खोटाङका सबै पालिकामा कोरोना खोप अभियान सञ्चालन गरिने
खोटाङ — मंसिर २२ र २३ गते जिल्लाका दसवटै स्थानीय तहमा कोरोना भाइरसविरुद्धको खोप अभियान सञ्चालन गरिने भएको छ । पहिलो मात्राका खोप लगाइसकेका तथा लगाउन बाँकी नागरिकलाई पायक पर्ने क्षेत्रमा खोप लगाइने छ ।
अभियानका लागि जिल्ला स्वास्थ्य कार्यालयले आवश्यक सामग्रीसहित स्वास्थ्यकर्मी सम्बन्धित स्थानीय तहमा पठाउने जिल्ला कोभिड–१९ संकट व्यवस्थापन केन्द्र डीसीसीएमसी) खोटाङका संयोजक एवं प्रमुख जिल्ला अधिकारी फणिन्द्र दाहालले बताए ।
दिक्तेलमा उपलब्ध गराइने खोपका लागि जिल्ला स्वास्थ्य कार्यालयले खोप तथा आवश्यक स्वास्थ्य सामग्री, जिल्ला अस्पतालले कोठा र दिक्तेल रुपाकोट मझुवागढी नगरपालिकाले स्वास्थ्यकर्मीको व्यवस्था गर्ने भएका छन् ।
खोप अभियानका लागि जिल्ला स्वास्थ्य कार्यालयमा संघ तथा प्रदेश सरकारले उपलब्ध गराएको कोभिसिल्ड र भेरोसेल गरी दुई प्रकारका खोप रहेको जिल्ला स्वास्थ्य कार्यालय खोटाङका प्रमुख पुण्यप्रसाद सिक्देलले बताए ।
दुई नगरपालिका र आठ गाउँपालिका रहेको जिल्लामा कोरोनाविरुद्धको पहिलो मात्राको खोप ७४ हजार ७ सय ७४ र दोस्रो मात्राको खोप ४० हजार ९ सय ७९ जनालाई उपलब्ध गराइएको संयोजक दाहालले बताए ।
प्रकाशित : मंसिर २१, २०७८ १४:०८