन्य आठमध्ये दुई जना डिस्चार्च भई घर फर्किएको जिल्ला प्रहरी कार्यालय तनहुँका प्रहरी नायब उपरीक्षक युवराज खड्काले जानकारी दिए । अन्यको भरतपुर शिक्षण अस्पताल चितवनमा उपचार भइरहेको उनले बताए ।

प्रकाशित : माघ २, २०७८ १९:४६
पूरा पढ्नुहोस्
प्रतिक्रिया
पठाउनुहोस्
×