माघे संक्रान्तिमा हुर्रा नाच- प्रदेश १ - कान्तिपुर समाचार

माघे संक्रान्तिमा हुर्रा नाच

कान्तिपुर संवाददाता

धनकुटा — माघे संक्रान्तिका अवसरमा धनकुटाको चौबिसे क्षेत्रमा हुर्राको रौनक छाएको छ । मगर समुदायको बाहुल्य रहेको चौबिसे गाउँपालिकाका विभिन्न स्थानमा हुर्राको आकर्षक नृत्य प्रस्तुत गरियो ।

उक्त अवसरमा मगर जातिको भेषभूषामा सजिएका मगर युवायुवतीले हुर्रा नृत्य प्रर्दशन गरेका थिए । चौबिसे गाउँपालिकाको मुढेवास, टोड्के, सोगुम, सुरुंगी र वसन्तटारस्थित ठाडागाउँ र आमडाँडामा मगर जातिको अधिक बाहुल्य रहेको छ । त्यही क्षेत्रबाट सहभागी भएका सयौं हुर्रामा सहभागी भए । मगर जातिको बसोबास क्षेत्रमा प्रत्येक वर्ष तिहारको केहीअघिदेखि केही दिनसम्म हुर्रा नाचिने चलन छ ।

हुर्राको भाका र ताल दुवै उत्तिकै आकर्षक हुने चर्चित गायक तुलसी पराजुली बताउँछन् । उनी वसन्तटारमा आयोजित हुर्रा नृत्यमा सहभागी भएको बताए । जिल्लाको मुढेबासबाट हुर्रा नाचको सुरुवात भएको मगर समुदायका अग्रजको दाबी छ । चौबिसे क्षेत्रमा मादल, बासुरी, खैजडीसहित हुर्राको आकर्षक भाकाले रौनकता छाएको छ ।

गाउँबस्तिमा जोर मादल र बाँसुरीको साथमा हुर्रामा मगर जाति मात्र सहभागी भएनन्, त्यहाँ पुग्ने जोकोहिले नृत्यमा साथ दिए । जिल्लाको वशन्तटार, भेडेटार, राजारानी लगायत चौबिसे क्षेत्र तथा खाल्सा छिन्ताङ सहिदभूमि गाउँपालिका महालक्ष्मी नगरपालिकालगायत मगर समुदायको बाहुल्य बस्तीमा माघे संक्रान्ति र तिहारमा धुमधामले हुर्रा नृत्य नाचिने मगर संघका पूर्वसचिव इन्द्र सारु मगरले बताए ।

खासगरी मुलुकको पूर्वी केही जिल्लामा लोकप्रिय हुर्रा नाच धनकुटासँगै सुनसरी, मोरङलगायत जिल्लामा पनि विस्तार हुँदै गएको मगरले बताए ।


प्रकाशित : माघ २, २०७८ ०९:०२
प्रतिक्रिया
पठाउनुहोस्

राजवंशी समुदायले मनाए ‘तिला सुकराती’ पर्व

कान्तिपुर संवाददाता

मोरङ — विराट राजवंशी समुदायले शनिबार तिला सुकराती पर्व मनाएका छन् । पर्वको अवसरमा विराट राजवंशी उत्थान समितिले आयोजना गरेको कार्यक्रममा तिल खिचडी, भुजा, च्युरा, तिलको लड्डु सामूहिक भोजन गरेर शुभकामना आदान प्रदान गरेका हुन् ।

कार्यक्रममा राजवंशी समुदायका अगुवा तथा अवकाश प्राप्त शिक्षक बन्दीलाल राजवंशीले तिला सुकरात पर्वको सांस्कृतिक तथा धार्मिक महत्त्वका बारेमा जानकारी गराएका थिए । ‘माघ १ बाट एउटा तिल बराबर प्रत्येक दिन लामो हुने र जाडो घट्दै जाने भएकाले पर्वका रूपमा तिला सुकरात मनाउँदै आएका छौं,’ उनले भने, ‘यो पर्वको अवसरमा हिन्दु धर्मावलम्बीले बिहानै स्नान गरेर कुलदेवतालाई पूजा गरी दूधमा मुछेको तिल, सक्खर र चामलको प्रसाद ग्रहण गरेर भोजन गर्ने परम्परा छ ।’

पुसभरिको जाडोमा स्नान नगर्नेले पनि यस दिन स्नान गरेर भोजन गर्ने परम्पराले छालासम्बन्धी रोग निको हुने जनविश्वास रहेको उत्थान समितिका अध्यक्ष भुनेश्वर मण्डल राजवंशीले बताए । उनले अहिलेको सूचना प्रविधिको युगमा सांस्कृतिक महत्त्वका पर्वहरूको बारेमा नयाँ पुस्तामा सचेतना जगाएर पुस्तान्तर गर्नु आवश्यक भएको बताए । कार्यक्रममा उत्थान समितिका मोरङ अध्यक्ष प्रदीप विश्वास राजवंशीले विराट राजवंशी समुदायको

सांस्कृतिक उत्थानको दायित्व युवाको काँधमा आएको बताए ।

विराट राजवंशी समुदायका युवा नेता दिवस राजवंशीले अल्पसंख्यक विराट राजवंशीको उत्थान फुटेर नभई सबैले जुटेर गर्नु आवश्यक भएको बताए । ‘मुलुकमा आएको संघीयताले सबै जात, धर्म, समुदायलाई आ–आफ्नो विकासका लागि अवसर प्रदान गरेको छ,’ उनले भने, ‘त्यसैले प्राप्त राजनीतिक अधिकारलाई उपयोग गरी विराट राजवंशी समुदायको उत्थानमा लाग्नुको विकल्प छैन ।’

प्रकाशित : माघ २, २०७८ ०९:००
पूरा पढ्नुहोस्
प्रतिक्रिया
पठाउनुहोस्
×